1¡Aleluya!
Allillata ruraq kanqanpita Tayta Diosta agradëcikuyay.
Kuyakuq kayninqa imaypis manam ushakantsu.
2Milagrukunata ruranqanpita willakurpis ¿pirä shumaq tantiyatsinman?
Imanö alabarpis ¿pirä shumaq alabanman?
3Kushishqam kawayanqa Tayta Dios munanqannö kawaqkuna.
Paykunaqa imaypis allillatam rurayan.
4 Tayta Dios, kuyanqayki Israel mayïkunata yanapar noqatapis yarpaykallämay.
Shamur noqatapis salvaykallämay.
5Tsaynöpam akranqayki runakuna alli kawaykaqta rikashä.
Paykuna kushikuyanqannömi noqapis kushikushä.
Paykuna alabayäshunqaykinömi noqapis alabashayki.
6Unay castäkunanöllam noqakunapis jutsata rurayarqü.
Paykunanöllam llutanta rurayarqü.
7Unay castäkunaqa Egiptuchö espantaypä ruranqaykita rikaykarpis manam cäsuyäshurqaykitsu.
Kuyapar yanapanqaykitapis manam yarpäyarqantsu.
Puka Lamarman chaykurmi contrayki shäriyarqan.
8Kuyapäkuq karmi tsaynö kaykäyaptinpis paykunata salvarqayki.
Poderösu kanqaykita tantiyatsiyta munarmi tsaynö salvarqayki.
9Puka Lamarta ollqutupaptikim chipyaq tsakiskirqan.
Tsaypam tsakillapana päsatsirqayki.
10Tsaynöpam contrankunapa y chikiqninkunapa poderninpita salvarqayki.
11Yaku tsapaskiptinmi chikiqninkuna llapan ushakäyarqan.
Manam ni jukllayllapis kawaykar quëdayarqantsu.
12Salvaptikim kuyanqayki runakuna awninqaykita criyiyarqan.
Kushikuypita cantarmi alabayäshurqayki.
13Tsaynö espantaypä ruranqaykikunata yapaymi qonqaskiyarqan.
Tantiyatsinqaykitapis manam cäsuyarqantsu.
14Desiertuchömi munayanqanta ruranaykita munar tentayäshurqayki.
15Tsaynö rabyatsiyäshuptikipis munayanqantam alistaparqayki.
Wakintaqa pestiwanmi ushakätsirqayki.
16Campamentuchöpis Moiséspa contranmi shäriyarqan.
Akranqayki Aarónpa contranmi shäriyarqan.
17Tsaymi patsa kichakar Datánta ultaskirqan.
Abiramta y qatiraqninkunatapis patsam tsapaskirqan.
18Lunyaypa lunyar nina tsarirmi wakin qatiraqninkunatapis usharqan.
Tsay mana alli ruraq runakunatam nina rupar usharqan.
19Horeb jirkachönam qorita fundiskir becërruta rurayarqan.
Qonqurikuykurmi tsay ïduluta adorayarqan.
20Llapanpä poderyuq kanqaykita musyaykarmi qewa mikuq törutanö ruraykur adorayarqan.
21Tsaynö karmi Egiptuchö espantaypä kaqkunata rurar salvaqnin kaykaptikipis qonqayäshurqayki.
22Tsaynömi qonqayäshurqayki mana criyiypä kaqkunata Egiptuchö ruraykaptikipis.
Tsaynöllam qonqayäshurqayki Puka Lamarchö espantaypä kaqkunata ruraykaptikipis.
23Tsaynö kayaptinmi pasaypa rabyar paykunata chipyaq ushakätsiyta munarqayki.
Qam rabyaptikim paykunapa janan shärir Moisés rugakushurqayki.
Tsaymi rabyayniki päsaptin paykunata ushakätsirqaykinatsu.
24Kuyayllapä nacionman pushaptikipis manam yaykuyta munayarqantsu.
Tsay nacionta entreganaykipä awninqaykitapis manam criyiyarqantsu.
25Ninqaykita mana cäsurmi toldunkuna rurinchö contrayki parlayarqan.
26Tsaymi jurar nirqayki desiertullachö wanur ushakäyänanpä kanqanta.
27Paykunapita miraqkunata juklä nacionkunaman qarqunaykipämi nirqayki.
28Tsaynöllam Baal-peor ïduluta adorayarqan.
Mana rasunpa kaq dioskunapä sacrificiu ruranqantam mikuyarqan.
29Tsaynö llutanta rurarmi pasaypa rabyatsiyäshurqayki.
Tsaymi pesti qeshyawan wakinta ushakätsirqayki.
30Tsay junaqmi sacerdöti Finees aywar jutsayuq runata wanutsirqan.
Tsayrämi pesti qeshya illakarqan.
31Tsaynö ruranqanpitam awnirqayki paypita miraqkuna imayyaqpis sacerdöti kayänanpä.
32Meriba yaku kaqchömi rabyatsiyäshurqayki.
Paykuna jananmi Moisésta nirqayki awninqayki nacionman mana yaykunanpä.
33Tsay runakuna rabyatsiyaptinmi Moisés mana yarpachakuypa llutanta parlarqan.
34Awninqayki nacionman paykuna yaykur markakunata ushakätsiyänanpä niptikipis manam ushakätsiyarqantsu.
35Ushakätsiyänanpa trokinmi tsaychö täraq runakunawan qorikar mana alli costumbrinkunata yachakuyarqan.
36Tsaymi tsay runakunapa ïdulunkunata adorar sirviyarqan.
Tsaynö adorayanqanpitam pasaypa desgracia päsarqan.
37 Supaykunata adorarmi ollqu tsurinkunatapis y warmi tsurinkunatapis rupatsiyarqan.
38Jutsaynaq kaykäyaptinpis tsaynömi wanutsiyarqan.
Tsaynö wanutsiyarqan cananeo runakuna adorayanqan ïdulukunapä sacrificiuta rupatsirmi.
Tsaynöpam nacionnin maldicionashqa quëdarqan.
39Tsaynö mana allikunata rurarmi pasaypa melanaypä impüru kayarqan.
40Tsaymi kuyanqayki runakunapita pasaypa rabyarqayki.
Paykunata rikaytapis manam munarqaykitsu.
41Contran nacionkunapa poderninmanmi churarqayki.
Chikiqninkunaqa munayanqantam ruratsiyarqan.
42Poderninkunachö kayaptinnam contrankunaqa penqakuyman churar ñakatsiyarqan.
43Kuyanqayki runakunataqa atska kutim salvarqayki.
Salvaykaptikim contrayki shäriyarqan.
Jutsata rurarmi llutan rurayman chäyarqan.
44Tsaynö kaykäyaptinpis ñakayanqanta rikar y mañakuyäshunqaykita wiyarmi kuyaparqayki.
45Paykunawan pactu ruranqaykitam yarpaskirqayki.
Pasaypa kuyakuq karmi castigarqaykitsu.
46Tsaymi chikiqninkuna kuyapäyänanpä tantiyatsirqayki.
47Tayta Diosllä, salvaykayällämay.
Karu nacionkunachö mashtakashqa kayanqäpita qoriykayällämay.
Tsaynöpam santu jutikichö kushishqa alabayäshayki.
Pasaypa kushikurmi qamta alabayäshayki.
48¡Israel runakunata kuyaq Tayta Dios imayyaqpis alabashqa kaykullätsun!
Pïmay runakunapis <<¡amén!>> niyätsun.
¡Aleluya!
Who We AreWhat We EelieveWhat We Do
2025 by iamachristian.org,Inc All rights reserved.
