Números 1 - Bible in Quechua of South Conchucos（qxo）

Israel runakunata Sinaí jirkachö censayanqan

1Israel runakuna Egiptupita yarqayämunqan juk wata y juk killa päsaskiptinmi Sinaí desiertuchö kaykäyarqan. Tsay junaqmi Tinkuna Tolduchö Moisésta Tayta Dios parlapar nirqan:

2<

3Censarnin ishkay chunka (20) watayuqpita jutinkunata apuntayay. Tsay runakunaqa guërraman aywayänanpä edäninkunachönam kaykäyan. Aarónmi censar yanapashunki.

4Tsaynölla cada trïbupita juk mandakuqta churanki censar yanapayäshunaykipä.

5Paykuna kayanqa:

Rubén trïbupita Sedeurpa tsurin Elisur,

6Simeón trïbupita Zurisadaipa tsurin Selumiel,

7Judá trïbupita Aminadabpa tsurin Naasón,

8Isacar trïbupita Zuarpa tsurin Natanael,

9Zabulón trïbupita Helónpa tsurin Eliab,

10Efraín trïbupita Amiudpa tsurin Elisama,

Manasés trïbupita Pedasurpa tsurin Gamaliel (Efraínwan Manasésqa Josépa tsurinkunam kayarqan),

11Benjamín trïbupita Gedeonipa tsurin Abidán,

12Dan trïbupita Amisadaipa tsurin Ahiezer,

13Aser trïbupita Ocránpa tsurin Pagiel,

14Gad trïbupita Reuelpa tsurin Eliasaf

15y Neftalí trïbupita Enánpa tsurin Ahira>>.

16 Tayta Dios ninqannöllam cada trïbupita tsay mandaq runakunata Moisés akrarqan censar yanapayänanpä.

17Tsay akranqan runakunawan Moisés y Aarón qorikaskirmi

18llapan Israel runakunata qayatsiyarqan. Tsay junaqmi ishkay kaq killa qallaykunan junaq karqan. Tsaychömi Israel runakunata ayllunpa ayllunpa castanpa castanpa censayarqan. Tsaynö censarmi ishkay chunka (20) watayuqpita janaman ollqu kaqkunapa jutinkunata apuntayarqan.

19Tayta Dios ninqannöllam Sinaí desiertuchö llapan ollqu kaqkunata Moisés censatsirqan.

20-21Cada ünunpa jutinkunata apuntarmi ayllunpa ayllunpa castanpa castanpa censayarqan. Tsaynöpam musyayarqan ishkay chunka (20) watayuqpita janaman aykaq ollqukuna guërraman aywayänanpä edäninkunachöna kayanqanta.

Israelpa mayor tsurin Rubén trïbupitam chusku chunka joqta waranqa pitsqa pachak (46,500) ollqukuna kayarqan.

22-23Simeón trïbupitam pitsqa chunka isqun waranqa kimsa pachak (59,300) kayarqan.

24-25Gad trïbupitam chusku chunka pitsqa waranqa joqta pachak pitsqa chunka (45,650) kayarqan.

26-27Judá trïbupitam qanchis chunka chusku waranqa joqta pachak (74,600) kayarqan.

28-29Isacar trïbupitam pitsqa chunka chusku waranqa chusku pachak (54,400) kayarqan.

30-31Zabulón trïbupitam pitsqa chunka qanchis waranqa chusku pachak (57,400) kayarqan.

32-33Josépa tsurin Efraín trïbupitam chusku chunka waranqa pitsqa pachak (40,500) kayarqan.

34-35Josépa tsurin Manasés trïbupitam kimsa chunka ishkay waranqa ishkay pachak (32,200) kayarqan.

36-37Benjamín trïbupitam kimsa chunka pitsqa waranqa chusku pachak (35,400) kayarqan.

38-39Dan trïbupitam joqta chunka ishkay waranqa qanchis pachak (62,700) kayarqan.

40-41Aser trïbupitam chusku chunka waranqa pitsqa pachak (41,500) kayarqan.

42-43Neftalí trïbupitam pitsqa chunka kimsa waranqa chusku pachak (53,400) kayarqan.

44Paykunatam Moisés, Aarón y chunka ishkay mandaq Israel runakuna censayarqan. Tsay mandakuq runakunam cada trïbupita juk kayarqan.

45Paykunam censayarqan ishkay chunka (20) watayuqpita janaman. Censayanqan runakunam guërraman aywayänanpä edäninkunachöna kayarqan.

46Castanpa castanpa censayanqan runakunam joqta pachak kimsa waranqa pitsqa pachak pitsqa chunka (603,550) kayarqan.

Levitakunata mana censayanqan

47Israel runakunata censar levitakunataqa manam censayarqantsu.

48Mana censayänanpämi Moisésta Tayta Dios nirqan:

49<

50Paykunataqa churanki Pactu Tolduta y tsaychö manëjukunata shumaq cuidayänanpä. Maypa aywayaptikipis Sagrädu Tolduta y llapan manëjunkunatam paykunalla apayanqa. Tsaynöllam Sagrädu Toldu ñöpanpa jiruruypa toldunkuna shäritsiyanqa.

51Maypa aywayaptikipis paykunallam Sagrädu Tolduta paskaskir apayanqa. Mayman chäyaptikipis Sagrädu Tolduta paykunallam shäritsiyanqa. Mayqanpis levita mana kaykar Sagrädu Tolduman witirqa wanunqam.

52Wakin trïbu Israel runakunaqa bandërankuna kaqchömi toldunkuna shäritsiyanqa.

53Levitakunaqa Pactu Toldupa ñöpankunapam jiruruypa toldunkuna shäritsiyanqa. Tsaynöpam täpayanqa pipis llutalla mana yaykunanpä. Llutalla yaykuyaptinqa rabyarmi Israel runakunata castigashä>>.

54Moisésta Tayta Dios ninqannöllam Israel runakuna llapanta rurayarqan.