Proverbios 16 - Bible in Quechua of South Conchucos（qxo）

1Runaqa imata rurananpäpis yarpachakunmi.

Tsaynö yarpachakuptinpis Tayta Diosrämi imata rurananpäpis permitin.

2Runaqa imata rurarpis allita ruranqantam yarpan.

Tsaynö kaptinpis Tayta Diosmi musyan alli yarpaywan o mana alli yarpaywan ruranqanta.

3Imata yarpanqaykitapis ruranaykipä Tayta Diosta mañakuy.

Tsaynö mañakuptikiqa llapan yarpanqaykikunam cumplinqa.

4 Tayta Diosqa yarpanqannö kananpämi llapantapis kamashqa.

Mana alli ruraq runatapis juzganan junaqchö castigananpämi kamashqa.

5Runa tukuqkunaqa Tayta Diosta pasaypam rabyanätsiyan.

Paykunataqa imay junaq karpis castiganqam.

6Rasunpa kuyakuq karmi jutsata ruraptinpis perdonan.

Tayta Diosta mantsapakurmi jutsa ruraypitapis witikun.

7 Tayta Diosqa munanqannö kawaqkunatam contrankunawanpis perdonanakur alli kawayänanpä yanapan.

8Suwakur rïcuyänanpa rantinqa mas allim kaykan arukur ichikllatapis gänanqan.

9Runa imanö kawananpä yarpachakuptinpis Tayta Diosrämi permitin.

10Reytaqa alli parlananpä Tayta Diosmi tantiyatsin.

Pitapis juzgarqa munanqannöllam Tayta Dios juzgan.

11Balanzawan o tupuwan karpis complëtuta rantikunantam Tayta Dios munan.

Balanzawan o tupuwan engañaqkunataqa paymi juzganqa.

12Pipapis janan mana shäriypa juzgaptinqa reypa favorninmi runakuna kayan.

Tsaymi reyqa pipis jutsata ruraptin mana kuyapaypa juzgan.

13Pipis rasun kaqta parlaptinqa rey kushikunmi.

Mana llullakuypa parlaq runataqa kuyanmi.

14Rey rabyaptinmi runakuna yarpäyan pitapis wanutsinanpä kanqanta.

Peru yachaq runakunaqa imaykanöpapis kushikatsiyanmi.

15Rey kushishqa kaptinqa pipis kushikunmi.

Rey yanapanqanqa murukuy tiempu tamyanömi kaykan.

16Tantiyakuq kaymi qoripitapis mas välin.

Yachaq kaymi qellaypitapis mas välin.

17Alli ruraq runaqa jutsa ruraypitam witikun.

Jutsa rurayta jaqiqkunaqa wanuypitam salvakun.

18Runa tukuqtaqa desgraciam päsanqa.

Allish tukuqkunaqa mana allimanmi chäyanqa.

19Rïcuyayta munar runa tukuqkunawan juntakanqan manam allitsu.

Tsaypa rantinqa mas allim pobrikunawan humildi kawanqan.

20Yachatsikuyta cäsurqa allim kawanqa.

Tayta Diosman yärakurqa kushishqam kawanqa.

21Yachaq runataqa yachaq kanqantam niyan.

Alli shimillanpa parlaq runaqa pitapis shumaqmi yachatsin.

22Shumaq tantiyakuq runaqa allim kawan.

Mana tantiyakuq runataqa wallällam pipis tantiyatsin.

23Yachaq runaqa shumaq tantiyaykurmi parlan.

Pay parlanqantaqa runakuna chaskikuyanmi.

24Pipis alli shimillanpa parlanqanqa imayka abëjapa mishkinnömi.

Tsaynö parlarmi pïmaytapis valuratsir kushikatsin.

25Wakin runakunaqa llutanta rurarpis allita rurayanqantam yarpäyan.

Tsaynölla kawarqa wanurmi ushakäyanqa.

26Nisidächö kaq runaqa ima aruymanpis yaykunmi.

Mallaqayta mana munarmi arukun.

27Mana alli ruraq runaqa llutanta rurananpämi yarpachakun.

Imata parlanqanpis ninanömi kaykan.

28Mana alli ruraq runaqa pïmaytapis rimanakatsirmi purin.

Cuentushtërukunaqa alli kawaqkunatam chikinakatsin.

29Mana alli ruraq runaqa amïguntapis llullapanmi.

Alli kawaptinpis llutan ruraymanmi pushan.

30Llutan rurayta yarpaq runaqa ñawillanwanmi qemtsipaskin.

Jutsata ruraskatsirqa upällanam kakun.

31Allillata rurar kawaq runakunaqa soquyanqanyaqmi kawayan.

Tsaymi soquyashqa runataqa pïmaypis respitayan.

32Alli chölu kanqanpitapis pacienciakuq kanqanmi mas alli kaykan.

Markata dominananpa rantinqa kikinpa geniunta dominanqanmi mas alli kaykan.

33Imata rurananpäpis wakin runaqa suertitarämi jitan.

Peru tsaynö kaptinpis Tayta Diosrämi imanö kananpäpis permitin.