Salmo 71 - Bible in Quechua of South Conchucos（qxo）

Salmo 71 (70)Ruku runa Tayta Diosta mañakunqan

1 Tayta Dios, qamllamanmi yärakamü.

Runakuna penqakatsiyämänanta ama munaykullaytsu.

2Allillata ruraq kaynikiwan salvaykallämay.

Mañakamunqäta wiyaykallämay.

Juklla salvaykallämay.

3Pakakunä qaqa kaykullay.

Qammanmi imaypis amparakamü.

Salvamänaykipä kanqanta musyarmi yärakamü.

Qammi tsapämaq qaqa y amparakunä törri kanki.

4Tayta Dios, mana alli ruraq runakunapita tsapaykallämay.

Jutsasapakunapita y wanutsikuq runakunapita salvaykallämay.

5Qamman yärakamuptïmi ima desgraciapitapis tsapämanki.

Jövin kanqäpitam qamman yärakamü.

6Mamäpa pachallanchörä kaykaptïpis noqawanmi kaykarquyki.

Qammi yurinäpä permitirquyki.

Tsaymi imaypis alabashayki.

7Llapanchöpis yanapamaptikim wakinkunapis noqanö kawayta munayan.

8Poderösu kaptikim qoyay qoyay alabä.

9Rukuna kaptïpis ama qonqaykallämaytsu.

Kallpä mana kaptinpis ama jaqiykallämaytsu.

10Wanutsimayta munaqkunam qorikaykur conträ willanakuyan.

11Paykunam niyan: <

Diospis dëjashqanam.

Manam ni pipis salvanqatsu>>.

12Tayta Dios, noqapita ama witikuytsu.

Ras shamur yanapaykallämay.

13Chikimaqkunaqa penqakuypä wanutsishqa kayätsun.

Conträ shäriqkunaqa kikinkuna asipashqa kayätsun.

14Noqaqa imayyaqpis qamllatam shuyaräshayki.

Qoyay qoyay qamllatam alabashayki.

15Qoyatmi kuyapäyämar salvayämanqaykita willakushä.

Ayka kuti salvamanqaykitapis manam yupayta puëdïtsu.

16Espantaypä ruranqaykitam willakushä.

Japallayki imaypis alli ruraq kanqaykitam pïmaytapis willashä.

17Tayta Dios, jövin kanqäpitam yachatsimarquyki.

Tsaymi espantaypä ruranqaykikunata kananyaqpis willakuykä.

18Kanan witsan runakunata y paykunapita miraqkunatapis willakunä kaykanrämi.

Rukuyar soquyaptïpis ama dëjaykallämaytsu.

19Tayta Dios, manam pipis qamnö allillata ruraq kantsu.

Espantaypäkunatam rurarquyki.

Manam pipis qammanqa iwalantsu.

20Pasaypa ñakayman y llakikuyman churaskamarpis alli kawanäpä yapaymi yanapamanki.

Wanunäpäna kaykaptïpis yapaymi shäritsimanki.

21Poderyuq kanäpämi yanapamanki.

Yapaymi kushikatsimanki.

22Israel runakunapa santu Diosnin, tsaynö yanapamanqaykipitam arpakunata y salteriukunata tukar adorashayki.

Cantukunata cantarmi alabashayki.

23Salvamanqaykipitam llapan shonqüwan kushishqa alabashayki.

24Desgracia päsamänanta munaqkunaqa pasaypa penqakushqam kaykäyan.

Tsaymi alli ruraq kanqaykita imay hörapis parlaykäshä.