Salmo 72 - Bible in Quechua of South Conchucos（qxo）

Salmo 72 (71)Mandaq reypä Tayta Diosta mañakunqan 1a (1a) Salomón qellqanqan salmu.

1 1 (1b) Tayta Dios, munanqaykinö mandananpä reyta yanapaykullay.

Pipapis janan mana shäriypa juzgananpä tantiyaykatsillay.

2Tsaynö yanapaptikim kuyanqayki runakunata alli mandanqa.

Pobrikunapäpis justicia kanqam.

3Tsaymi may jirkachö täraqkunapis kushishqa kawayanqa.

4Yanapaptikim pobrikunapä justiciata ruranqa, pobrikunapa tsurinkunata salvanqa y ñakatsiqkunata ushakätsinqa.

5Mandaq rey imayyaqpis kawaykullätsun.

Rupay y killa mana ushakaq kanqannö mandaq kayninpis mana ushakaq kaykullätsun.

6Murukuypä y qewapä tamyapis shullyapis bendición kanqannö pïmaypäpis bendición kaykullätsun.

7Alli mandaptin llapanpis tranquïlu kawayätsun.

Ciëluchö killa ushakanqanyaq imayyaqpis mandaykullätsun.

8Lamarpa kuchunpita jukaq kuchunyaq mandaykullätsun.

Éufrates mayupita entëru munduyaq mandaykullätsun.

9Desiertuchö täraq contrankunapis paypa puntanman qonqurikuyätsun.

10Maytsay nacionpita reykuna shamur qaraykunata apayämutsun.

Tarsis nacionpita, lamar tsimpanchö kaq nacionkunapita, Sabá nacionpita y Seba nacionpitapis qaraykunata aparkur shayämutsun.

11Llapan reykuna puntanman qonqurikuyätsun.

Llapan nacionchö täraq runakunapis payta sirviyätsun.

12Reyqa pobrikuna mañakuptinmi yanapanqa.

Pïninpis mana kaqkunapämi janan shärinqa.

13Humildikunatam kuyapanqa.

Wanutsiyänanpä kaykaptinmi pobrikunata salvanqa.

14Ñakatsiq runakunapa makinpitam jipinqa.

Maqakuq runakunapitam salvanqa.

Ñakaychö kaykaq runakunataqa pasaypam kuyan.

15Reyqa atska wata kawaykullätsun.

Sabá nacionpita qorita apayämutsun.

Tayta Diosta imaypis paypä mañakuyätsun.

Pïmaypis payta alabayätsun.

16Mandanqan nacionchö trïgu shumaq wayuykullätsun.

Entëru jirkakunachöpis kichkiyparä kaykullätsun.

Líbanuchönörä lloqlluypa lloqllur wiñaykullätsun.

Runakunapis lluta jachakunanörä atskaman mirayätsun.

17Rey allita ruranqankunata imaypis yarparäyätsun.

Alli rey kanqanta ama qonqayätsuntsu.

Llapan nacionkunapis paypita bendicionta chaskiyätsun.

Maytsaychöpis payta alabayätsun.

18Israel runakunata kuyaq Tayta Dios alabashqa kaykullätsun.

Payllam imaykatapis mantsariypä kaqkunata ruran.

19Imayyaqpis alabashqa kaykullätsun.

Poderösu kanqanta entëru kay patsachö pïmaypis musyayätsun.

¡Amén y amén!

20Kaychömi ushan Isaípa tsurin David Tayta Diosta mañakur alabanqan.