Nehemías 3 - Bible in Quechua of South Conchucos（qxo）

Jerusalén murällata allitsayta qallaykuyanqan

1Tsaypitanam mandaq sacerdöti Eliasib sacerdöti mayinkunawan qorikaykur Üsha jutiyuq punkuta allitsayarqan. Marcunkunata churaskirnam punkukunata churayarqan. Murällatam allitsayarqan Pachak jutiyuq törripita hasta Hananeel törriyaq.

2Tsaypita sïguiq murällatanam Jericó marka runakuna allitsayarqan.

Tsaypita kaqtanam Imripa tsurin Zacur allitsarqan.

3Senaapita miraq runakunanam Pescädu jutiyuq punkuta allitsayarqan. Marcunkunata churaskirmi punkukunata churayarqan. Tsaypitanam cerröjunkunata y trancankunata churayarqan.

4Pescädü jutiyuq punkupitanam Meremot allitsarqan. Payqa Uríaspa tsurin y Cospa willkanmi karqan.

Tsaypita kaqtanam Mesulam allitsarqan. Payqa Berequíaspa tsurin y Mesezabeelpa willkanmi karqan.

Tsaypita sïguiq murällatanam Baanapa tsurin Sadoc allitsarqan.

5Tsaypita kaqtanam Tecoa marka runakuna allitsayarqan. Peru respitashqa mayor Tecoa runakunaqa manam yanapayta munayarqantsu.

6Jesaná punkutanam Paseahpa tsurin Joiada y Besodíaspa tsurin Mesulam allitsayarqan. Marcunkunata churaskatsirmi punkukunata churatsiyarqan. Churaskatsirmi cerröjunkunata y trancankunata churayarqan.

7Tsaypita sïguiq murällatanam Gabaón runa Melatías y Meronot runa Jadón allitsayarqan. Paykunawanmi Gabaón runakunawan Mizpa runakunapis aruyarqan. Gabaón y Mizpa markakunam kayarqan Éufrates mayu kay tsimpan provinciapa gobernadornin mandanqanchö.

8Tsaypita sïguiq murällatanam Harhaíapa tsurin Uziel allitsarqan. Payqa yuraq qellay fundiqmi karqan.

Tsaypita sïguiq kaqtanam Hananías allitsarqan. Payqa perfümi ruraqmi karqan. Tsaynöpam Jerusalén murällata hasta Anchu Pirqa ninqanyaq allitsayarqan.

9Tsaypita sïguiq murällatanam Hurpa tsurin Refaías allitsarqan. Payqa pullan Jerusalén distrïtupa gobernadorninmi karqan.

10Tsaypita sïguiq murällatanam Harumafpa tsurin Jedaías allitsarqan. Allitsanqan murällaqa wayin frentinpam karqan.

Tsaypita sïguiq murällatanam Hasabníaspa tsurin Hatús allitsarqan.

11Tsaypita sïguiq murällatanam Harimpa tsurin Malquías y Pahat-moabpa tsurin Hasubna allitsayarqan. Paykunam allitsayarqan Jornu jutiyuq törritapis.

12Tsaypita sïguiq murällatanam Halohespa tsurin Salum allitsarqan. Salumqa pullan Jerusalén distrïtupa gobernadorninmi karqan. Payqa warmi tsurinkunawanmi murällata allitsayarqan.

13Raqra jutiyuq punkutanam Zanoa runakunawan Hanún allitsarqan. Punkukunata churaskirnam cerröjunkunatawan trancankunata churayarqan. Murällatanam pirqayarqan chusku pachak pitsqa chunka (450) metru larguta hasta Basüra Jitakuna punkuyaq.

14Recabpa tsurin Malquíasnam Basüra Jitakuna jutiyuq punkuta allitsarqan. Malquíasqa Bet-haquerem distrïtupa gobernadorninmi karqan. Punkukunata churaskatsirmi cerröjunkunatawan trancankunata churarqan.

15Colhozipa tsurin Salumnam Pukyu jutiyuq punkuta allitsatsirnin qatatsirqan. Salumqa Mizpa distrïtupa gobernadorninmi karqan. Punkunkunata churaskatsirmi cerröjunkunata y trancankunata churarqan. Tsaypitanam tsay punku jananta qatayarqan. Tsaynöllam reypa jardinnin lädunchö kaykaq Siloé estanqui lädupa päsaq murällantapis allitsarqan. Tsay murällataqa Davidpa Markan niyanqan partipita urämuna grädayaqmi allitsarqan.

