2 CRÓNICAS 20 - Quichua Chimborazo Bible

Josafatca moabitacunatapish amonitacunatapish mishashcami

1Chai q'uipami Moabpi causajcunapish Amonpi causajcunapish chai Amón llajtallapitaj causaj shujtajcunapish tandanacushpa Josafathuan macanacunaman shamurcacuna.

2Chaitaca shujtajcunami Josafatmanca, cashna nishpa huillagrircacuna: “Cachisapa Cucha ch'imbanijmantapish, Siria llajtamantapishmari canhuan macanacungapaj yallitaj achcacuna shamushca. Tucui paicunaca Hazezon-tamar nishca En-gadi pueblopimi tiyacuncuna” nishpami huillarcacuna.

3Chaita huillajpica Josafatca manchashpami, Mandaj Diosman huillangapaj shunguhuantaj llaquirirca. Chashna llaquirishpaca, tucui Judá llajtapi causajcunamanmi mana micushpa Diosta mañachun huillajcunata cacharca.

4Chashna huillajpica, Judá llajtapi causajcunaca tandanacushpami, Mandaj Diostaca ayudahuai nishpa mañarcacuna. Shinallataj tucui Judá llajta pueblocunapi causajcunapishmi, Mandaj Diostaca ayudahuai nishpa mañangapaj Jerusalenman shamurcacuna.

5Josafatca, Judá llajtamanta shamushpa tandanacushcacunapaj ñaupajpipish, Jerusalenllapitaj causajcunapaj ñaupajpipishmi, Mandaj Diospaj huasi mushuj patiopi shayarirca.

6Chaipi shayarishpami cashna nirca: “Ñucanchij yayacunata Mandaj Taita Dioslla, canca jahua pachapi causaj Diosmari cangui. Canmari tucui llajtacunata mandajcunandij cambaj maquipi charicungui. Mishana fuerzaca cambaj maquipimari, canhuanca pi mana shayari tucunchu.

7Ñucanchij Dioslla, canmari cai llajtapi causajcunataca, can agllashca israelcunapaj ñaupajpi shamushpa cai llajtamanta llujshichishpa cachashcangui. Chashna rurashpaca cai llajtataca, cutinca ama shujtajcunapaj cachunmi canhuan alli apanacuj Abrahampaj huahua huahua israelcunaman cushcangui.

8Chaimantami cai llajtapi causashcacuna. Shinallataj canta yuyarinapajmi cai huasita shayachishpa cashna nishcacuna:

9Ñucanchijpaj ima llaqui shamungachari, mana cashpaca imamanta llaquichingapaj shujtajcunata espadahuan cachangachari, mana cashpaca ima ungüita, mana cashpaca yaricaita cachangachari. Chashna cajpica can caipi cashcamantaca, (cai huasimanmi) cambaj ñaupajman shamushun. Caiman shamushpami, llaquipi cashcamanta caparishpa mañashun. Chashna mañajpica, can uyashpa, chai llaquicunamanta llujshichinguimi nishcacunami.

10Chaimanta cunanca canllataj ricunguimi. Amonpi, Moabpi causajcunapish, Seir urcupi causajcunapishmi shamushcacuna. Egiptomanta israelcuna shamucujpica, chaicunapaj llajtata pasachunca mana munashcachu carcangui. Ashtahuanpish paicunamanta caruta rishpa, ama llaquichichunmi mandashca carcangui.

11Chashna allita rurashcamantaca, cunanca mana allitamari cutichincuna. Ñucanchijpaj cachun can cushca cai llajtamanta llujshichishpa cachangapajmari shamushcacuna.

12Ñucanchij Dioslla, paicuna chashna rurashcamantaca, can llaquichiyari. Chai tucui achcacunami ñucanchijhuan macanacungapaj shamushcacuna, ñucanchijca chai tucuicunahuanca mana shayari tucunchijchu. Imatapish mana rurai tucunchijchu. Ashtahuanpish canllatami chaparacunchij” nircami.

