2 SAMUEL 8 - Quichua Chimborazo Bible

Davidca maijanlla llajtacunata japishcami(1 Cr 18.1-13)

1Chai q'uipaca Davidca filisteocunata mishashpa, Meteg-ama llajtata cutinllataj quichujpimi, filisteocunaca Davidpaj ucupi tucurcacuna.

2Davidca Moabitacunatapish misharcami. Paicunataca huascata pambapi sirichishpa medishpami, ishqui huasca jundata medishpaca huañuchirca. Shuj huasca jundata medishpaca causachun saquirca. Saquirij moabitacunaca Davidpajta ruraj tucushpami tributota cushpa causarcacuna.

3Davidca Rehobpaj churi Soba llajtata jatun mandaj Hadad-ezertapish chashnallatajmi misharca. Chai mandajca Éufrates yacu chai llajtata cutinllataj paipaj cachun japinaman rishca cajpimi chashna misharca.

4Davidca paicunataca caballocunapi tiyarishpa purijcunataca 1.700 runacunatami prezu japirca. Chaquillahuan purijcunataca, 20.000 runacunatami prezu japirca. Caballocunataca patsaj carrocunata aisanapaj pajtallata saquishpami, caishuj caballocunataca tucuicunata garroncunapi p'itirca.

5Soda llajtata jatun mandaj Hadad-ezerta ayudangapajmi Damascomanta siriocunapish shamurcacuna. Chai siriocunatapish Davidca, 22.000 runacunatami huañuchirca.

6Chai q'uipaca Davidca, Siriapi caj Damascopica chapaj soldadocunatami churarca. Chaimantami siriocunaca, Davidpaj ucupi tucushpa tributota pagashpa causarcacuna. David maipi macanacunaman rijpipish Mandaj Diosca paitaca mishachijllami carca.

7Davidca, jatun mandaj Hadad-ezerpajta rurajcuna apamushca curi escudocunata japishpami Jerusalenman aparca.

8Jatun mandaj Davidca, Hadad-ezerpaj Beta, Berotai pueblocunamantaca achca broncetapishmi japishpa aparca.

9Hamat pueblota jatun mandaj Toica, Hadad-ezerpaj tucui soldadocunata David mishashcata uyashpami,

10Hadad-ezerhuan macanacushpa David mishashcamanta allitami rurashcangui nishpa allillachu cangui nichun paipaj churi Joramtaca Davidpajman cacharca. Joramca cullquimanta imalla rurashcacunata, curimanta imalla rurashcacunata, broncemanta imalla rurashcacunatapish apashpami Davidpajmanca rirca. Toica Hadad-ezerhuanca p'iñanacushcami cashca carca.

11Chaicunataca jatun mandaj Davidca Mandaj Diospaj ch'icanchishpami, shujtaj llajtacuna paipaj ucupi tucushpa cullquita, curita cushcacunata, Diospajlla ch'icanchishcahuan tandachishpa churarca.

12Chaicunaca siriocunapish, moabitacunapish, amonitacunapish, filisteocunapish, amalecitacunapish cushcacunami carca. Rehobpaj churi Soba llajtata jatun mandaj Hadad-ezerta quichumushcacunapishmi carca.

13Chashnami Davidca tucuicuna alli nishca tucushpa catirca. Siriocunata mishashpa tigracushpaca, 18mil edomitacunatapishmi Cachi tiyan pugru pambapi ñutuchishpa shamurca.

14Davidca Edompica tucuipimi chapaj soldadocunata churarca. Chaimi tucui edomitacunaca Davidpaj ucupi tucushpa causarcacuna. Mandaj Diosca David maiman rijpipish mishachircallami.

David churashca mandajcunami(2 S 20.23-26; 1 Cr 18.14-17)

15Davidca tucui israelcunatami mandarca. Paica cashcata ruraj canata, mana pandaj canatami pai mandacun tucui llajtapica cuidarca.

16Sarviapaj churi Joabca soldadocunata mandajmi carca. Ahiludpaj churi Josafatca, imalla tucushcacunata quillcajmi carca.

17Ahitobpaj churi Sadoc, Abiatarpaj churi Ahimelecca curacunami carca. Seraiasca jatun mandajpaj quillcajmi carca.

18Joiadapaj churi Benaiaca cereteocunata, peleteocunata mandajmi carca. Davidpaj churicunaca, q'uipa mandajcunami carca.