EZEQUIEL 14 - Quichua Chimborazo Bible

Rurashcalla dioscunata yuyarijcuna Ezequielta tapugrijpi llaquichishcamanta

1Israelcunapuramanta tauca cunaj yuyajcunami ñucapajman shamushpa, ñuca ñaupajpi tiyarircacuna.

2Chaipimi Mandaj Diosca ñucataca cashna nirca:

3“Huañujlla aichayuj runa, cai runacunaca rurashcalla dioscunatami paicunapaj shungupica charicuncuna. Paicunaca millaita rurachichijcunapimari, paicunapaj ñahuitapish churashcacuna. Chashna rurajcunataca ¿maitataj ñucata tapunaman shamuchunca saquishari?

4Chaimanta paicunamanca cashna huillangui: Mandaj Diosca cashnami nin: Israelcunapuramanta maijanpish rurashcalla dioscunata quiquin shungupi charicushca jahua, millaita ruranallapi paipaj ñahuita churashca jahua, ñuca ima nishcata huillaj runata tapunaman shamujpica, Mandaj Dios ñucallatajmi paicuna ima shina cashcataca cutichisha ninmi.

5Rurashcalla dioscunata adorashpa, ñucamanta anchurij israelcunapaj shungupica ñucami yuyachisha.

6Chaimanta israelcunamanca cashna huillangui: Mandaj Jatun Diosca cashnami nin: Cancunapaj rurashcalla dioscunata saquishpa ñucapajman cutirichij, cancunapaj ñahuicunatapish millaita ruranamanta anchuchichij ninmi.

7Israelcunapurallamantataj cashpapish, caru llajtamanta shamushpa Israel llajtapi causacuj cashpapish, ñucamanta anchurishpa rurashcalla dioscunata paipaj shungupi charicungachari. Shinallataj millaita ruranallapi paipaj ñahuita churashca cangachari. Chai jahua ñuca ima nishcata huillaj runata imatapish ñucamanta tapunaman shamujpica, Mandaj Dios ñucallatajmi cutichisha.

8Chai runahuanca p'iñarishpami, ñuca agllashcacunapuramanta anchuchishpa, paitaca shujtajcuna ricushpa chanzata rurashpa asina cachun churasha. Chashna rurajpimi ñucataca, Mandaj Diostaj cashcataca yachanguichij.

9Ima tucunata huillajca, umajpi llullangachari. Chashna rurajpica, Mandaj Dios ñucallatajmi imatapish umashpa huillachircani. Paitaca ñuca agllashca israelcuna ricucunpimi chingachisha.

10Chashnami ima tucunata tapuj runapish, ima tucunata huillaj runapish millaita rurashcamantaca, ishquindij llaquita apangacuna.

11Israelcunataca ñucamanta ama ashtahuan anchurichun, ama ashtahuan c'ariyashpa millaita rurashpa mapayachunmi llaquichisha. Paicunaca ñuca agllashcacunami canga, ñucapish paicunapaj Diosmi casha” ninmi Mandaj Jatun Diosca.

Jerusalenta llaquichinataj cashcamanta

12Mandaj Diosca ñucataca cashnami nirca:

13“Huañujlla aichayuj runa, cai llajtapi causajcuna ñucata shitashpa yallitaj millaita rurashpa mana cazujcunataca, ñucallatajmi llaquichisha. Micunatapish quichushpami, paicunamanca yaricaita cachasha. Runacunatapish, animalcunatapish cai llajtamantaca chingachishami.

14Noepish, Danielpish, Jobpish, paicunallami cashcata rurajcuna carca. Paicunallami cai llajtamantaca cashcata rurajcuna cashcamanta quishpirinman. Mandaj Jatun Diostajmi chashna nini.

15Shinallataj cai llajtamanca p'iña animalcunata cachashpa llaquichicujpica, chai animalcunapaj chaupitaca pipish mana pasai tucunmanchu. Cai llajtaca shitashcami saquirinman.

16Chai quimsa runacuna cai llajtapi cashpapish, paicunapaj churicunatapish, ushushicunatapish mana quishpichi tucunmanchu. Ashtahuanpish paicunallami quishpirinman. Chashnami cai llajtaca, llaquinayaj saquirinman. Causaj Mandaj Jatun Diostajmi chashna nini.

17Mana cashpaca espadata cai llajtaman apamushpaca: Espada, cai llajtapi causaj runacunatapish, animalcunatapish huañuchi nishpa huañuchichicujpica,

18chai quimsa runacuna cai llajtapi cashpaca, paicunapaj quiquin churicunatapish, ushushicunatapish mana quishpichi tucunmanchu. Ashtahuanpish paicunallami quishpirinman. Causaj Mandaj Jatun Diostajmi chashna nini.

19Mana cashpaca chai llajtapi causajcunaman jatun ungüita cachashpa, runacunatapish, animalcunatapish ñuca jatunta p'iñarishpa huañuchicujpica,

20Noepish, Danielpish, Jobpish cai llajtapi cashpaca, paicunapaj churillatapish, ushushillatapish mana quishpichi tucunmanchu. Ashtahuanpish cashcata rurajcuna cashcamantaca, paicunallami quishpirinmancuna” ninmi causaj Mandaj Jatun Diosca.

21Chaimantami Mandaj Jatun Diosca cashna nin: “Jerusalenta llaquichingapajca, chuscu jatun llaquicunatami cachasha. Chai pueblopi causaj runacunata, animalcunata huañuchingapaj espadatapish, yaricaitapish, p'iña animalcunatapish, jatun ungüicunatapishmi cachasha.

22Chashna llaquichicujpica, chai pueblopi causajcunapaj churi, ushushicunamanta ashacunallami saquiringa. Paicunami prezu apashca cashpapish, cancunapajmanca shamunga. Chaipimi paicuna ima shina causashcatapish, imata rurashcatapish ricunguichij. Jerusalentaca ñuca tucui laya llaquichishcamantapish, paicunami cancunataca cushichingacuna.

23Paicuna ima shina causashcata, imata rurashcata ricushpami cushicunguichij. Chashna rurashcata ricushpami, chai pueblopi causajcunataca mana yangamanta llaquichishcata yachanguichij” ninmi Mandaj Diosca.