APOCALIPSIS 2 - Quichua Chimborazo Bible

Éfeso pueblopi tandanacushca crijcunaman huillashcami

1Efesopi caj tandanacushca crijcunapaj angelman quillcai:

“Canchis luzerocunata paipaj alli maquipi charicuj, canchis curi candelerocuna chaupipi puricujca, cashnami nin:

2Ñucaca can imalla rurashcata, shaicuita trabajashcata, mana p'iñarij alli shungu cashcatapish yachanimi. Millaicunata can mana ricunachij cashcatapish yachanimi. Ñucanchijca apostolcunami canchij nijcunatapish paicuna imata rurashcata ricushpa llullacunalla cashcata ricushcatapish yachanimi.

3Canca achca llaquicunatapish apashcanguimi. Mana p'iñarishpa alli shunguhuanmi catishcangui. Ñuca shutita c'uyashcamantaca shaicuita trabajacushpapish saquishalla mana nishcanguichu.

4Chashna cajpipish canpica, shuj mana allitami ricuni. Canca punta c'uyaitami saquishcangui.

5Chaimanta maimanta urmashcata yuyari. Diosman cutirishpa punta ruracushca shinallataj rurai. Mana cutirijpica, utcami cambajman shamusha. Chashna shamushpaca cambaj candelerotami maipi cashcamanta quichushpa anchuchisha.

6Chashna cashpapish nicolaita nishcacunapaj mana alli rurashcacunataca p'iñanguimi, chai rurashcacunataca ñucapish p'iñanimi.

7Rinrinta charijca, tandanacushca crijcunaman Diospaj Espíritu huillashcata uyachun. Millaita mishajmanca, Diospaj paraíso chaupipi caj, causaita cuj yuramantami carasha nishpa quillcai” nircami.

Esmirna pueblopi tandanacushca crijcunaman huillashcami

8Esmirna pueblopi caj tandanacushca crijcunapaj angelmanpish quillcai:

“Callaripipish caj, q'uipatapish cana caj, huañushpapish causarishpa causacujca cashnami nin:

9Ñucaca can imalla rurashcata, llaquicunata apacushcata, ima illajlla cashcatapish yachanimi. Chashna cashpapish achcata charijmi cangui. Judiocunami canchij nijcuna canta c'amishcatapish yachanimi. Paicunaca mana judiocunatajchu. Ashtahuanpish Satanás tandanacuna sinagogallamari.

10Llaquita apanataca ama manchaichu. Diabloca maijacunataca, crijtaj cashcata yachachun, carcelpimi churachinga. Chaipica chunga punllacunatami llaquita apanguichij. ¡Chashna cashpapish huañungacama catijmanca ñucaca causaita ricuchij coronatami cusha!

11Rinrinta charijca, tandanacushca crijcunaman Diospaj Espíritu huillashcata uyachun. Millaita mishajcunataca q'uipa huañuica imata mana rurai tucungachu nishpa quillcai” nircami.

Pérgamo pueblopi tandanacushca crijcunaman huillashcami

12Pérgamo pueblopi caj tandanacushca crijcunapaj angelmanpish quillcai:

“Ishqui filoyuj puntasapa espadata charicujca, cashnami nin:

13Ñucaca cambaj rurashcacunata, maipi causacujtapish yachanimi: Satanás maipi mandacunpi causacushpapish, ñuca shutitaca allimari huillacungui. Satanás maipi causacunpi ñucamanta huillaj, alli caticuj Antipasta huañuchi punllacunapipish ñucata crishcataca ña mana catishun mana nircanguichijchu.

14Chashna cajpipish, can rurashcacunaca ashacunamari mana ñuca munashca: Balaam yachachishcata mana saquisha nijcunatami charicunguiraj. Chai Balaamca rurashcalla dioscunaman cushcata micushpa, huainayashpa israelcuna pandarichun yachachi nishpami, Balactaca yachachirca.

15Nicolaitacuna yachachishcata mana saquisha nijcunatapish charicunguirajmi.

Paicuna yachachishcataca ñucaca manataj ricunachinichu.

16Chai mana allicunata rurashcamantaca llaquirishpa Diosman cutiri. Mana chashna rurajpica, cambajman utca shamushpami, ñuca shimimanta llujshij espadahuan paicunahuan macanacusha.

17Rinrinta charijca, tandanacushca crijcunaman Diospaj Espíritu huillashcata uyachun. Millaita mishajmanca, pacashca tiyacuj maná shuti micuitami carasha. Shinallataj shuj uchilla yuraj rumitami cusha, chaipica shuj mushuj shutita quillcashcami, chai shutitaca pi mana yachanchu, maijanpish chasquijllami yachanga nishpa quillcai” nircami.

Tiatira pueblopi tandanacushca crijcunaman huillashcami

18Tiatira pueblopi caj tandanacushca crijcunapaj angelmanpish quillcai:

“Ñahuicunapish lunyacuj nina shina, chaquicunapish llambuyachishca bronceman rijchaj shina caj, Diospaj Churica cashnami nin:

19Ñucaca can imallata rurashcatapish, c'uyaj cashcatapish, crijtaj cashcatapish, allita ruraj cashcatapish, mana p'iñarij alli shungu cashcatapish yachanimi. Shinallataj can ruracushcacunaca callaritapish yalli ashtahuan alli cashcatapish yachanimi.

20Shina cajpipish can rurashcacunataca caitami mana munani. Chai Jezabel huarmitamari mana jarcashpa saquinguilla. Paica profetami cani nishpamari umashpa, ñucapajta rurajcunataca huainayachun, rurashcalla dioscunaman cushcata micuchun, yachachicun.

21Ñucaca chai huarmitaca huainayanata saquishpa cutirichunmi shuyarcani. Ashtahuanpish mana cutirisha ninchu.

22Chaimanta jatun ungüita ñuca cachajpica paica camapimi siriringa. Chai huarmi rurashcacunahuan huainayajcunataca paita shinallatajmi jatunta llaquichisha.

23Paipaj huahuacunataca huañuchishami. Chashna rurajpimi ñucataca tucuipi tandanacushca crijcunaca paicunapaj yuyaita, shunguta rijsij cashcata yachangacuna. Cancunamanca ima shina rurashca shinallatajmi cusha.

24Tiatirapi caj maijancunaca chai mana alli yachanataca mana chasquishcanguichijchu. Satanaspaj tucuimanta yalli jatun yachanami nishcatapish cancunaca mana yachagrishcanguichijchu. Chaimanta cancunamanca: Ima shujtaj mana rurai tucuipajtaca mana mandanichu.

25Shina cajpica cancuna ima shina caticushca shinallataj ñuca shamungacama caticuichijlla.

26Tucuita mishashpa ñuca munashcallata rurashpa tucuringacama catijtaca llajtacunata mandajtami ñucaca rurasha.

27Ñuca Yaya ñucata mandajta rurashca shinallatajmi, paicunaca llajtacunataca allpa mangata ñutuj shina fierro varahuan mandanga.

28Pacarinapaj llujshij luzerotapish paicunamanca cushami.

29Rinrinta charijca, tandanacushca crijcunaman Diospaj Espíritu huillashcata uyachun nishpa quillcai” nircami.