1Chai q'uipaca cashnami tucurca: Davidpaj churi Absalonca, Tamar shuti sumaj ñahui shuj panitami charirca. Paitaca Davidpaj churi Amnonmi yallitaj munarca.
2Tamartaca c'arihuan manaraj chayarinacushca cajpi imata mana rurai tucushpami, Amnoca paipaj panita yallitaj munashcamantaca chai yuyailla tucushpa ungurca.
3Amnonca paihuan alli apanacuj Jonadab runatami charirca. Jonadabpaj yayaca Davidpaj huauqui Simeami carca. Jonadabca, yachaj tucushca umaj runami carca.
4Paimi Amnontaca:
–Jatun mandajpaj churi ¿ima nishpataj punllanta ashtahuan ashtahuan irquiyashpa caticungui? ¿Manachu ñucaman huillai tucungui?– nijpi Amnonca:
–Ñuca huauqui Absalonpaj pani Tamartamari yallitaj c'uyani– nirca.
5Shina nijpimi Jonadabca:
–Canca ungushca tucushpa camapi siriri. Cambaj yaya canta ricunaman shamujpica: Micunata yanushpa carachun ñuca pani Tamarta caiman cachapai. Ñuca ñaupajpitaj imata cashpapish yanushpa paipaj maquihuantaj carajpi micushapishchari ningui– nircami.
6Chaimi Amnonca ungushca tucushpa camapi siririrca. Jatun mandaj paita ricunaman rijpica Amnonca:
–Ñuca pani Tamar caiman shamuchunmi rogani. Pai ñuca ñaupajpi ishqui tortillata rurajpi paipaj maquimanta micungapaj– nirca.
7Davidca Tamartaca:
–Cambaj turi Amnonpaj huasiman rishpa, micunata caragri– nishpa huillachunmi Tamarpaj huasiman huillajta cacharca.
8Tamarca paipaj turi Amnopaj huasiman rishpa, pai maipi siricunman chayashpaca, cutata japishpa chapushpami, paipaj ñaupajpi tortillacunata rurashpa cusarca.
9Chaipimi sartenmanta tortillacunata llujshichishpa Amnonpaj ñaupajpi churarca. Amnonca mana micusha nishpami, ashtahuanpish tucui chai ucupi cajcunataca canllaman llujshichun mandajpi tucuicuna canllaman llujshircacuna.
10Chaimi Amnonca Tamartaca:
–Micunataca ñuca dormina ucuman apamui chaipi cambaj maquimanta japishpa micungapaj– nijpi Tamarca tortillacuna cusashcataca paipaj turi Amnón dormina ucuman aparca.
11Micunata paiman cungapaj c'uchuyagrijpica paica Tamarta japishpaca:
–Ñuca paniculla shamui, ñucahuan siririshun– nircami.
12Shina nijpi Tamarca:
–Ñuca turiculla, mana chaitaca rurashachu. Ñucataca ama llaquichichu. Israelpurapica chashnaca manataj ruranachu. Chashna millanayajtaca amataj ruraichu.
13Can chashna ñucata llaquichijpica, ¿maipitaj ima tucugrishari? Canpish israelcunapurapica chai runaca yallitaj millai nishcami tucungui. Can ñucahuan cazarasha nishpaca, jatun mandajhuanraj rimagripai, paica mana jarcangachu– nircami.
14Amnonca mana uyasha nircachu. Paica Tamarta yalli fuerzayuj cashcamantami, japishcahuan aisashpa paihuan siririrca.
15Amnonca, chai q'uipaca yallitajmi p'iñanachirca. Ñaupaman munacushcata maihuan yallita p'iñanachishpami manataj ricunachirca. Chaimi Amnonca:
–Jatari caimanta ri– nirca.
16Shina nijpi Tamarca:
–¿Ima nishpataj llujshichishpa cachasha ningui? Ñucata llujshichishpa cachashpacarin, ñucahuan siririshpa mana allita rurashcatapish yalli mana allitamari rurangui– nijpipish, Amnonca mana uyasha nishpami,
17paipajta rurajta cayashpaca:
–¡Cai huarmita canllaman llujshichishcahuan punguta huichcai!– nirca.
18Tamarca murujlla churanata churashcami carca. Jatun mandajpaj manaraj c'arihuan chayarinacushca ushushicuna churarij shinallataj churarishcami carca. Amnonpajta rurajca Tamarta llujshichishcahuanmi punguta huichcarca.
19Tamarca ushpata japishpami paipaj umapi shitarirca. Murujlla churanata churarishcatapish lliquirishpami, paipaj uma jahuapi maquicunata churashpa caparirishpa rirca.
20Chaimi paipaj turi Absalonca:
–¿Cambaj turi Amnonchu canhuan siririrca? Cambaj turillatajmi, upalla cailla panicu. Chaimantaca cambaj shungupi ama yallitaj llaquilla caichu– nirca.
