APOCALIPSIS 22 - Quichua Chimborazo Bible

1Chai q'uipaca causaita cuj, chuyajlla jatun yacutami angelca ricuchirca. Chai yacuca Diospajpish, Ovejapajpish jatun tiyarinamantami cristal shina achijnicuj llujshicurca.

2Pueblopi tiyaj jatun ñan chaupitapish, jatun yacu ishqui lado uritapish huatapi chunga ishqui cutin p'ucuj, causaita cuj yurami tiyarca. Chai yuraca quillanta quillantami p'ucurca, p'angacunapish tucui llajtacunapi causajcunata alliyachij jambimi carca.

3Chaipica mana alli nishca canaca ñami tucurishca canga. Chaipica Diospajpish, Ovejapajpish jatun tiyarinallami canga. Paipajta rurajcunaca paipajllatami rurangacuna.

4Paitaca, ñahui ñahuimi ricungacuna. Paipaj shutitapish, paicunapaj frentepi churashcami canga.

5Chaipica, tutaca mana tiyangachu. Mandaj Taita Dios paicunata achijyachishcamanta achijyachij lamparatapish, intitapish ña mana minishtingacunachu. Paihuanmi huiñai huiñaita mandangacuna.

Cristo shamunaca c'uchullapimi

6Chai q'uipami angelca cashna nirca: “Caicunaca ima shina cashcataj pajtana mana llulla shimicunami. Profetacunaman huillachij Mandaj Taita Diosllatajmi pai huillachishcacunaca ñalla pajtana cashcata paipajta rurajcunaman ricuchichun, paipaj angelta cacharca.

7¡Riquichij ñallami shamusha! Imalla tucuna cashcata Dios huillachishcata cai libropi quillcashcata cazujca alli nishcami canga ninmi” nircami.

8Ñucaca Juanmi cani. Ñucami caicunataca uyarcani, ricurcani. Chashna uyashca, ricushca q'uipaca ñucaman ricuchij angelta adorasha nishpami paipaj ñaupajpi cumurircani.

9Chaipimi paica: “¡Riqui, ama chashna ruraichu! Ñucapish can shina, cambaj huauqui profetacuna shina, cai libropi quillcashcata tucui cazujcuna shinallataj Diospajta rurajllami cani. ¡Diosta adorai!” nircami.

10Cashnapish nircami: Imalla tucuna cashcata Dios huillachishcata cai libropi quillcashcataca ama pacangui. Caicunaca ñallami pajtanga.

11Cashcata mana rurajca, chashnallataj ruracuchunlla, mapata rurajca ashtahuan mapata ruracuchunlla. Cashcata rurajpish ashtahuan cashcata ruracuchunlla, jucha illajlla cajpish ashtahuan jucha illajlla tucucuchunlla.

12¡Riqui ñallami shamusha! Tucuicunaman imallata rurashca shinallataj japina cashcata cungapaj apashpami shamusha.

13Callari A, tucuri Z shina ñucami callarichijpish, tucurichijpish cani.

14Causaita cuj yuramanta japinata charingapaj, puebloman pungucunata yaicungapajpish churanacunata tajshajcunaca alli nishcacunami.

15Ashtahuanpish allcucunaca, brujocunaca, huainayajcunaca, huañuchijcunaca, rurashcalla dioscunata adorajcunaca, llullaj canata c'uyashpa llullajcunaca, tucuicunami canllapi saquiringacuna.

16“Ñucaca Jesusmi cani. Tandanacushca tucui crijcunaman caicunata huillachunmi, ñuca angelta cacharcani. Ñucaca Davidpaj sapimi cani. Paipaj huahuacunapajpish huahuami cani. Ñucaca pacarinapaj llujshij achijlla luzeromi cani”.

17Espiritupish, Ovejapaj huarmipish: “¡Shamui!” ninmi. Maijanpish caita uyajpish: “¡Shamui!” nichun. Maijanpish yacunachicujca ubyasha nishpaca imata mana cushpa causaita cuj yacuta ubyachunlla.

18Imalla tucuna cashcata huillashcata cai libropi quillcashcacunata uyajcunataca cashnami nini: Maijanpish cai huillashcacunata mirachijpica, Diosca cai libropi pai quillcachishca tiyacuj llaquicunatami paipajmanca cachanga.

19Chashnallataj imalla tucuna cashcata huillashcata cai libropi quillcachishcata maijanpish anchuchijtaca causanaman rinata ricuchij libromantapish, Diospajlla caj pueblomantapish, cai libropi imallata charina cashcata quillcachishcatapishmi paipajtaca Diosca anchuchinga.

20Cai tucuita huillajpish: “Ari, ñami shamugrini” ninmi.

¡Chashnataj cachun! ¡Shamuilla, Mandaj Jesús!

21Ñucanchijta Mandaj Jesucristopaj mana c'uyaipajta c'uyaj canaca tucui cancunahuan cashca cachun. Chashna cachun.