ÉXODO 35 - Quichua Chimborazo Bible

Samana punllapi imata ama rurachun mandashcami(Ex 31.12-17)

1Moisesca tucui israelcunata tandachishpami, cashna nirca: “Mandaj Dios imallata rurachun nishpa mandashcacunaca caicunami:

2Sujta punllacunallatami trabajana. Canchis punllapica, Mandaj Diospajlla ch'icanchishca samana punllami. Maijanpish chai punllapi ima trabajota rurajca huañungami.

3Samana punllapica ni mai huasicunapi, ninallatapish ama japichinguichijchu ninmi” nircami.

Diospaj carpa huasita ruranapaj imallata tandachinami(Ex 25.1-9)

4Moisesca tandanacushca tucui israelcunataca cashnami nirca: “Caimi Mandaj Dios mandashcaca:

5Cancunapurapi Mandaj Diosman cuna cashcata tandachichij. Mandaj Diosman shungumanta cuna munaihuan cajcunaca: Curita, cullquita, bronceta,

6azul millmata, morado millmata, amsa puca millmata, ashtahuan alli linota, chivo millmata,

7carnero carata pucajllata tinishcata, tejoncunapaj caracunata, acacia caspita,

8lamparapi churashpa rupachina aceiteta, imata Diospajlla ch'icanyachina aceiteta rurangapajpish, mishquijllata ashnaj inciensota rurangapajpish chagruna jambicunata apamuchun.

9Efodpi, pectoralpi churanapaj ónice rumicunatapish, shujtaj sumaj rumicunatapish apamuchun ninmi nircami.

Diospaj carpa huasitapish chaipi imalla charinacunatapish rurachun mandashcami(Ex 39.32-43)

10Cancunapurapi imatapish shungumanta ruranata yachajcuna shamushpami Mandaj Dios rurachun nishca caicunata rurangacuna:

11Diospaj carpa huasita, chai ucupi caj ch'icanchishca ucuta, chai huasipaj c'atata, chai c'atata charichina ganchocunata, chai huasipaj tablacunata, quinriman churana caspicunata, chai huasipaj pilarcunata, chai pilarcunata shayachina basacunata,

12Dioshuan ari ninacushca quillcata huaquichina arcata, huanduna caspicunata, chai arcapaj propiciatoriota, ch'icanchishca ucupaj cortinacunata,

13mezata, huanduna caspicunata, chaipi imallata ruranapaj cajcunata, Mandaj Diospaj ñaupajpi churana tandata,

14achijyachij candelerota, chaipi imallata ruranapaj cajcunata, lamparacunata, achijyachichun lamparacunapi churana aceiteta,

15inciensota rupachina altarta, huanduna caspicunata, Diospajlla cachun ch'icanchina aceiteta, mishquijllata ashnaj inciensota, Diospaj carpa huasiman yaicuna pungupi churana cortinata,

16Diosman cushpa tucui rupachinapaj altarta, altarpi churana bronce parrillacunata, huanduna caspicunata, chaipi imallata ruranapaj cajcunata, tanqueta, chai tanqueta tiyachina basata,

17Diospaj carpa huasi canlla muyundij cortinacunata, chaipi churana pilarcunata, chai pilarcunata shayachina basacunata, Diospaj carpa huasi canllaman yaicuna pungu cortinata,

18Diospaj carpa huasita charichina ishtacacunata, Diospaj carpa huasi canlla muyundij pilarcunata charichina ishtacacunata, huascacunata,

19Diospajlla caj ucupi Diospajta ruracushpa churarina churanacunata, Mandaj Diospajlla caj Aarón cura churarina churanacunata, paipaj churicuna cura tucushpa Diospajta rurangapaj churarina churanacunatapish ruranguichij ninmi” nircami.

Diospajta ruranapaj Israelcuna imallata cushcami

20Moisés chashna nijpica tandanacushca tucui israelcunaca paipaj ñaupajmanta llujshishpa rircallacunami.

