2 Samuel 23 - Bible in Quechua of South Conchucos（qxo）

Davidpa ultimu kaq salmun

1Davidpa ultimu salmunmi kaynö:

Isaípa tsurin Davidmi kay cantuta qellqarqan.

Paytam Tayta Dios yanaparqan pïmaypis respitayänanpä.

Paytam rey kananpä Jacob yärakunqan Tayta Dios akrarqan.

Paymi Israel runakunapa shonqunkuna kushikunanpä cantan.

2< Espïritunmi imata parlanäpäpis tantiyatsiman.

Paypa palabranqa shimillächömi kaykan.

3Israel runakunapa Diosninmi parlapämashqa.

Tsapämaqnï Diosnintsikmi nimashqa:

y noqapita mantsapakur mandaq runaqa

4patsa waraptin atsikyaqnömi kanqa,

chipikyaypita rupay yarqamuqnömi kanqa

y qewa wiñamunanpä tamyamuqnömi kanqa>.

5Tsaymi noqapita miraqkunata Tayta Dios imaypis yanapanqa.

Tsaynö yanapananpämi noqawan pactuta rurashqa.

Pactu ruranqantaqa manam trocatsinqatsu.

Ninqankunata cumplirmi Tayta Dios imaypis salvaman.

Pay yanapamaptinmi llapan yarpanqäkunapis alli kanqa.

6Mana alli ruraqkunaqa kashakunanö jitashqa kayänanpämi kaykäyan.

Yatashqa tukshimashqam

7kashakunataqa fiërruwan o lanzawanrä wititsintsik.

Kashakuna ninachö rupar ushakanqannömi paykunapis ushakäyanqa>>.

Davidpa mas valienti kaq kimsa soldädunkuna 1 Crónicas 11.10-19

8Davidpa mas valienti kaq soldädunkunam kimsaq kayarqan. Punta kaqmi Hacmonipa tsurin Joseb-basebet karqan. Paymi tsay kimsa soldädukunapa capitannin karqan. Juk kutichömi Joseb-basebetqa lanzanwan wanutsirqan puwaq pachak (800) soldädukunata.

9Tsaypitanam Dodupa tsurin Eleazar karqan. Payqa Ahohí markapitam karqan. Eleazarpis allinnin soldädum karqan. Israel runakunawan guërrata rurayänanpä filisteo runakuna Pasdamimchö qorikäyaptinmi Eleazarpis tsaychö Davidwan kaykarqan. Peru llapan Israel soldädukuna qeshpir aywakuyaptinpis

10Eleazarmi sïqa mana mantsaypa makinchö espädapis aptakashqa quëdanqanyaq filisteo soldädukunawan pelyarqan. Vincinqanta tantiyakurmi Israel soldädukuna Eleazar kaqman kutiykur wanushqa soldädukunapa imaykankunatapis apakuyarqan. Tayta Dios tsaynö yanapaptinmi filisteo runakunata pasaypa vinciyarqan.

11Tsaynöllam Davidpa allinnin soldädun Agipa tsurin Sama karqan. Payqa Arar markapitam karqan. Juk kutim filisteo runakuna Lehichö qorikarnin lentëjas chakra chawpinchö Israel runakunata atacayarqan. Peru Israel soldädukuna qeshpir aywakuyaptinpis

12Samam sïqa tsay chakra chawpinchö filisteo soldädukunata vincirqan. Tsaynöpam Israel runakunata Tayta Dios yanaparqan filisteo runakunata vinciyänanpä.

13Tsaynöllam Davidpa wakin allinnin soldädunkunapis kayarqan. Tsay soldädukunatam Kimsa Chunka jutiwan reqiyarqan. Davidpa kimsa allinnin soldädunkunapis Kimsa Chunka kaqchömi kayarqan.

Juk kutim cosëcha witsan Adulam machaychö David pakaraykarqan. Filisteo runakunanam campamentunkuna ruraykur Refaim pampachö kaykäyarqan. Adulam machaymanmi Davidpa kimsa mas valienti kaq soldädunkuna paywan tinkuyänanpä aywayarqan.

14Belénchö juk grüpu filisteo soldädukuna kayaptinmi tsay machayman David pakakushqa karqan.

