Salmo 5 - Bible in Quechua of South Conchucos（qxo）

Salmo 5Tsapänanpä Tayta Diosta mañakunqan 1 (1) Cantaqkunapa mandaqninpämi. Kënata tukar cantayanki. David qellqanqan salmo.

1 1 (2) Tayta Dios, mañakamunqäta wiyaykallämay.

Shonqullächö rugakamuptïpis wiyaykallämay.

2 2 (3) Llakikur mañakamunqäta cäsuykallämay.

Qammi mandamaqnï rey y Diosnï kanki.

Qamllatam imaypis mañakushayki.

3 3 (4) Tsaka tsakallam qamman mañakamü.

Wäray wärayllam qamman rugakamü.

Mañakamunqäta contestamänaykitam shuyä.

4 4 (5) Taytay, runakuna mana allita rurayaptin manam kushikunkitsu.

Jutsata rurar kawaq runakunataqa manam puntaykimanpis chaskinkitsu.

5 5 (6) Orgullösu kaqkunataqa manam rikaytapis munankitsu.

Llutan ruraq runakunataqa chikinkim.

6 6 (7) Llullakuqkunataqa ushakätsinkim.

Engañakuq y wanutsikuqkunataqa manam chaskinkitsu.

7 7 (8) Peru noqatam sïqa kuyapäkuq kar wayikiman yaykamunäpä chaskimanki.

Sagrädu templuyki lädupa rikaykamurmi llapan shonqüwan adorashayki.

8 8 (9) Tayta Dios, allita ruraq kar conträkunapita tsapaykallämay.

Munanqaykinö kawanäpä alli nänipa pushaykallämay.

9 9 (10) Chikimaqnïkunaqa manam rasun kaqta imaypis parlayantsu.

Shonqunkunachöpis jutsa rurayllapämi yarparaykäyan.

Shiminkunapis kicharaykaq sepultüranömi.

Llullakuytaqa imaykanöpam yachayan.

10 10 (11) Tayta Dios, paykunataqa castigaykullay.

Llutan yarpayninkunata manakaqman churaykullay.

Paykunaqa contraykim kaykäyan.

Mana wiyakur jutsata rurayanqanpita mañakuyäshuptikipis ama cäsuytsu.

11 11 (12) Qamman yärakamuqkunaqa kushikuyätsun.

Alli cuidanqaykipita imaypis alabaykuyälläshuy.

Kuyashuqnikikunaqa imaypis kushishqa kawayätsun.

12 12 (13) Tayta Dios, qam munanqaykinö kawaq runakunamanmi bendicionnikita churanki.

Paykunata kuyaparmi imayka escüdunö kaykanki.