13Tucui Judá llajtapi causajcunami Mandaj Diospaj ñaupajpi paicunapaj huarmicunandij, uchilla huahuacunandij, jatun huambracunandij shayacurcacuna.

14Zacariaspaj churi Jahazielpish chaipimi carca. Zacariaspaj yayaca Benaiami carca. Benaiapaj yayaca Jeielmi. Jeielpaj yayaca Mataniasmi carca. Paica Asaf shuti levitapaj huahua huahuapurami carca. Chai Jahazieltami chai tandanacuipica, Mandaj Diospaj Espíritu japirca.

15Chaimantami cashna nirca: “Tucui Judá llajtapi causajcunapish, cai Jerusalenpi causajcunapish, can jatun mandaj Josafatpish caita uyaichij: Mandaj Diosca cashnami nin: Chai tucui achcacunata ricushpapish ama manchaichijchu, ama chujchuichijchu. Cai macanacuipica, mana cancuna macanacugringuichijchu, ñucamari macanacugrini.

16Paicunahuan shayarinaman caya uriyanguichij. Paicunaca Sis nishca huichitami huichiyangacuna. Jeruel shuti shitashca pamba uranij huaicupimi tupanguichij.

17Cunanpica mana cancuna macanacunachu canguichij, ashtahuanpish casijlla shayanguichijlla. Chashnami ñucataj cancunata quishpichijta ricunguichij. Judá llajtapi causajcunapish, Jerusalenpi causajcunapish ama manchaichijchu, ama huashayaichijchu. Cayataj tupanaman llujshichij. Mandaj Dios ñucatajmi cancunahuan casha ninmi” nircami.

18Chashna nijpimi Josafatca, Mandaj Diospaj ñaupajpica pambaman tupajta cumurirca. Shinallataj tucui Judá llajtamanta tandanacushcacunapish, Jerusalenpi causajcunapishmi chashnallataj pambaman tupajta cumurishpa, Mandaj Diosta jatunyachircacuna.

19Chashnallataj Coatpaj huahua huahuapura levitacunahuan, Corepaj huahua huahuapura levitacunahuan jatarishpami, israelcunata Mandaj Taita Diostaca, cunga pajtashcata caparishpa alabarcacuna.

20Chai cayandij tutamanta jatarishpaca, Judá llajtamanta tandanacushcacunandij, Jerusalenpi causajcunandijmi Josafatca, Tecoa shitashca pambaman rirca. Chaiman ricushpami paica shayarishpa cashna nirca: “Judá llajtamanta tandanacushcacunapish, Jerusalenpi causajcunapish uyaichij. Cancunata Mandaj Taita Diospi shunguta churaichij. Ima mana tucunguichijchu, pai ima nishcata huillajcuna huillashcatapish crichij, mishanguichijtajmi” nircami.

21Chaipi tandanacushcacunahuan parlanacushca q'uipami, macanacunacunahuan allichirishca soldadocuna llujshicujpica, shujtajcunataca sumaj ricunacunahuan rurashca churanacunata churarishpa cantashpa, Mandaj Diosta alabachun churarca. Paicunataca: “Mandaj Diosta jatunyachichij, paica huiñaita c'uyajmari” nishpami cantachun nirca.

22Paicuna Mandaj Diosta alabashpa cantai callarijpica, Mandaj Diosca Judá llajtapi causajcunahuan macanacunaman shamushca Amón runacunatapish, Moab runacunatapish, Seir urcumanta shamushcacunatapishmi paicunapurallataj chapanacushpa huañuchinacuchun churarca. Chaimantami paicunapurallataj caishuj chaishuj huañuchinacurcacuna.

23Amón, Moab llajta runacunaca Seir urcu runacunatami huañuchircacuna. Paicunata ña tucuchishpaca, paicunapurallatajmi huañuchinacurcacuna.