15Kimsa valienti kaq soldädunkuna chaykuyaptinmi David nirqan: <>

16Tsaynö niptinmi filisteo soldädukuna Belénchö kaykaptinpis tsay kimsa mas valienti kaq soldädukuna pakakuyllapa yaykuskir pukyupita yakuta apapäyämurqan David upunanpä. Peru yakuta chaykatsiyaptinmi David upuyta munarqantsu. Tsaypa rantinmi Tayta Diospä patsaman jichar David nirqan:

17<<¡Tayta Dios! Kay yakuta upurqa wanuytapis mana mantsaypa apamuq runakunapa yawarninta upuqnöchi kashä>>.

Tsaynö nirmi David upurqantsu. Tsay kimsa mas valienti kaq soldädukunam tsay yakutaqa Davidpä apayarqan.

Kimsa Chunka niyanqan valienti kaq soldädukuna 1 Crónicas 11.20-41

18Kimsa Chunka niyanqan valienti kaq soldädukunapa capitanninmi Sarviapa wamran Joabpa wawqin Abisai karqan. Juk kutichömi kimsa pachak (300) contran soldädukunawan pelyarnin lanzanwan llapanta Abisai wanutsirqan. Tsaynöpam kimsa valienti kaq soldädukuna respitashqa kayanqannö Abisaipis respitashqa karqan.

19Abisaiqa Kimsa Chunka niyanqan soldädukunapita mas reqishqa karmi paykunapa capitannin karqan. Tsaynö karpis manam iwalarqantsu kimsa valienti kaq soldädukunamanqa.

20Benaíapis valienti soldädum karqan. Payqa karqan Cabseel markapita Joiadapa tsurinmi. Valienti soldädu karmi Moab nacionpita pelyayta alli yachaq ishkay soldädukunata wanutsirqan. Tsaynöllam juk junaq rashtaykaptin jatun pözuman yaykuskir leonta wanutsirqan.

21Tsaynöllam Egiptupita jatunkaray runa lanzan aptashqa atacananpä kaykaptinpis Benaíaqa qeruwan wiruykällar lanzanta qechurqan. Tsaypitam tsay lanzallanwan kikinta wanuskatsirqan.

22Joiadapa tsurin Benaía tsaynö ruranqanpitam kimsa valienti kaq soldädukuna respitashqa kayanqannö paypis respitashqa karqan.

23Kimsa Chunka niyanqan soldädukunachö respitashqa karpis Benaíaqa manam iwalarqantsu kimsa valienti kaq soldädukunamanqa. Paytam cuidaqnin soldädunkunapa capitannin kananpä David churarqan.

24Kimsa Chunka niyanqan valienti kaq soldädukunam kayarqan:

Joabpa wawqin Asael;

Belén markapita Dodupa tsurin Elhanán;

25Harod markapita Sama;

Elica (paypis Harod markapitam karqan);

26Palti markapita Heles;

Tecoa markapita Iquespa tsurin Ira;

27Anatot markapita Abiezer;

Husa markapita Sibecai;

28Ahohí markapita Salmón;

Netofa markapita Maharai;

29Baanapa tsurin Heleb (paypis Netofa markapitam karqan);

Gabaa markapita Ribaipa tsurin Itai (Gabaaqa Benjamín trïbu runakuna täyanqanchömi kaykan);

30Piratón markapita Benaía;

Gaas raqrapita Hidai;

31Arba markapita Abi-albón;

Bahurim markapita Azmavet;

32Saalbón markapita Eliaba;

Jasénpa tsurin Jonatán;

33Arar markapita Sama;

Sararpa tsurin Ahíam (paypis Arar markapitam karqan);

34Maaca markapita Ahasbaipa tsurin Elifelet;

Gilo markapita Ahitofelpa tsurin Eliam;

35Carmel markapita Hezrai;

Arab markapita Paarai;

36Soba markapita Natánpa tsurin Igal;

Gat markapita Bani;

37amonita runa Selec;

Beerot markapita Naharai (paymi Sarviapa wamran Joabpa armankunata puritsir yanaparqan);

38Itri markapita Ira;

Gareb (paypis Itri markapitam karqan);

39heteo runa Urías.

Llapan tsay runakunaqa kimsa chunka qanchismi (37) kayarqan.