Tamarca nunca mana cushicuihuan caipajmi, paipaj turi Absalonpaj huasipi saquirirca.
21Jatun mandaj Davidca tucui chaicunata uyashpaca, achcatami p'iñarirca.
22Absalonca, paipaj huauqui Amnón paipaj pani Tamarta chashna llaquichishcamanta p'iña cashpapish, Amnontaca allitami rurashcangui mana nircachu. Mana allitami rurashcangui mana nircachu.
Absalonca Amnonta huañuchishpa miticushcami23Ña ishqui huata q'uipaca Absalonca, Efraín pueblo c'uchullapi caj Baal-hazorpimi paipaj ovejacunata rutuchicurca. Chai micuimanmi Absalonca jatun mandajpaj churicunataca tucuicunata cayarca.
24Jatun mandajpajman Absalón shamushpaca:
–Cambajta ruraj ñucaca cunanmari ñuca ovejacunata rutuchicuni. Can jatun mandajtaca, tucui cambajta rurajcunandij cambajta ruraj ñucapajman shamuchunmi rogani– nircami.
25Chaimi jatun mandajca Absalontaca:
–Mana huahua, imata ruranacuna cambaj ama yalli cachun mana tucuicuna rinachu canchij– nirca.
Absalón rinatajmi cangui nicujpipish, jatun mandajca manataj risha nishpami, cambaj jatun micuipica Dios alli pushashca cachun nirca.
26Chaimi Absalonca:
–Shinashpaca ñuca huauqui Amnontaca ñucanchijhuan richunmi rogani– nijpi jatun mandajca:
–Amnontaca ¿imapajtaj canhuan richun ninguiyari?– nirca.
27Absalón pushashataj nishpa manataj uyajpimi jatun mandajca Amnontapish, tucui caishuj churicunatapish paihuan richun saquirca.
28Absalonca paipajta rurajcunataca: “Amnón ña vinohuan macharishpa paipaj shungupi cushicuihuan cajtaca alli chaparanguichij. Ña paita ñuca huañuchichij nijpica huañuchinguichijlla. Ñuca mandashca cashcamanta ama manchanguichijchu. Tucui fuerzahuan c'ari c'ari canguichij” nishpami rogashpa mandashca carca.
29Absalonpajta rurajcunaca pai mandashca shinallatajmi Amnontaca rurarcacuna. Chaimi, jatun mandajpaj churicunaca tucuicuna jatarishcahuan paicunapaj quiquin mulacunapi tiyarishcahuan callpashpa miticugrircacuna.
30Davidpaj churicuna ñanpiraj cajpimi: “Absalonca jatun mandajpaj churicunataca tucuicunatami huañuchishca shujllapish mana saquirishcachu” nishca Davidmanca uyarishca carca.
31Davidca jatarishcahuanmi paipaj churarishcacunata lliquirishcahuan pambapi siririrca. Chaipi paihuan caj paipajta rurajcunapish paicunapaj churarishcacunatami lliquirircacuna.
32Davidpaj huauqui Simeapaj churi Jonadabmi:
–Ñuca amito, jatun mandajpaj tucui churicunata huañuchishca canataca ama yuyaichu. Amnonllatami huañuchishca canga. Paitaca Absalonmari paipaj pani Tamarta japirishpa llaquichishca punllamantapacha huañuchinata yuyacurca.
33Chaimanta jatun mandaj ñuca amito, chashna nishcacuna chashnataj cana cashcataca cambaj shungupica amataj crichu. Jatun mandajpaj tucui churicuna huañushca canataca ama yuyaichu. Amnonllamari huañushca canga– nirca.
34Absalonca miticushpami rirca. Chai q'uipaca chapashpa shayacuj moso huichilla ricushpaca, achca gentecuna paipaj huasha ladoman caj urcu c'uchu ñanta shamucujtami ricurca.
35Jonadabca jatun mandajtaca:
–Jatun mandajpaj churicunaca cambajta ruraj nishca shinallatajmi shamucuncuna– nircami.
36Pai tucui rimancami jatun mandajpaj churicunaca chayamushpa caparishpa huacarcacuna. Jatun mandajpish, paipajta rurajcunapish yallitaj llaquirishpami jatunta huacarcacuna.
37Absalonca, miticushpa rishpami Gesur pueblota jatun mandaj Amiudpaj churi Talmaipajman rirca. Davidca paipaj churimantaca huacacurcallami.
38Absalonca Gesur puebloman chashna miticushpa rishpaca, quimsa huatatami chaipica carca.
39Amnón huañushcata cungarishpa ña cushilla cashpaca, jatun mandaj Davidca Absalonta ricunaihuanmi carca.
Who We AreWhat We EelieveWhat We Do
2025 by iamachristian.org,Inc All rights reserved.
