2 Corintios 5 - Bible in Quechua of South Conchucos（qxo）

Mushuq cuerputa chaskinantsikpä ninqan

1Musyantsikmi kay cuerpuntsik ushakaptinpis mana ushakaq mushuq cuerputa Tayta Dios qaramänantsikpä kanqanta. Kay patsachöqa cuerpuntsik ushakaq tsukllanöllam kaykan. Peru gloriachömi sïqa mushuq cuerpuntsik Tayta Dios ruranqan alli wayinöna kanqa.

2Kay patsachö kawanqantsikyaqqa mushuq cuerputa ras chaskiyta munarmi yarpachakur llakikuntsik.

3Mushuq cuerputa chaskirqa manam qallapächunötsu kashun, sinöqa alli röpashqanönam kashun.

4Kay patsachö cuerpuntsik ushakaqlla kaptin llakikurpis manam wanuytaqa munantsiktsu, sinöqa cuerpuntsik mana ushakaq cuerpuman ras tikranantam munantsik.

5Mana ushakaq cuerpuyuq kanantsikpämi Tayta Dios kamamarquntsik. Mushuq cuerputa chaskinantsikpä kanqanta musyanantsikpämi Espíritu Santuta qaramarquntsik.

6Tsaymi Tayta Diosman imaypis yärakuntsik. Musyantsikmi kay patsachö kanqantsikyaqqa Tayta Diosta manarä rikanqantsikta.

7Payta manarä rikarpis paymanmi yärakuntsik.

8Payman yärakurmi cuerpuntsikta dëjaskir puntanman ras chayta munantsik.

9Tsaymi kawarpis o wanurpis Tayta Dios munanqannö kawanantsikpä imaypis yarpachakuntsik.

10Jesucristupa puntanman chashqam llapantsikta juzgamäshun.Rom. 14.10. Kay patsachö kanqantsikyaq allita o mana allita ruranqantsikpitam premiutapis o castïgutapis chaskishun.

Tayta Dioswan runakuna amishtayänanpä willakuyanqan

11Señor Jesucristo juzgamänantsikpä kanqanta musyarmi payta mantsapakur willakuyninta imaykanöpapis willakuyä. Rasunpa sirviyanqätam Tayta Dios musyan. Tsaytaqa qamkunapis tantiyayankimanmi.

12Tsaynö nï manam yachaq kayanqäta alabakurtsu, sinöqa Tayta Diospa willakuqnin kayanqäta tantiyar kushikuyänaykipä y pipis conträ parlaptin favornï shäriyänaykipämi.

Tsay conträ shäriqkunaqa yachaq tukurpis janan shonqullam Tayta Diosta sirviyan.

13Löcu kayanqäta niyaptinpis Tayta Diosta sirviyänä raykurmi löcu nishqapis kayä. Alli yarpayyuq kayanqäta niyaptinpis qamkunata yanapayänä raykurmi alli yarpayyuq kayä.

14Imanö niyämaptinpis noqakunaqa Jesucristo kuyamanqantsikta tantiyarmi wanuytapis mana mantsaypa payta sirviyä. Jesucristo llapantsik raykur wanunqanta musyarmi tsaynö sirviyä. Noqantsik raykur wanuptinmi llapantsikpis jutsa ruraypä wanushqanöna kantsik.

15Manam kikintsik munanqallantsikta rurar kawanantsikpätsu Jesucristo wanushqa, sinöqa pay munanqannöna kawanantsikpämi. Payqa wanurpis noqantsik raykurmi kawamushqa.

16Tsaynö kaptinmi Diosman mana yärakuq runakunanöqa pipäpis llutanta yarpäyätsu. Ñöpataqa noqakunapis mana criyikuq runakunanöllam Jesucristupä llutanta yarpäyarqä. Peru kananqa manam tsaynönatsu yarpäyä.

17Pipis Jesucristuchö karqa mushuq kamanqan runanam kaykan.Gál. 6.15; Efe. 4.24; Tito 3.5; 1Ped. 1.3, 23. Unay kawayqa päsashqanam. Kananqa llapanpis mushuqnam kaykan.

18Tsaynö kanantsikpä kikin Tayta Diosmi permitishqa. Paymi Jesucristo noqantsik raykur wanunqanpita perdonamarquntsik. Tsaynöllam runakuna paywan amishtayänanpä willakuyninta willakuyänäpä churayämashqa.

19Tsay willakuymi nin: Jesucristuchömi Tayta Dios karqan runakunata jutsankunapita perdonar kikinwan amishtananpä. Tsay willakuyta willakuyänäpämi churayämashqa.

20Tsaymi noqakunaqa Jesucristupa willakuqninkuna kayä. Willakuqnin karmi Tayta Dios rugakuqnö Jesucristupa jutinchö pïmaytapis rugayä: ¡Tayta Dioswan amishtayay!

21Jutsaynaq karpis llapan jutsantsiktam Jesucristuman Tayta Dios churashqa. Tsaymi jutsayuq runanö noqantsik raykur wanuptin paychö kashqa Tayta Dios jutsaynaqtanö chaskimantsik.