1Jacobca, Egiptopi granocuna tiyan nijta uyashpami, paipaj churicunataca: “¿Imatataj caishuj chaishuj ricunacucunguichijlla?
2Ñucaca Egiptopi granocuna tiyan nijtami uyani. Yaricaihuan ama huañungapajca chaiman uriyashpa granocunata ñucanchijpaj randimugrichij” nirca.
3Josepaj chunga huauquicunaca trigota randingapajmi Egiptoman uriyarcacuna.
4Jacobca Josepaj huauqui Benjamintaca mana cacharcachu. Paipish ima llaqui tucungallatajmari yuyashpami, paipaj huauquicunahuanca mana cacharca.
5Canaanpi jatun yaricai tiyashcamantami, yaya Israelpaj churicunaca chai llajtallamantataj shujtajcunandij granocunata randingapaj rircacuna.
6Joseca chai llajtapi mandajmi carca. Paimi tucuicunaman trigota c'atuj carca. Josepaj huauquicunapish paipajman chayashpaca paipaj ñaupajpimi pambaman tupajta cumurircacuna.
7Joseca ricushcahuanmi paipaj huauquicuna cashcata rijsirca. Ashtahuanpish mana rijsij shina tucushpa maipish cachun rimashpami:
–¿Maimantataj shamunguichij?– nijpi paicunaca:
–Granocunata randingapajmi Canaanmanta shamunchij– nircacuna.
8Joseca paipaj huauquicuna cashcataca rijsircami. Ashtahuanpish paipaj huauquicunaca Josetaca mana rijsircacunachu.
9Chaimi Joseca paipaj huauquicunamanta ñaupaman pai muscushcata yuyarishpa paicunataca:
–Cancunaca cai llajta mitsari tucuipajta, mana mitsari tucuipajta purij shinalla ricujcunami canguichij– nirca.
10Paicunaca:
–Ñucanchij amito, cambajta ruraj ñucanchijca mana chaipajchu shamurcanchij. Ashtahuanpish granocunata randingapajllami shamurcanchij.
11Tucui ñucanchijmi shuj yayapajlla huahuacuna canchij. Ñucanchijca mana allita rurajcunaca mana canchijchu. Cambajta ruraj ñucanchijca purij shinalla ricujcunaca manataj cashcanchijchu– nircacuna.
12Shina nijpipish Joseca:
–Mana chashnachu canguichij. Cancunaca cai llajta mitsari tucuipaj cajta mana mitsari tucuipaj cajta purij shinalla ricujcunami canguichij– nircami.
13Shina nijpi paicunaca:
–Cambajta ruraj ñucanchijca shuj yayapajlla huahuacuna, chunga ishqui huauquindijcunami canchij. Canaanpimi causanchij. Tucui ñucanchijpaj q'uipa huauquica ñucanchij yayahuanmi saquirirca. Shuj huauquica chingarircami– nircacunami.
14Shina nijpimi Joseca:
–Cancunaca ñuca nishca shinallataj purij shinalla ricushpa purijcunatajmi canguichij.
15Cancuna nishca chashnataj cashcataca caita rurashpami yachasha: ¡Tucui cancunapaj q'uipa huauqui shamungacama, caimantaca manataj llujshinguichijchu. Faraonpaj shutipimi chashna nini!
16Cancuna nishca chashnataj cajpica caishujcunaca caipi prezu saquirishpa shujtaca q'uipa huauquita pushanaman cachaichij. Mana chashna rurashpaca purij shina ricujcunatajmi canguichij. Faraonpaj shutipimi chashna nini– nirca.
17Shina nishpaca tucuicunatami quimsa punllacama prezu churarca.
18Quimsa punlla tucujpimi Joseca:
–Ñucaca Taita Diosta manchajmi cani. Cancuna ama huañungapajca caita ruraichij:
19Cancuna mana allita mana rurajcunataj cashpaca, cancunapaj shuj huauquita caipi prezu saquishpa, caishujcunaca cancunapaj huasi ucupurapaj micunata apashpa richij.
20Cancuna tigramushpaca tucuicunapaj q'uipa huauquita pushamunguichij. Chaimi cancuna nishcaca chashnataj cajpi mana huañunguichij– nijpimi paicunaca chashna ruranata ari nircacuna.
21Chaipimi paicunaca caishuj chaishuj:
–Ñucanchij huauquita llaquichishpaca juchayujtajmi tucushcanchij. Paica llaquijlla ñahuimari ñucanchijtaca ama chashna rurahuaichijchu nirca. Ashtahuanpish ñucanchijca mana uyarcanchijchu. Chaimari tucui cai llaquicunaca ñucanchij jahuaman shamushca– nircacuna.
