Nahum 3 - Bible in Quechua of South Conchucos（qxo）

1¡Allaw Nínive runakuna, kananmi musyayämanki!

Qamkunaqa runapa yawarnintam jichayarquyki.

Llullakur y runakunata wanutsirmi puriykäyanki.

Mana jamaypam suwakuyllaman churakashqa kayanki.

2Tsaynö kayanqaykipitam wiyayanki chicötikunata pashtatsiqta,

carrëtakunapa ruëdankuna büllata ruraqta,

caballukuna patatarrä cörriqta

y carrëtakuna taqrarar aywaqta.

3Tsaynöllam rikayanki caballun muntashqa soldädukuna atacayäshunqaykita,

chipipiqtarä espädankuna y lanzankuna aptashqa shamuykaqta,

atskaq runakuna malograkushqa kaykaqta,

waranqa waranqapa ayakuna jitaraykaqta

y yupaytapis mana atipaypä wanushqa runakuna kaykaqta.

Tsaynö kaptinmi mayman jaruyänaykipäpis sitiu kanqatsu.

4 Prostitüta warmi kuyayllapä kar runata engañanqannömi qamkunapis atska markakunata engañayarquyki.

Brüjukunanömi juk nación runakunatapis criyitsiyarquyki.

Tsaynö kayanqaykipitam tsay desgraciakuna päsayäshunki.

5Llapanta mandaq Tayta Diosmi niyäshunki:

<

Runakunapa puntanchö träjinta qariptin warmi penqakunqannömi qamkunapis markakunapa puntanchö penqakuyanki.

6Tsaynöllam imayka qanrawan pichukuskir runa penqakunqannö qamkunapis penqakuyanki.

7Llapan rikashuqnikikunam qeshpir niyanqa:

<¡Nínive marka pasaypa ushakashqam kaykan!

Kananqa ¿pirä tsay markata kuyapanqa?

¿Pillarä tsaychö täraq runakunata shoqanqa?>

8<

Tebas markaqa Nilo mayupa lädunchömi kaykan.

Tsay mayum markapa entëru kuchunpa tumar imayka murällanö kaykan.

9Pipis mana atacayänanpämi Etiopía y Egipto nacionkuna janan imaypis shäriyarqan.

Tsaynöllam Fut y Libia nacionkunapis Tebas markata yanapayarqan.

10Peru tsaynö kaptinpis juk nación runakuna vinciskirmi Tebas runakunata prësu apayarqan.

Wamrankunatapis toqshunkuna putsiqpämi cälli esquïnakunaman tsapiyarqan.

Tsaypitanam tsaychö kaykaq yachaq runakunata prësu apayänanpä suertiyayarqan.

Mayor runakunatapis cadinarkurmi prësu apayarqan.

11<

Contraykikuna mana tsariyäshunaykipämi pakakur puriyanki.

12Imayka hïgus muntita kuyuskatsir shushuq kaq wayuyninta mikur ushayanqannömi qamkunatapis ushayäshunki.

Poqushqa hïgus ishkinqannöllam pakakuna törrikikunapis juchur ushakäyanqa.

13Soldäduykikunapis warmi träzam kayanqa.

Punkuykikunata nina lunyar ushaptinmi uchkuraykar quëdanqa contraykikunapis yaykayämunanpä.

14<

marka murälla mas anchu kananpä pirqayaptikipis,

mituta jaruykur adöbiwan shumaq sigurayaptikipis

15markaykita rupatsirmi qamkunatapis rupatsiyäshunki.

Qeshpiq kaqtam espädawan wanutsiyäshunki.

Chakrachö plantakunata shiwri ushanqannömi qamkunatapis ushakätsiyäshunki.

Tsaynö kananpä kaykaptinqa ¡soldäduykikuna atska kayänanpä qoriyay!

¡Chukllushkuna atska kanqannö kayänaykipä qamkunapis mirayay!

16<

Peru tsaynö kaptinpis chukllushkuna shikranpita yarquskir aywakuyanqannömi paykunapis aywakuyanqa.

17Markaykita cuidaq soldädukuna y capitannikikunapis atska chukllushkunanömi kaykäyan.

Alaptin pirqachö chukllushkuna laqaräyanqannömi paykunapis kaykäyan.

Rupay yarqaskamuptin chukllushkuna pärir aywakuyanqannömi soldäduykikunapis qeshpir aywakuyanqa.

Maychö kayanqanpis manam musyakanqatsu.

18<

Mandakur yanapashuqnikikuna y soldäduykipa capitanninkunapis wanurmi ushakäyanqa.

Soldäduykikunapis jirkakunapa qeshpir aywakuyaptin manam pipis qorinanpä kanqatsu.

19Qampäqa wanuypis janaykichönam kaykan.

Qamqa pïmaytapis mana kuyapaypam ñakatsirqayki.

Tsaymi desgracia päsashunqaykita musyar pïmaypis kushipäshurniki taqllapäyäshunki>>.