21Chai huillashca paicunapaj shungupi yuyachijpimi, tucuicuna paicunapaj espiritupi cuna munaita charishca shina, Mandaj Dioshuan tupanacuna carpa huasita rurangapajpish, chaipi imallata rurangapajpish, chaipi Diospajta rurajcuna churarinacunata rurangapajpish cungapaj apamurcacuna.

22C'aricunapish, huarmicunapish cuna munaita shungupi charijcunaca cadenacunata, zarcillocunata, sortijascunata, brazaletecunata, tucui laya curi charinacunata, Diosman cuna cashcata Mandaj Diosman cungapajca tucuitami curimanta apamurcacuna.

23Azul millmata, morado millmata, amsa puca millmata, ashtahuan alli linota, chivo millmata, carnero carata pucajllata tinishcata, tejoncunapaj caracunata tucui chaicunata charijcunaca tucuicunami apamurcacuna.

24Mandaj Diosman cusha nijcunaca tucuicunami cullquita charijcunaca cullquita, bronceta charijcunaca bronceta Mandaj Diosman cushun nishpa apamurcacuna. Acacia caspita charijcunaca imatapish caspihuan Diospajta ruranapaj cajcunapajca chaicunatami curcacuna.

25Shungumanta imatapish ruranata yachaj huarmicunapish tucuicunami azul millmata, morado millmata, amsa puca millmata, ashtahuan alli linota paicunapaj quiquin maquihuan puchcashpa apamurcacuna.

26Imatapish quiquin yuyaimanta jahualla ruraj huarmicunapish chivo millmata puchcashpami apamurcacuna.

27Mandajcunaca Efodpi, pectoralpi churanapaj ónice rumicunatapish, shujtaj sumaj rumicunatapishmi apamurcacuna.

28Mishquijllata ashnacujcunata, lamparapi churashpa rupachina aceiteta, imata Diospajlla ch'icanyachina aceiteta rurangapajpish, mishquijllata ashnaj inciensota rurangapajpish chagruna jambicunatami apamurcacuna.

29Israelcunaca Mandaj Dios paipaj imallata ruranapaj Moisesman huillachishca shinallatajmi, Mandaj Diospajta ruranapaj cuna munaita charijcunaca c'aricuna cashpa, huarmicuna cashpa shungumantataj Diosman cungapaj apamurcacuna.

Mandaj Diosca Bezaleelta, Aholiabta imapipish paipaj ruranacunapi ruraj cachun cayashcami(Ex 31.1-11)

30Moisesca israelcunataca: Riquichij Mandaj Diosca Judá aillupuramanta Hurpaj nieto, Uripaj churi Bezaleelta cayashpami,

31paipica yachaisapa, yuyaisapa, imatapish yachaj, tucui ima ruranatapish yachaj cachun Diosca paipaj Espirituta jundachishca.

32Chai yachaihuanca paica curihuan, cullquihuan, broncehuan pipish manaraj rurashcata yuyarishpa imatapish rurajlla cachunmi chashna churashca.

33Rumicunapipish sumaj ricunacunata ruraj cachun, caspicunapipish sumaj ricunacunata ruraj cachun, tucui imatapish pipish manaraj yuyarishcata ruraj cachunmi Taita Diosca chashna churashca.

34Paipica yachachi tucuipaj cana shungutapishmi churashca. Dan aillumanta caj Ahisamacpaj churi Aholiabmanpish chashnallatajmi churashca.

35Paicunamanca imatapish pipish manaraj rurashca sumajcunata ruraj cachunmi yachaita jundachishca. Azul millmahuan, morado millmahuan, amsa puca millmahuan, ashtahuan alli lino puchcahuan sumaj ricunacunayujta telarpi ahuaj cachunmi chashna churashca. Tucui imatapish pipish manaraj rurashca sumaj ricunacunayujta rurachunmi chashna churashca.