2 SAMUEL 11 - Quichua Chimborazo Bible

Davidpish Betsabé huarmipish

1Chai q'uipa huataca cashnami tucurca: Cozicha punllacuna tucurijpi jatun mandajcuna macanacuiman llujshina punllacunapimi Davidca Joabtaca paipajta rurajcunandij, tucui israelcunandij cachajpi amonitacunata ñutuchishca q'uipaca, Rabá pueblo muyundijpi shayarircacuna. Davidca Jerusalenllapitajmi saquirirca.

2Shuj punlla ña chishiyacujpimi Davidca, paipaj camamanta jatarishpa, pai mandashpa tiyana huasi jahuata pambajllata rurashcapi puricushpa, shuj huarmi armacujta ricurca. Chai huarmica sumajmi carca.

3Chai huarmi pi cashcata David tapunaman cachajpi tapumujcunaca: “Chai huarmica Eliampaj ushushi Betsabé, heteo Uriaspaj huarmimi cashca” nishpami huillarcacuna.

4Davidca huillashpa purijcunata chai huarmita pushanaman cachajpimi paicuna pushamujpi Davidca, chai huarmihuan chayarinacurca. Chai q'uipaca chai huarmica paipaj huasiman rircallami. Paica quilla ungüi pararishca q'uipa mapa illajlla cangapaj maillarishcami carca.

5Chai huarmica chichu saquirishpami, David yachachun: “Chichumari cani” nishpa huillanaman cacharca.

6Chaimi Davidca: “Heteo Uriasta ñucapajman cachai” nishpa Joabman huillachun cacharca. Joabca Uriastaca Davidpajmanmi cacharca.

7Urías paipajman ña chayajpica Davidca: Joab ima shina cashcata, soldadocunapish ima shina cashcata, macanacuipish ña imapi cashcatami tapurca.

8Chai q'uipami Davidca Uriastaca: “Cambaj huasiman rishpa chaquicunata maillagri” nirca.

Jatun mandajpaj huasimanta Urías llujshishpa rigrijpica, jatun mandaj micuna sumaj micunatami convidashpa cacharca.

9Uriasca paipaj huasimanca mana rircachu. Jatun mandajpaj huasi pungullapitajmi paipaj amo Davidpajta rurajcunahuan dormirca.

10Uriasca mana paipaj huasiman rishcachu nishpami Davidman yachaj chayachircacuna. Chaimi Davidca:

–Canca carumanta shamushca cashca jahuaca, ¿ima nishpataj mana cambaj huasiman rircangui?– nishpa tapurca.

11Chaimi Uriasca Davidtaca:

–Diospaj arcapish, israelcunapish, judacunapish carpa huasicunallapimi tiyacuncuna. Ñuca amo Joabpish, can jatun mandajpajta rurajcunapish pamballapimi dormicuncuna. Chashna cashca jahuaca ñucallachu ñuca huasiman rishpa alli micushpa, ubyashpa, ñuca huarmihuan dorminaman risha. Can jatun mandajpaj ñaupajpimi nini, chaitaca manataj rurashachu– nirca.

12Chaimi Davidca Uriastaca:

–Cunanhuan caipi saquiri, cayaca cachashallami– nijpi Uriasca cayandij punllacama Jerusalenpi saquirirca.

13Uriastaca Davidca paihuan micuchun machangacama paihuan ubyachunmi cayarca. Chai chishipish paipaj amopajta rurajcunahuanmi, pai dorminallapitaj dorminaman rirca. Paipaj huasimanca manataj rircachu.

14Cayandij tutamantaca Davidca Joabpaj shuj quillcata quillcashpami chai quillcataca Uriasllamantaj cacharca.

15Chai quillcapica: “Uriastaca ashtahuan sinchita macanacuna puntapi churashpa, paillata saquishpa huashaman tigraichij, chai macanacuipi chugririshpa huañuchun” nircami.

16Chaimi Joabca, chai pueblo muyundijpi macanacungapaj shayachicushpaca, Uriastaca ashtahuan c'ari c'ari macanacujcuna shayacunpi churarca.

17Chai pueblopi causajcuna macanacunaman llujshishpa, Joabhuan macanacujpimi Davidpajta rurajpaj maijan soldadocunapish chaipi huañurca. Heteo Uriaspish huañurcami.

18Chashna rurashpaca Joabca, chai macanacui ima shinalla cashcatami Davidman huillaj cacharca.

19Chai huillashpa purijta huillanaman cachacushpaca: “Cai macanacuipi ima shinalla cashcata tucui huillajpi,

20jatun mandaj p'iñarishpa cashna tapungachari: Macanacungapajca chai pueblomanca ¿ima nishpataj yallitaj c'uchuyarcanguichij? Manachu yacharcanguichij paicunaca chai pirca jahuamanta imatapish shitashpa huañuchina cashcataca ningachari.

21Jerobaalpaj churi Abimelectaca ¿Pitaj huañuchirca? ¿Manachu shuj huarmilla pirca jahuamanta cutana molino mirga rumita shitashpa huañuchirca? Tebes pueblopica pircaman yalli c'uchuyashcamantami chashna huañurca. Chashna cana cashcamanta ¿imapajtaj pircamanca yalli c'uchuyarcanguichij? ningachari. Shina nijpi canca: Cambajta ruraj heteo Uriaspishmari huañun ningui” nircami.

22Chai huillashpa purij rishpa Davidpajman chayashpaca, Joab imallata huillanaman cachashcatami tucuita huillarca.

23Huillashpa purijca Davidmanca:

–Ñucanchijta mishacuj shinami tucurcacuna. Chashna cajpipish ñucanchijmari paicunataca mishashpa, puebloman yaicuna pungucama tigrachishpa cacharcanchij.

24Chashna cajpipish flechata shitajcunamari pirca jahuamanta cambajta rurajcunata flechacunahuan shitarcacuna. Chaimari can jatun mandajpajta ruraj maijancunaca huañuncuna. Cambajta ruraj heteo Uriaspishmi huañun– nircami.

25Chaimi Davidca huillashpa purijtaca:

–Joabmanca cashna ningui: Chashna tucushcamantaca ama yallitaj llaquirichu. Chashnallatajmi espadaca huaquinpica shujta perdichin, huaquinpica shujta mishachin. Canca ashtahuan c'ari c'ari tucushpa chai pueblopi causajcunataca paicuna chailla ningacama macanacunguilla ninmi ningui. Canpish ashtahuan animachilla– nishpami cacharca.

26Uriaspaj huarmica paipaj cusa huañushcata yachashpaca, huañushcamanta llaquilla cana cashca shinallataj llaquillami carca.

27Llaquilla cana punllacuna ña tucurijpica, Davidca chai huarmita paipaj huasiman pushamuchun cachajpimi paipaj huasiman pushamurcacuna. Chai huarmica Davidpaj huarmimi tucurca. Paica Davidpajtaca, shuj c'ari huahuatami huacharca. David chashna rurashcaca, Mandaj Diospajca manataj pai munashcachu carca.