16Tsaypita sïguiq murällatanam Azbucpa tsurin Nehemías allitsarqan. Payqa pullan Bet-sur distrïtupa gobernadorninmi karqan. Pay allitsarqan hasta David casta kaqkuna pamparaykanqan panteón frentinyaqmi. Tsaychömi yaku qorikuna pözu y soldädukunapa cuartelninpis kaykan.

Jerusalén murällata levitakuna allitsayanqan

17Tsaypitanam levitakuna murällata allitsayarqan. Tsay levitakunam kayarqan:

Banipa tsurin Rehum,

Hasabías (Payqa Rehum allitsanqanpita sïguiq murällatam allitsarqan. Hasabíasqa pullan Keila distrïtupa gobernadornin karmi tsay distrïtu runakunapa jutinchö allitsarqan);

18Henadadpa tsurin Bavai (Payqa Hasabías allitsanqanpita sïguiq murällatam allitsarqan. Bavaiqa karqan pullan kaq Keila distrïtupa gobernadorninmi);

19Josuépa tsurin Ezer (Payqa Bavai allitsanqanpita sïguiq murällatam allitsarqan. Ezerqa Mizpa markapa gobernadorninmi karqan. Paymi allitsarqan guërra armakuna churaränan wayiman witsänan frentinpa. Tsaychömi murällapa esquïnan kaykan);

20Zabaipa tsurin Baruc (Payqa Ezer allitsanqanpita sïguiq murällatam kushishqa allitsarqan. Tsayqa karqan esquïnapita hasta mandaq sacerdöti Eliasibpa wayin punkuyaqmi);

21y Uríaspa tsurin Meremot (Payqa Baruc allitsanqanpita sïguiq murällatam Eliasibpa wayin punkunpita hasta wayin esquïnayaq allitsarqan. Meremotqa Cospa willkanmi karqan).

Jerusalén murällata sacerdötikuna allitsayanqan

22Tsaypita sïguiq murällatanam Jerusalén ñöpankunachö täraq sacerdötikuna allitsayarqan. Tsay sacerdötikunam karqan:

23Benjamín y Hasub (Paykunaqa wayin frentinpa sïguiq murällatam allitsayarqan);

Maasíaspa tsurin Azarías (Payqa Ananíaspa willkanmi karqan. Payqa kikinpa wayin frentinpam allitsarqan);

24Henadadpa tsurin Binúi (Payqa Azaríaspa wayinpita murälla esquïnanyaqmi allitsarqan);

25Uzaipa tsurin Palal (Payqa allitsarqan esquïnapitam. Tsaynöllam allitsarqan reypa wayinchö kaykaq jatun törritam. Tsay törriqa karqan cárcel punku cercanchömi);

Faruspa tsurin Pedaías

26y Ofel barriuchö täraq runakuna (Paykunam murällata allitsayarqan hasta Yaku jutiyuq punku frentinyaq. Tsay punkuqa rupay yarqamun kaq läduchömi karqan. Tsaynöllam allitsayarqan tsaychö kaykaq jatun törrita. Tsay allitsaq runakunaqa templuchö aruq runakunam kayarqan).

Jerusalén murällata wakin runakuna allitsayanqan

27Tsaypita sïguiq murällatanam Tecoa runakunana jatun törri frentinpita hasta Ofel murälla tinkuqyaq allitsayarqan.

28Caballukuna jutiyuq punkupita qallaykurnam sacerdötikuna cada ünunkuna wayin frentinkunapa kaykaq murällata allitsayarqan.

29Tsaypita sïguiqtanam Imerpa tsurin Sadoc allitsarqan. Pay allitsanqanqa wayin frentinpam karqan.

Tsaypita sïguiq murällatanam Secaníaspa tsurin Semaías allitsarqan. Payqa kaykan templu punku cuidaqmi. Cuidanqan punkuqa rupay yarqamunan kaq läduchömi kaykan.

30Tsaypita sïguiq kaqtanam Selemíaspa tsurin Hananíaswan Hanún allitsayarqan. Hanúnqa Salafpa joqta kaq tsurinmi karqan.

Tsaypita sïguiq kaqtanam Berequíaspa tsurin Mesulam allitsarqan. Pay allitsanqanqa wayin frentinchömi karqan.

31Tsaypita sïguiq murällatanam qellay fundiq Malquías allitsarqan hasta templuchö aruqkunapa y negociantikunapa wayin kaykanqanyaq. Tsay wayiqa Qorikäyänan jutiyuq punku frentinchömi karqan. Tsaynöllam rikachakuna wayi kanqan esquïnachömi karqan.

32Tsaypita sïguiq murällatam qellay fundiqkuna y negociantikuna hasta Üshakuna jutiyuq punkuyaq allitsayarqan.