24Chashna tucushca q'uipami, Judá soldadocunaca shitashca pambapi caj torreman shamurcacuna. Chaimantami achca soldadocuna pambapi huañushca siricujta ricurcacuna. Shujllapish mana causaj saquirishca carcachu.

25Chaita ricushpami Josafatca, chai soldadocuna imalla charishcata japinaman paipaj soldadocunandij rirca. Chai huañushcacunapajtaca achca charinacunatapish, churanacunatapish, sumaj ricunacunatapishmi achcata japircacuna. Yallitaj achca charinacuna cashcamantami, mana apai tucujta japircacuna. Quimsa punllatami chaicunataca tandashpa cainarcacuna.

26Chai quimsa punllapaj cayandij punllaca, Beraca shuti pugru pambapi tandanacushpami, Mandaj Diosta alli nircacuna. Chaimantami chai pambataca, Beraca shutita shutichircacuna. Cunancama chai shutillatajmi.

27Mandaj Dios paicunata p'iñajcunamanta quishpichishpa cushichishcamantami, tucui Judá soldadocunapish, Jerusalén pueblo soldadocunapish Josafatta ñaupachishpa, cushicuihuan Jerusalenman tigramurcacuna.

28Jerusalenpica salteriocunahuan, arpacunahuan, trompetacunahuanmi Mandaj Diospaj huasiman shamurcacuna.

29Israelcunata p'iñajcunahuan Mandaj Dios macanacushpa mishashcataca, tucui llajtacunapi causajcunami uyarcacuna. Chaita uyashpaca, tucui chaicunami Mandaj Diostaca yallitaj mancharcacuna.

30Tucui muyundij llajtacunapi causajcuna llaquichinamanta Taita Dios huaquichishpa sumaj causaita cujpimi, Josafat mandacujpica mana macanacui tiyarca.

Judá llajtata Josafat mandashcami(1 R 22.41-50)

31Cashnami Josafatca, Judá llajtapica mandarca: Josafatca Judá llajtata mandai callarinapajca, quimsa chunga pichca huatayujmi carca. Paica ishqui chunga pichca huatatami Jerusalenpi mandarca. Paipaj mamaca, Silhi shuti runapaj ushushi Azubami carca.

32Josafatca Mandaj Diospaj ñaupajpica, imata mana pandashpami, paipaj yaya Asa purishca shinallataj mana maiman anchurishpa chai ñancunallapi purirca.

33Chashna ruraj cashpapish lomacunapi tiyaj altarcunataca mana anchuchircachu. Judá llajtapi causajcunapish, paicunapaj ñaupa yayacunapaj Diosmanca manataj tucui shunguhuan cutirircacunachu.

34Josafat ashtahuan imallata rurashcacunaca, Hananipaj churi Jehú jatun mandaj Jehú quillcachishcapimi tucui tiyacun. Jehumantaca Israel llajtata jatun mandajcuna imallata rurashcata quillcashcapimi huillacun.

35Taita Dios quishpichishpa chai tucuita rurashca q'uipami, Judá llajtata jatun mandaj Josafatca, israelcunata jatun mandaj Ocoziashuan apanacunata ari ninacurca. Ocoziasca, Diosta manataj manchajmi carca.

36Paihuan apanacui callarishpami Josafatca, Tarsis puebloman cachangapaj ishqui tucushpa, Ezión-geber pueblopi jatun barcocunata rurachirca.

37Chaimantami Maresa pueblopi causaj Dodava runapaj churi Eliezerca, Josafattaca: “Ocoziashuan can apanacushpa shuj shinalla tucushcamantaca, can rurashcacunataca Mandaj Dios tucuchigrinmi” nishpami rimarca. Pai nishca shinallataj chai jatun barcocuna p'aquirijpimi, Tarsis pueblomanca mana ri tucurcacuna.