Salmo 16 - Bible in Quechua of South Conchucos（qxo）

Salmo 16 (15)Tayta Diospa poderninchö kawanqantsik llapanpitapis mas alli kanqan 1a (1a) David qellqanqan salmu.

1 1 (1b) Tayta Dios, qamllamanmi yärakamü.

Mana allikunapita tsapaykallämay.

2 Tayta Diosta mañakurmi nirqü:

<

Qamman yärakur kawanqämi llapanpitapis mas alli>>.

3Kay patsachö munanqaykinö kawaq santu runakunaqa rasunpam alli runakuna kayan.

Paykunapitam pasaypa kushikü.

4Juk dioskunata adoraqkunaqa pasaypa ñakarmi kawayanqa.

Noqaqa manam juk diospa altarninmanpis ashmapa yawarninta wiñashätsu.

Jutinkunatapis manam parlashätsu.

5 Tayta Dios, kikikim herenciä kanki.

Qammi bendicionta imaypis churamunki.

Llapan päsamänanpä kaqkunatam musyanki.

6Llapan qaramanqaykiqa allim kaykan.

Tsaymanqa manam imapis iwalantsu.

7 Tayta Diosmi imanö kawanäpäpis tantiyatsiman.

Tsaymi imaypis payta alabashä.

Tantiyatsimanqantaqa paqaspapis yarparaykämi.

8 Tayta Diostam imay hörapis yarparaykä.

Derëcha kaq lädüchö karmi imaypis yanapaykäman.

9Tsaymi shonqüpis pasaypa kushikun.

Shimïpis paytam alaban.

Payman yärakurmi imaypis tranquïlu kawä.

10Wanushqakuna pamparäyanqanchöqa manam dëjamankitsu.

Santu sirviqniki kaptïmi sepultürachö cuerpü ismunantapis munankitsu.

11Munanqaykinö kawanäpämi alli nänipa pushamanki.

Puntaykichöqa imaypis kushishqallam kawä.

Derëcha makikiwanmi imaypis bendicionnikita churamunki.