2 SAMUEL 7 - Quichua Chimborazo Bible

Taita Diosca Davidtaca alli cashca cachun nishami nishcami(1 Cr 17.1-27)

1Jatun mandaj Davidca, pai rurashca huasipimi mandacurca. Mandaj Diosca, tucui muyundij llajtacunapi paita p'iñajcunamantami samachirca.

2Chaimi jatun mandajca, profeta Natantaca:

–Riqui, ñucaca cedro caspicunahuan rurashca huasipimari causacuni. Mandaj Diospaj arcaca linsocunahuan shayachishca ucullapimari tiyacun– nirca.

3Chaimi Natanca jatun mandajtaca:

–Cambaj shungupi imallata yuyarishcataca chaita ruragrilla. Mandaj Diosca canhuanmari– nirca.

4Chai tutallatajmi Mandaj Diosca Natantaca:

5“Ñucapajta ruraj Davidpajman rishpa cashna nigri: Mandaj Diosca cashnami nin: Canchari ñuca causana huasitaca rurasha ningui. Ashtahuanpish mana canchu rurangui.

6Egiptomanta israelcunata llujshichimui punllamanta cunan punllacamaca huasicunapica mana causamushcanichu. Ashtahuanpish ñucapaj carpa huasita rurashcacunallapimi purimurcani.

7Tucui chaicunapi israelcunahuan puricushpaca, paicunataca ima shimicunata mana rimashcanichu. Ñuca israelcunata michinaman cachacushpapish, ñucapaj huasita cedro caspicunahuan ruraichij nishpa maijanta mana nishcanichu.

8Ñucapajta ruraj Davidtaca cashna nigri: Tucuita Mandaj Diosca cashnami nin: Ovejacunata michishpa, ovejacunapaj corralpi cuidashpa puricujta japishpami, ñuca israelcunata mandaj cachun churarcani,

9chaimantami can maita puricujpipish canhuan carcani. Canta p'iñajcunatapish cambaj ñaupajpimi tucuicunata chingachircani. Canmanca jatun shutitami curcani. Cai pachapi jatun mandajcuna shinallataj jatun mandaj cachunmi churarcani.

10Ñuca israelcunapajca shuj llajtatami paicunapajtaj cachun nigrini. Chaipi causachunmi paicunataca yurata tarpuj shina churagrini. Chaimantaca pi manataj cuyuchingachu. Millaicunapish callari punllapi shina mana llaquichingachu.

11Juezcunata ñuca churai callari punllamanta cunancamami ñuca israelcunataca llaquichircacuna. Tucui canta p'iñajcunamantami cantaca samachisha. Mandaj Diosca caitapish canmanca yachaj chayachinmi. Canpica huasitami shayachinga.

12Cambaj causai tucurijpi, cambaj ñaupa yayacunahuan can samaricujpica, cambaj huahua huahuacunapuramantami ñucaca shuj mandajta churasha. Paica cambaj aichamantami llujshinga. Paitaca paipaj mandana huiñaipaj cachunmi churasha.

13Paimi ñuca huasitaca shayachinga. Pai mandashpa tiyanataca ñucami huiñaipaj churasha.

14Ñucaca paipaj yayami casha, paica ñuca churimi canga. Mana allita rurajpica shuj runa paipaj churita varahuan llaquichij shinami llaquichisha. Shuj runa paipaj churita azotij shinami azotisha.

15Saulmanta ñuca c'uyaita anchuchishca shinaca ñuca c'uyaitaca paimantaca manataj anchuchishachu. Saulta cambaj ñaupajmanta anchuchishca shinapish manataj anchuchishachu.

16Cambaj huasi familiapish, cambaj mandanapish ñuca ñaupajpica huiñaitami canga. Can mandashpa tiyanapish mana cuyuchipaj huiñaipajmi canga ninmi ningui” nircami.

17Natanca tucui cai shimicunata, muscuipi shina tucui ricushcacunataca chai shinatajmi Davidmanca huillarca.

18Chashna nijpi, jatun mandaj David yaicushpa, Mandaj Diospaj ñaupajpi shayarishpaca: “Ñucata mandaj Mandaj Jatun Dios, ñucaca ¿pitaj caniyari? Ñuca huasi familiapish ¿pi cajpitaj ñucanchijtaca caicama pushamunguiyari?

19Mandaj Jatun Dios cai tucuita rurashcaca cambajca mana achca shinami cashca. Chai jahuamari cambajta ruraj ñuca huasi ucupuracuna q'uipa punllacunapi ima shina canatapish rimashcangui. Mandaj Jatun Dioslla can rurashcaca mana runacuna rurashca shinallachu.

20¿Davidca cantaca imatataj ashtahuan nishari? Mandaj Jatun Dios, cambajta ruraj ñucataca tucuitamari rijsingui.

21Cai jatun ruranacunataca cambaj shimi nishca shina, cambaj shungu yuyashca shina rurashpami cambajta ruraj ñucamanca yachaj chayachishcangui.

22Chaimantami Mandaj Dioslla tucuicunata yalli jatun nishca cangui. Can shinaca shujtajca mana tiyanchu. Can imallata rurashcata ñucanchij uyashca shina shujtaj Diosca mana tiyanchu.

23¿Maijan llajtataj cambaj Israel llajta shinaca tiyanri? Cambaj israelcunallamari cai pachapica cambajlla llajtaca tiyan. Cambajlla cachunmi paicunataca huatashcamanta llujshichinaman rircangui. Cambaj shutita paicunapi churangapajmi chashna rurarcangui. Paicunapaj allita rurangapajmi chashna rurarcangui. Ñucanchij llajtapica mancharinacunatami rurarcangui. Cambaj israelcunata c'uyashcamantami Egiptomantapish chai shujtaj llajtacunamantapish, paicunapaj dioscunapajmantapish llujshichimurcangui.

24Cambaj israelcunataca canllataj agllashpamari huiñaipaj cambaj cachun churarcangui. Mandaj Dioslla canmari paicunapaj Dios cangui.

25Cunanca Mandaj Dioslla cambajta rurajmanpish, cambaj huahua huahuacunamanpish huiñaipaj imallata rurashatajmi nishcataca chaitataj pajtachicunguilla.

26Cambaj shutitaca huiñaita jatunyachicuchunlla. Paicunaca: “Tucuita Mandaj Diosca israelcunapaj Diosmi” nichun. Cambajta ruraj Davidpaj huahua huahuacunaca cambaj ñaupajpica cambajlla sinchicuna cachun.

27Canca tucuita Mandaj Dios, israelcunapaj Diosmi cangui. Canllatajmi cambajta rurajmanca cambaj huahua huahuacunataca, mandajcuna cachun churasha nishpa ñucamanca yachaj chayachichircangui. Chaimantami cambajta ruraj ñucaca cambaj ñaupajpi tucui shunguhuan canta mañangapaj fuerzata charini.

28Mandaj Taita Dios canca Diostajmi cangui. Cambaj shimicunaca mana llullachu. Cambajta rurajpaj imallata rurasha nishcaca allimari.

29Cambajta rurajpaj huahua huahuacunaca huiñaita cambaj ñaupajpi cachun paicunataca can alli nichunmi rogani. Cambajta rurajpaj huahua huahuacunapaj can Mandaj Taita Dios ima shinallami rurasha nircangui, chai shinallataj can alli nishcahuanca huiñaipaj alli nishca cachun” nircami.