Salmo 104 - Bible in Quechua of South Conchucos（qxo）

Salmo 104 (103)Tayta Dios kamanqankunapita alabanqan

1 Tayta Diostam llapan shonqüwan alabashä.

Tayta Dios, llapanpäpis poderösum kanki.

Qamqa chipipirrä röpashqanömi kanki.

2Imayka röpawannömi chipipiynikiwan tsapakunki.

Jatun säbanastanömi ciëlutapis mashtamurqayki.

3Ciëluchö kaq yaku jananchömi wayikitapis shäritsirquyki.

Pukutaytapis guërra carrëtaykimanmi tikratsinki.

Vientu jananchömi maypapis aywanki.

4Vientupis willakuqnikim kaykan.

Lunyaypa lunyar rupaykaq ninapis sirvishuqnikim kaykan.

5Cimientuta ruraykurmi patsatapis jamatsirqayki.

Jamatsinqaykipitaqa manam imaypis kuyuntsu.

6Imayka röpawannömi lamarwan tsaparqayki.

Altunnin jirkakunatapis yakuwanmi tsaparqayki.

7Ollqutupaptikim tsaparaq yaku ras aywarqan.

Illaqukuynörä jinchipa parlaptikim witikurqan.

8Tsaymi jirkakuna y raqrakunapis yuriyarqan.

Qam ninqaykichömi quëdayarqan.

9Patsaman yaku yapay mana juntananpämi señalarqayki.

Tsay señalanqaykipitaqa manam päsantsu.

10Qam mandaptikim jirkakunapita pukyukunapis pashtamur raqrakunapa yaku aywan.

11Tsay yakutam munti ashmakunapis upuyan.

Munti ashnukunapis yakunarmi tsaykunapita upuyan.

12Mayukuna kuchunchömi pishqukunapis qeshunkunata rurayan.

Muntikunapa rämankunachömi rezakur cantayan.

13Qammi ciëluchö kaykaq wayikipita jirkakunata qarpanki.

Tamyawanmi allpatapis ushmatsinki.

14Ashmakunapämi qewatapis wiñatsimunki.

Mikuyta cosechananpämi runa murunqantapis wiñatsimunki.

15Vïnutam alistapanki upur kushikunanpä,

aceititam alistapanki cäranman llushikuptin chipipïnanpä

y mikuytam alistapanki kallpan kananpä.

16Líbanuchö cedru muntikunapis qampam.

Yaku kanqanchö karmi rämasapa wiñayan.

17Rämankunachömi pishqukunapis qeshunkuna rurayan.

Cigüeñakunapis tsay jachakunachömi täyan.

18Jirkakunachöpis munti cabrakunam kayan.

Qaqakunachöpis tejonkunam pakakuyan.

19Killatapis fëchata musyayänäpämi kamarqayki.

Rupaypis musyanmi imay höra ullunanpä kanqanta.

20Patsa tardiyaptinqa tsakaskatsinkim.

Tsakaypanam munti ashmakuna punukunanpita yarqayämun.

21Leonkunapis mikuyänanpä ashmata ashirmi qayaräyan.

Qamtam mañakuyäshunki ashmata taritsinaykipä.

22Patsa waraskiptinnam punukunankunaman kutiyan.

Junaqpaqa machayninkunachömi punuyan.

23Runakunanam aruyninkunaman aywayan.

Tsaychömi höra chämunqanyaq qoyat aruyan.

24 Tayta Dios, imaykatapis qammi kamarqayki.

Llapantapis shumaq tantiyaykurmi kamarqayki.

Kay patsachöqa kamanqaykikuna maytsaychömi kaykan.

25Lamarpis jatunkaray y anchum.

Tsaychömi jatusaqpis y ichishaqpis tsaytsika ashmakuna kayan.

26Lamar jananpam büquikunapis puriyan.

Lamarchömi jatunkaray mantsaypä Leviatán ashmapis kaykan.

Tsay ashmataqa pukllanaykipämi kamarqayki.

27Llapan ashmakunam qamta shuyäyäshunki höranchö mikuyta qaranaykipä.

28Qaraptikim mikuyänanpä qorikuyan.

Bendicionnikiwanmi pacha junta mikuyan.

29Mana alistapaptikiqa pasaypam waqayan.

Jamayninta tsapaskiptikiqa wanurmi allpaman tikrayan.

30Mirayänanta munaptikiqa pasaypam mirayan.

Tsaynöpam kay patsaman yapay juntayan.

31¡Tayta Dios imayyaqpis alabashqa kaykullätsun!

¡Kamanqanta rikar Tayta Dios kushikutsun!

32Pay rikaskiptinqa patsapis mantsarirmi tsuktsukyan.

Yataykuptinqa jirkakunapis qoshtäyanmi.

33Kawanqäyaqmi salmukunata cantar Tayta Diosta alabashä.

34Yarpaynïpis Tayta Diospa shonqunpänö kaykullätsun.

Paypa poderninchö karmi imaypis kushikü.

35Jutsa ruraqkuna kay patsachö ushakäyätsun.

Mana alli ruraq runakuna llapanpis illakäyätsun.

Llapan shonqüwanmi Tayta Diosta alabashä.

¡Aleluya!