22Chaimi Rubenca:
–¿Manachu ñucaca cai huambrata llaquichishpa ama juchallichijchu nircani? Ashtahuanpish cancuna mana uyashcamantami, cunanca paipaj yahuar ñucanchijta llaquichichun mañacun– nirca.
23Joseca paicuna ima rimashcata egipcio rimaipi paiman huillaj runatami charirca. Chaimi paicunaca paicunapaj rimaipi parlanacushcataca Joseca mana entendinchu yuyarcacuna.
24Ashtahuanpish Joseca paicunamanta ch'icanyashpami huacarca. Paicunapajman tigrashpa paicunahuan rimashpaca paicuna ricucujpimi Simeonta prezu japirca.
25Chai q'uipami Joseca, paipajta rurajcunataca:
–Paicunapaj costalcunapi trigota jundachichij. Trigomanta pagashca cullquitapish cada quiquinpaj costalcunapi churanguichij. Ñanpi micuchun cucayutapish cachanguichij– nijpica, pai nishca shinami rurarcacuna.
26Josepaj huauquicunaca, paicunapaj burrocunaman trigota apachishpa chaimanta rircallacunami.
27Paicunaca ña tutayajpi samarinaman chayashpami, paicunapuramanta shujca paipaj burroman carangapaj costalta pascarca. Chaipica ñapish costal shimipica cullqui muchila ricurircallami.
28Chaimi paipaj huauquicunamanca:
–¡Riquichigari, ñuca cullquitaca cai ñuca costal-llapitajmari tigrachishpa cachashca!– nijpimi, tucuicuna achcata chujchushpa mancharishpa caishuj chaishuj:
–¿Taita Diosca ñucanchijtaca imatataj ruracunchu imamí?– ninacurcacuna.
29Canaanman chayashpaca, paicunapaj yaya Jacobmanca tucui imalla tucushcatami cashna nishpa parlarcacuna:
30–Chai llajtapaj q'uipa mandajca ñucanchijtaca cancunaca purij shinalla ricujcunami canguichij nishpami maipish cachun riman.
31Ashtahuanpish ñucanchijca: Mana allita rurajcunaca mana canchijchu. Purij shinalla ricujcunapish manataj cashcanchijchu.
32Ñucanchijca shuj yayapajlla huahuacuna, chunga ishqui huauquindijcunami canchij. Shuj huauquica chingarircami. Tucuicunapaj q'uipaca Canaanpimi ñucanchij yayahuan saquirirca nircanchijmi.
33Chaimi chai llajtapaj q'uipa mandajca: Cancuna mana allita mana rurajcuna cashcata ricuchingapajca cancunapaj shuj huauquita caipi ñucahuan saquishpa cancunapaj huasi ucupuracuna yaricaihuan cajcunapaj micunata apashpa rishpa,
34cancunapaj q'uipa huauquita pushamuichij. Chaipimi purij shinalla ricujcuna mana cashcata, mana allita mana rurajcuna cashcata yachashpa, cancunapaj huauquitaca tigrachisha. Cai llajtapica randishpa puri tucunguichijllami nircami– nishpami parlarcacuna.
35Chaipipish cashnami tucurca. Costalcunamanta granocunata tallicushpaca, tucuicunapaj costalpimi cullqui muchilacunata ricurcacuna. Chaimi paicunapish, paicunapaj yayapish tucuicuna achcata mancharircacuna.
36Chaimi yaya Jacobca:
–Cancunaca ñucataca huahuacuna illajtamari saquigringuichij. Josepish ñami chingarirca, Simeonpishmari ña illan. Cunancarin Benjamintapishmari pushashun ninguichij. Tucui chaicunaca ñucatamari tucuchigrin– nirca.
37Rubenca paipaj yayataca:
–Benjamintaca ñucahuan cachahuailla, tigrachimushallami. Ñuca mana tigrachimujpica, ñuca ishqui churicunata huañuchingui– nircami.
38Shina nijpi Jacobca:
–Ñuca churica cancunahuanca manataj ringachu. Paipaj huauqui Josepish huañujpi, paillami saquirirca. Cancuna Benjaminta pushashpa ricujpi ñanpi ima llaquipish tucujpica, ñucaca yuyaj cashcamanta seolman utca rijpica cancunapaj jahuami canga– nircami.
Who We AreWhat We EelieveWhat We Do
2025 by iamachristian.org,Inc All rights reserved.
