Salmo 31 - Bible in Quechua of South Conchucos（qxo）

Salmo 31 (30)Tayta Diosllaman yärakunqan 1 (1) Cantaqkunapa mandaqninpämi. David qellqanqan salmu.

1 1 (2) Tayta Dios, qamllamanmi yärakamü.

Runakuna penqakatsiyämänanta ama munaykullaytsu.

Allillata ruraq kaynikiwan salvaykallämay.

2 2 (3) Mañakamunqäta wiyaykallämay.

Juklla salvaykallämay.

Jatun ruminö tsapaykallämay.

Pakakuna machaynö salvaykallämay.

3 3 (4) Qammi tsapämaq qaqa kanki.

Qammi amparakunä törri kanki.

Ima peligrupitapis tsapaykallämay.

Promitimanqaykinö salvaykallämay.

4 4 (5) Conträkuna trampata churapäyämanqanpita salvaykallämay.

Qamllam cuidamaqnï kanki.

5 5 (6) Makikimanmi almäta churaykamü.

Awninqaykita cumpliq Tayta Dios, salvaykallämay.

6 6 (7) Ïdulukunaman yärakuqkunatam chikï.

Tayta Dios, qamllamanmi yärakamü.

7 7 (8) Kuyamanqaykita tantiyarmi pasaypa kushikü.

Kuyamarmi imanö llakikunqätapis rikamarquyki.

Imanö ñakanqätam musyanki.

8 8 (9) Conträkunapa makinmanqa manam dëjamarquykitsu.

Tranquïlu kawanäpämi salvamarquyki.

9 9 (10) Tayta Dios, pasaypa llakikuychö kaptï kuyapaykallämay.

Waqaychö kaptïmi ñawïpis ñawinatsu.

Shonqüpis manam shonqunatsu.

10 10 (11) Wata wata waqaywanmi chipyaqna aywapakaskï.

Llakikuywanmi kallpäpis ushakan.

Entëru tullükunam chipyaq qotukashqa.

11 11 (12) Conträkunapis pasaypam despreciayäman.

Vecïnükunapis pasaypam asipäyäman.

Reqinakunqäkunapis noqawan tinkuyta manam munayantsu.

Cällichö rikaskamarpis jukläpam tumaskiyan.

12 12 (13) Wanushqatanömi chipyaq qonqayämashqa.

Imayka pakishqa uyllutanömi rikayäman.

13 13 (14) Conträ karmi llapanpis wasäta rimar puriyan.

Maypa aywarpis mantsa mantsallam purï.

Llapanpis wanutsiyämänanpämi willanakuyan.

14 14 (15) Tayta Dios, qamllamanmi yärakamü.

Tsaymi noqa nï: <>.

15 15 (16) Qampa makikichömi kaykä.

Conträkuna qatikachäyämanqanpita salvaykallämay.

16 16 (17) Kuyapämar salvaykallämay.

Noqaqa qampa sirviqnikim kä.

17 17 (18) Tayta Dios, qammanmi qayakamü.

Penqakuychö mana kanäpä ama dëjaykallämaytsu.

Mana alli runakunataqa penqakuyman churaykullay.

Paykunataqa llapanta ushakaykatsillay.

18 18 (19) Jutsaynaq runata asiparmi contran parlayan.

Tsaynö parlaqkunataqa llapanta ushakaykatsillay.

19 19 (20) ¡Tayta Dios, pasaypa kuyakuqmi kanki!

Mantsapakushuqnikikunapämi imayka tesörutanö kuyakuynikita churaraykätsinki.

Tsaytam runakuna rikananchö qamman yärakamuqkunata aypunki.

20 20 (21) Kikiki compañarmi runakuna contran shäriyaptin salvanki.

Contran shärir willanakuyaptinpis imapis mana päsananpämi tsapanki.

21 21 (22) Tayta Dios alabashqa kaykullätsun.

Pasaypa ñakaychö kanqä höram kuyapäkuq kar yanapamashqa.

22 22 (23) Alläpa llakikuychö karmi dëjamanqaykita yarparqä.

Peru mañakamunqäta wiyarmi yanapamarquyki.

23 23 (24) Tayta Diosman yärakuqkuna, llapayki payta kuyayay.

Payta cäsuqkunataqa imaypis cuidanmi.

Peru allish tukuqkunatam sïqa imanöpis kawayanqanman castigan.

24 24 (25) Tayta Diosman yärakuqkuna, mana dëjaypa imaypis payman yärakuyay.