Josué 21 - Bible in Quechua of South Conchucos（qxo）

Leví trïbu runakuna chaskiyanqan markakuna maychö kanqanpis 1 Crónicas 6.54-81

1Tsaypitanam Leví trïbupa mandaqninkuna Canaánchö kaykaq Silo markaman aywayarqan sacerdöti Eleazarwan, Josuéwan y Israel runakunapa wakin autoridäninkunawan parlayänanpä.

2Chaykurmi niyarqan: < Moisésta nirqan markakunata y jallqakunata rakipayämänaykipä. Tsaynöpam täyänäpä y ashmäkunata mitsikuyänäpäpis kanqa>>.

3Tsaynö niyaptinmi Tayta Dios ninqannölla Israel runakuna rakipuyarqan markakunata y jallqakunatapis.

4Puntatam suertiyarqan sacerdöti Aarónpita miraqkuna markankunata chaskiyänanpä. Aarónpita miraq Coat casta wakin runakunam chunka kimsa markakunata chaskiyarqan. Tsay markakunaqa Judá trïbu, Simeón trïbu y Benjamín trïbu chaskiyanqan herenciakunachömi karqan.

5Coat casta wakin runakunanam chunka markakunata chaskiyarqan. Tsay markakunaqa Efraín trïbu, Dan trïbu y pullan Manasés trïbu chaskiyanqan herenciakunachömi karqan.

6Tsaypitam suertiyarqan Gersón casta runakuna markankunata chaskiyänanpä. Paykunam chunka kimsa markakunata chaskiyarqan. Tsay markakunaqa Isacar trïbu, Aser trïbu, Neftalí trïbu y Basánchö kaq pullan Manasés trïbu chaskiyanqan herenciakunachömi karqan.

7Merari casta runakunanam chunka ishkay markakunata chaskiyarqan. Tsay markakunaqa karqan Rubén trïbu, Gad trïbu y Zabulón trïbu chaskiyanqan herenciakunachömi.

8Tsaymi Moisésta Tayta Dios ninqannölla Israel runakunaqa suertiyaypa Leví trïbu runakunata rakipuyarqan markakunata y cercanchö kaykaq jallqakunata ashmankunata mitsikuyänanpä.

9-10Leví trïbu Coat casta runakunapä puntata suerti yarqamuptinmi Judá trïbu runakunapa y Simeón trïbu runakunapa herencianpita markakunata rakipuyarqan.

11Tsaymi paykunata rakipuyarqan Judá trïbu runakuna täyanqan jallqakunachö Quiriat-arbata y ñöpanchö kaykaq jallqakunata ashmankunata mitsikuyänanpä. Quiriat-arbapa jukaq jutinmi Hebrón. Quiriat-arbachömi anaceo runakuna täyarqan.

12Peru Quiriat-arbapita mas washa läduchö kaykaq jallqakunatawan caseriunkunatam sïqa Jefonipa tsurin Calebta herencian kananpä Josué entregarqan.

13Sacerdöti Aarónpita miraq runakuna chaskiyanqan Hebrón markam karqan runa mayinta mana yarpaypa wanutsiq runakuna pakakuyänanpä. Tsaynöllam chaskiyarqan Libnata,

14Jatirta, Estemoata,

15Holónta, Debirta,

16Aínta, Jutata y Bet-semesta. Tsaymi Judá trïbupita y Simeón trïbupita isqun markakunata chaskiyarqan. Cada markapam mitsikuyänanpä jallqankuna karqan.

17Benjamín trïbupitam chaskiyarqan Gabaónta, Gebata,

18Anatotta y Almónta. Tsaymi Benjamín trïbupita chusku markakunata chaskiyarqan. Cada markapam mitsikuyänanpä jallqankuna karqan.

19Tsaynöpam Aarónpita miraq sacerdötikuna chunka kimsa markakunata jallqakunatawan chaskiyarqan.

20Coat casta wakin Leví trïbu runakunanam Efraín trïbu chaskinqan herenciachö markankunata chaskiyarqan.

