NÚMEROS 34 - Quichua Chimborazo Bible

Canaán llajta lindecuna maillata canata huillashcami

1Mandaj Dios Moisesta mandashpaca cashnami nirca:

2“Israelcunata mandashpa cashna ni: Cancuna Canaanman ña yaicujpica, chai llajtaca cancunaman cushca cashcamanta cancunapajmi canga. Chai llajtapaj lindecunaca caicunatami canga:

3Ura ladotaca, Zin nishca shitashca pambamanta callarishpaca, Edom llajtapaj lindecunacama. Inti llujshin ladotaca Cachisapa Cucha c'uchuta catishpa,

4chai lindeca ura ladota muyushpa rishpaca, Acrabim huichicama. Chaimantaca Zin nishca shitashca pambata pasashpa, ura ladollatataj Cades-barneaman chayajta. Chaimantaca Hasar-adar pueblota pasashpa, Asmoncama.

5Chai lindeca Asmonmanta callarishpa muyushpa rishpaca, Egipto jatun yacuman chayashpa mama cuchaman tupanacujtami canga.

6Inti huashicun lado lindeca, jatun Mama Cuchami. Chaica inti huashicun lado lindemi.

7Janaj lado lindeca caitami canga: Mama Cuchamanta callarishpaca, Hor urcucama señalangui.

8Hor urcumantaca, Hamatman yaicunacama señalangui. Chai lindeca Zedadman chayajtami canga.

9Chaimantaca Zifroncama cachun. Chai lindeca Hazar-enanpi tucurichun. Chaica janaj lado lindemi.

10Inti llujshin lado lindetaca, Hazar-enanmanta callarishpaca, Sefamcama señalangui.

11Chai lindeca Sefammanta uri rishpaca, Ainmanta inti llujshin ladoman caj Riblacamami canga. Chaimantaca Cineret cucha uritaca inti llujshin ladotami canga.

12Chai lindeca Jordán yacucama urita rishpa Cachisapa Cuchaman tupanacujtami canga. Cancunapaj llajta lindeca tucui chaicunata muyushpami canga” nircami.

Canaán llajtata ima shina chaupichun Moisés mandashcami

13Moisesca israelcunataca cashnami nirca:

“Canaán llajtata ima shinalla cuchun mandashcaca cashnami. Iscun aillumanpish, caishuj chaupi aillumanpish sorteajpi maipimi urman chaipitaj cada quiquinman cuchunmi Mandaj Diosca mandarca.

14Rubenpaj aillupish, Gadpaj aillupish, Manasespaj chaupi aillupish paicunapaj yayacuna mashna familia cashca shinallatajmi paicuna japina cashca allpataca ña japircacuna.

15Chai ishqui ailluhuan, caishuj chaupi ailluhuanca paicuna japina cashca allpataca Jericomanta inti llujshin ladoman caj Jordán yacu c'uchupimi ña japircacuna” nircami.

16Mandaj Dios Moisesta, mandashpaca cashnami nirca:

17“Canaán llajtata chaupijcunaca: Eleazar curahuan, Nunpaj churi Josuehuan cachun.

18Chai allpata israelcunaman chaupishpa cungapajca israelcunapaj cada aillucunata mandajcunatapish cayachun.

19Chai pushajcunapaj shuticunaca caicuna cachun: Judapaj aillumantaca Jefonepaj churi Caleb.

20Simeonpaj aillumantaca Amiudpaj churi Semuel.

21Benjaminpaj aillumantaca Quislonpaj churi Elidad.

22Danpaj aillumantaca Joglipaj churi Buqui cachun.

23Josepaj ishqui churicunapaj aillucunamantaca: Manasespaj aillumantaca Efodpaj churi Haniel.

24Efrainpaj aillumantaca Siftanpaj churi Kemuel cachun.

25Zabulonpaj aillumantaca Parnac runapaj churi Elizafan.

26Isacarpaj aillumantaca Azanpaj churi Paltiel.

27Aserpaj aillumantaca Selomipaj churi Ahiud.

28Neftalipaj aillumantaca Amiudpaj churi Pedael cachun” nircami.

29Canaán llajtata israelcunaman chaupishpa paicuna japina cashca allpata cuchunca, Mandaj Diosca chaicunatami mandarca.