1 1 (1b) Imaykapita tsapämaq Tayta Dios alabashqa kaykullätsun.
Paymi guërrachö pelyanäpä yanapaman.
2Paymi kuyamaqnï y imaykapitapis tsapämaqnï.
Paymi amparakunä y salvamaqnï.
Escüdunö tsapämaptinmi payman yärakü.
Llapan nacionkunata vincinäpäpis paymi yanapaman.
3 Tayta Dios, ¿imanatä runa tsayjinanpa paypä yarpachakunaykipä?
¿Imanatä runa pasaypa kuyanaykipä?
4Jamaynöllam runaqa kaykan.
Kawayninpis llantu päsaqnöllam kaykan.
5 Tayta Dios, ciëluta kichaskir uraykallämuy.
Qoshni shärinanpä jirkakunata yataykullay.
6Chikimaqnïkuna mantsakar qeshpiyänanpä maqakatsimur flëchaykikunawan atacaykullay.
7Yanapamänaykipä ciëlupita shamuykullay.
Lamar yaku junishpa junishpa shäriqchönö kaykanqäpita jipiykallämay.
Jäpa runakunapa poderninpita salvaykallämay.
8Llullakullarmi tsay runakunaqa kaykäyan.
Derëcha makinta joqarkur jurarpis llullakuyanmi.
9Tayta Dios, mushuq cantuta cantarmi alabashayki.
Chunka cuerdayuq arpata tukarmi salmukunata cantar alabashayki.
10Qammi chikiqninkunata vinciyänanpä reykunata yanapanki.
Espädawan mana wanutsinanpämi sirvishuqniki Davidtapis salvanki.
11Jäpa runakunapa poderninpita salvaykallämay.
Tsay runakunaqa llullakuyänallanpämi yarpachakuyan.
Derëcha makinta joqarkur jurarpis llullakuyanmi.
12Ollqu tsurïkuna kuyayllapä jatusaq muntikunanörä wiñaykuyällätsun.
Warmi tsurïkunapis palaciuta adornaraq paradorkunanörä kaykuyällätsun.
13Wayïkunachöpis imaykaläya mikuykuna junta kaykullätsun.
Chakräkunaman juntaqpä ashmäkuna waranqanpa waranqanpa miraykuyällätsun.
14Törükunapis aruyänanpä sänu kaykuyällätsun.
Täyanqä marka murällakunapis ama juchuykullätsuntsu.
Cällikunachöpis mantsariypita pipis ama qayaykachätsuntsu.
15Tsaynö kawayänäpä yanapamaptikim kushishqa kawayäshä.
¡Tayta Diosman yärakuq runakuna kushishqam kawayan!
Who We AreWhat We EelieveWhat We Do
2025 by iamachristian.org,Inc All rights reserved.
