EZEQUIEL 22 - Quichua Chimborazo Bible

Jerusalenpi causajcunapaj juchacunamanta

1Mandaj Diosca ñucataca cashnami nirca:

2“Huañujlla aichayuj runalla, yahuarta jichachij runacuna causana pueblopi causajcuna imalla rurashcataca, canmi ricuna cangui. Shinallataj paicuna tucui imalla millananacunata rurashcatapish canmi ricuchina cangui.

3Paicunamanca cashna ningui: Mandaj Jatun Diosca cashnami nin: Yahuarta jichachij runacuna causana pueblopi causajcunaca llaquichishca cangapajmi, dioscunata rurashpa mapayancuna. ¡Cancunata llaquichina punllaca, ñamari pajtamushca!

4Cancunaca huañuchishcamantami, juchayuj tucushcanguichij. Cancuna rurashca dioscunahuanmi mapayarcanguichij. Chashna rurashpami, cancunapaj punllataca quichquiyachishcanguichij. Chaimantami cancuna tucurina huata chayamushca. Cancunataca pingachishca cachunmi shujtaj llajtacunaman curcani, shujtaj llajtapi causajcunami chanzata rurashpa asingacuna.

5Cantaca mapayashcata ricushpa llaquinayaj tucushcata ricushpami c'uchullapi causajcunapish, carupi causajcunapish asingacuna.

6Riquichigari Israel llajtata mandajcunaca, paicuna mandaj cashcallamantami huañuchichincuna.

7Paicunaca yayatapish, mamatapish p'iñarcacunami. Caru llajtamanta shamujcunatapish llaquichircacunami. Yaya mama illajtapish, viudatapish imalla charishcatapish quichurcacunami.

8Ñucapajlla altarcunatapish millarcacunami. Ñuca samana punllacunatapish, yangatami rurarcacuna.

9Chashna yangamanta juchachishpa huañuchijcunapish, lomacunapi tiyaj altar c'uchucunapi micujcunapish, yallitaj millaita rurajcunapishmi carcacuna.

10Quiquin yayapaj huarmihuanmi huainayarcacuna, quilla ungüihuan ungushca huarmihuanmi chayarircacuna.

11Tucuicunallatajmi shujtajpaj huarmihuan, millanana juchata rurarcacuna, quiquin nuerahuanpish millai munaita rurashpa mapayachircacunami. Shinallataj yayamanta lapanitapish japirircallami.

12Huañuchingapajpish achca cullquitami chasquircacuna. Cullquita mañachishpapish, huahua cullqui jahuami curcacuna. Huahua cullquitapish yallitajmi cobrarcacuna. Shujtajcunatapish shuhuashpami yallitaj llaquichircacuna, ñucatapish cungarircacunami. Mandaj Jatun Diostajmi chashna nini.

13Riquichij, cancunallatajmi yallitaj shuhuashpa causarcanguichij. Cancunapurallatataj huañuchishpami, yahuarta jicharcanguichij. Chaimantami cancunataca llaquichigrini.

14Cancunapaj shunguca ¿manachu manchan imamí? ¿Ñuca llaquichicui punllapica, cancunapaj maquicunaca fuerzasapachu canga? Mandaj Dios ñucatajmi chashna rimani, chaitaca pajtachishatajmi.

15Cancunataca shujtaj llajtacunaman caita chaitami cachasha. Shinallataj cancunamantaca millaita rurashcacunatapish tucuitami chingachisha.

16Cancunallataj millaita rurashcamantami, shujtaj llajtacunapi causajcunapajca p'iñashca causana canguichij. Chashna rurajpimi ñucataca, Mandaj Diostaj cashcataca yachanguichij” nircami.

17Mandaj Diosca ñucataca cashnapishmi nirca:

18“Huañujlla aichayuj runalla, israelcunaca ñucapajca cullquimanta llujshishca mapacuna shinami tucushcacuna. Cullquita hornopi churashpa yacuyachicujpi llujshishca bronce shina, estaño shina, fierro shina, plomo shinami tucuicuna tucushcacuna.

19Chashna cajpimi, Mandaj Jatun Diostaj cashna nini: Tucuicuna yangacuna tucushca cajpipish, cancunataca Jerusalenpimi tandachisha.

20Ima shinami cullquitapish, broncetapish, fierrotapish, plomotapish, estañotapish tandachishpa hornopi ninata japichishpa yacuyachin, chai shinallatajmi cancunatapish chai pueblollapitaj tucuicunata tandachishpa yacuyachisha.

21Cancunata tandachishpami, lunyacuj ñuca ninataca cancunapaj jahuapi p'iñarishpa japichisha. Chai ninapimi, tucuicuna yacuyanguichij.

22Ima shinami hornopi cullquita yacuyachin, chashnallatajmi cancunapish Jerusalén pueblopica yacuyanguichij. Chashna rurajpimi Mandaj Dios ñuca, jatunta p'iñarishpa cancunaman llaquita cachashcataca yachanguichij” nircami.

23Mandaj Diosca ñucataca cashnapishmi nirca:

24“Huañujlla aichayuj runalla, israelcuna causana llajtataca cashna ni: ¿Canca mana mapa illaj llajtachu cangui? Ñuca p'iñarishpa llaquichicui punllapica, tamyapish mana tiyangachu.

25Ñuca ima nishcata huillajcunapish shuj yuyailla tucushpami, p'iña león aichata japij shina runacunataca huañuchircacuna. Haciendacunatapish, imalla charishcacunatapishmi quichurcacuna. Cai llajtapica, achcacunami viuda saquirircacuna.

26Curacunapish ñuca mandashcacunata p'aquircacunami, ñucapajlla altarcunatapish mapayachircacunami. Imalla ñucapajlla ch'icanchishca cashcatapish, imalla mana ñucapaj ch'icanchishca cashcatapish, imalla mapa cashcatapish, imalla mana mapa cashcatapish manamari ch'icanpi charircacunachu. Ñuca samana punllacunatapish mana yuyarircacunachu. Chaimantami ñucataca yangapi charircacuna.

27Paicunata mandajcunaca shuhuashpalla imatapish japingapajmi, aichata mashcashpa purij atujcuna shina runacunata chaparashpa huañuchishpa chingachircacuna.

28Shinallataj paicunapaj huillajcunapish lodohuan patata tapachij shinami: Mandaj Jatun Diosmi chashna nin nishpa yangamanta llullashpa huillarcacuna. Mandaj Dios ñucaca manapish paicunamanca imata nircanichu.

29Cai pueblopi causajcunaca llaquichina yuyaihuan, shuhuana yuyaihuan, llullana yuyaillahuanmi causarcacuna. Llaquita apacujtapish, imata mana charijtapish llaquichijcunami carcacuna. Shujtaj llajtamanta shamujtapish yangamantami llaquichircacuna.

30Cai llajtata ama llaquichichun nishpa ñuca ñaupajpi jarcashpa pata tunirishcapi shayarichunmi, israelcunapuramanta shuj runata mashcarcani. Chaita ruraj runataca manamari japircanichu.

31Chaimanta ñuca p'iñarishcataca, paicunapaj jahuapimi tallircani. Jatunta ñuca p'iñarishpami, paicunataca tucuchircani. Paicunapaj mapa causaimantaca, paicunallatatajmi llaquichircani” ninmi Mandaj Jatun Diosca.