Salmo 101 - Bible in Quechua of South Conchucos（qxo）

Salmo 101 (100)Tayta Diosta mandaq rey promitinqan 1a (1a) David qellqanqan salmu.

1 1 (1b) Kuyakuq kanqaykipitam alabashayki.

Llapantapis allillata ruranqaykipitam alabashayki.

Tayta Dios, qamllatam alabashayki.

2Munanqaykinömi kawayta munä.

¡Imayrä shamunki yanapamänaykipä!

Mandanqä palaciüchöpis allita rurarmi kawashä.

3Mana allikunataqa manam rikaytapis munätsu.

Jutsa ruraqkunamanqa manam witipäshätsu.

Paykuna witipäyämänantapis manam munashätsu.

4Mana alli yarpaykuna shamuptinpis manam cäsushätsu.

Manam imaypis jutsata rurashänatsu.

5Vecïnunpa wasan rimaqkunatapis upällatsishämi.

Runa tukuqkunataqa manam chaskishätsu.

6Cäsushuqniki runakunallatam yanapayämänanpä churashä.

Jutsaynaqkunallam sirviyämanqa.

7Engañakuqkunataqa palaciüman manam chaskishätsu.

Llullakuqkunapis ñöpäman manam witiyämunqatsu.

8Cada wäray juzgarmi mana alli ruraq runakuna wanutsishqa kayänanpä nishä.

Tayta Dios akranqan markapitam paykunata illakätsishä.