21Paykunam chaskiyarqan Efraín jallqakunachö kaykaq Siquemta. Siquemqa runa mayinta mana yarpaypa wanutsiq runakuna pakakuyänanpä markam karqan. Tsaynöllam Gezerta,

22Kibsaimta y Bet-horónta chaskiyarqan. Tsay chusku markakunapam mitsikuyänanpä jallqankuna karqan.

23Dan trïbupitam Eltequita, Gibetónta,

24Ajalónta y Gat-rimónta chaskiyarqan. Tsay chusku markakunapam mitsikuyänanpä jallqankuna karqan.

25Pullan Manasés trïbupitam Taanacta y Gat-rimónta chaskiyarqan. Tsay ishkay markakunapam mitsikuyänanpä jallqankuna karqan.

26Tsaynöpam Coat casta wakin Leví trïbu runakuna chunka markakunata jallqakunatawan chaskiyarqan.

27Gersón casta Leví trïbu runakuna pullan Manasés trïbupitam Basánchö kaykaq Golánta y Beesterata chaskiyarqan. Golánqa runa mayinta mana yarpaypa wanutsiq runakuna pakakuyänanpä markam karqan. Tsay ishkay markakunapam mitsikuyänanpä jallqankuna karqan.

28Isacar trïbupitam Cisónta, Daberatta,

29Jarmutta y En-ganimta chaskiyarqan. Tsay chusku markakunapam mitsikuyänanpä jallqankuna karqan.

30Aser trïbupitam Misaelta, Abdónta,

31Helcatta y Rehobta chaskiyarqan. Tsay chusku markakunapam mitsikuyänanpä jallqankuna karqan.

32Neftalí trïbupitam Galileachö kaykaq Cedesta, Hamot-dorta y Cartánta chaskiyarqan. Cedesqa runa mayinta mana yarpaypa wanutsiq runakuna pakakuyänanpä markam karqan. Tsay kimsa markakunapam mitsikuyänanpä jallqankuna karqan.

33Tsaynöpam Gersón casta Leví trïbu runakuna chunka kimsa markakunata jallqakunatawan chaskiyarqan.

34Leví trïbu runakunapam ultimu kaq castankuna Merari casta kayarqan. Merari casta runakuna Zabulón trïbupitam Jocneamta, Cartánta,

35Dimnata y Naalal markankunata chaskiyarqan. Tsay chusku markakunapam mitsikuyänanpä jallqankuna karqan.

36Rubén trïbupitam Beserta, Jahazata,

37Cademotta y Mefaatta chaskiyarqan. Tsay chusku markakunapam mitsikuyänanpä jallqankuna karqan.

38Gad trïbupitam Galaadchö kaykaq Ramot markata chaskiyarqan. Ramotqa runa mayinta mana yarpaypa wanutsiq runakuna pakakuyänanpä markam karqan. Tsaynöllam Mahanaimta,

39Hesbónta y Jazertapis chaskiyarqan. Tsay chusku markakunapam mitsikuyänanpä jallqankuna karqan.

40Tsaynöpam Merari casta Leví trïbu runakuna chunka ishkay markakunata chaskiyarqan.

41Israel runakunapa herencianchö Leví trïbu runakuna chaskiyanqan markakuna chusku chunka puwaqmi (48) karqan.

42Tsay markakunapa cercanchömi jallqankunatapis chaskiyarqan.

Tayta Dios awninqanta cumplinqan

43Tsaynömi Israel runakunata Tayta Dios herenciankunata entregarqan unay castankunata awninqannölla. Tsaymi Israel runakuna yaykur tsaychöna täyarqan.

44Tayta Dios yanapaptinmi contran runakuna imanöpapis pärapuyta puëdiyarqantsu. Tsaynöpam Abrahamta, Isaacta y Jacobta Tayta Dios unay awninqannö Israel runakuna tranquïluna täkuyarqan.

45Israel runakunata awninqantaqa llapantam mana qonqaypa Tayta Dios cumplirqan.