GÁLATAS 4 - Quichua Chimborazo Bible

1Caitapishmi nisha nini: Herenciata japij huahuaraj cashpaca, tucui charishcacunapaj dueño cashpapish, amopajta ruraj shinallatajmi.

2Chashna cashpami, yaya ricuchina punlla pajtangacama ricujcunapaj, cuidajcunapaj ucupiraj.

3Ñucanchijpish huahuaraj cashpaca, cai pachapaj yanga yachachishcacunallapimi esclavocuna carcanchij.

4Ashtahuanpish cachana punlla pajtajpica, Diosca paipaj churitami cacharca. Paica Mandashca ucupimi, shuj huarmimanta huacharirca.

5Mandashca ucupi ñucanchij cajpimi, paipaj huahuacuna tucuchun randishpa cacharichingapaj cacharca.

6Chaimantami paipaj huahuacuna canguichij. Diosca cancunapaj shungucunamanca paipaj Churipaj Espiritutami cacharca. Paimi: “¡Ñuca Yayitu!” nishpa caparicun.

7Chaimanta ña mana esclavochu cangui. Ashtahuanpish Diospaj huahuami cangui. Paipaj huahua cashpaca, Cristomanta Diospaj herenciatapish japijmi cangui.

Esclavo canaman ama tigrachun yuyachishpa rimashcami

8Ñaupaca, Diosta manaraj rijsishpaca, manapish dioscunapajtami rurajcuna carcanguichij.

9Ashtahuanpish cunanca ña Diosta rijsijcuna, Dios rijsishcacuna cashca jahuaca ¿ima shinataj irquicunapaj, imatapish mana rurai tucuj huajchacunapaj esclavo tucungapaj cutin tigrashun ninguichij?

10Punllacunata, quillacunata, fiestacunata, huatacunatapish yuyaricunguichijrajmi.

11Chaimantami cancunapurapi, ñuca trabajashca yanga tucunata manchani.

12Huauquicuna, cancunapish ñuca shina tucuchunmi rogani. Ñucapish cancuna shinami tucurcani. Ñucataca imata mana llaquichircanguichijchu.

13Alli huillaita cancunaman callaripi huillashpaca, aichapi ungushca cashpapishmi huillarcani. Chaitaca cancunallataj yachanguichijmi.

14Ñuca cuerpopi ungushca pruebahuan cajpipish mana yanganchircanguichijchu, mana p'iñarcanguichijchu. Chaipaj randica, Diospaj angelta shina, Cristo Jesusta shinami chasquircanguichij.

15¿Maipitaj chashna cushicuita charishcaca? Caitami cancunamanta huillani. Ima shina llujshichishpa cunalla cajpica, cancunapaj ñahuitapish llujshichishpa cuna shinami carcanguichij.

16¿Mana llullashpa nishcamantachu, cancunata p'iñaj tucushcani?

17Mana cancunapaj allipajchu cancunataca munancuna. Ashtahuanpish cancunataca ñucanchijmanta ch'icanyashpa paicunata catijcuna cachunllami munancuna.

18Alli caimanta c'uyaita ricuchishpa catinaca allimi. Mana ñuca cancunahuan cajllapi c'uyaitaca ricuchinachu canguichij.

19Ñuca huahuacunalla, cancuna Cristo shina tucungacamami, cancunamantaca huachana nanaicunahuan shina cutin llaquita apacuni.

20Cancunamanta imata mana ruraipaj cashpami, shujtaj shina yuyachingapaj cunanllataj cancunahuan canata munani.

Saramanta Agarmanta ch'imbapurashpa parlashcami

21Mandashca ucupi casha nijcuna, ñucaman huillaichij: ¿Mandashcataca manachu uyashcanguichij?

22Abraham ishqui huahuacunata charishcamantaca, cashnami quillcashca tiyacun: Shujtaca, esclava huarmipi caishujtaca quiquin huarmipimi charirca.

23Esclavamantaca aicha munaimantami huacharirca. Ashtahuanpish quiquin huarmimantaca, Dios cusha nishca pajtajpimi huacharirca.

24Chaicunaca, ch'imbapurashpa parlashcami. Chai huarmicunaca ishqui cutin ari ninacushcatami ricuchin. Shujca Sinaí urcupi cushca, nisha ninmi. Chaica Agarmi. Paimi esclavocuna cachun huahuacunata cun.

25Agar huarmica, Arabiapi tiyaj Sinaí urcu shinami. Sinaí urcu shinaca, cunan Jerusalenmi. Jerusalenmi cunanca, paipaj huahuacunandij tandalla esclavocuna.

26Ashtahuanpish jahua pachapi caj Jerusalenca, tucui ñucanchijpaj mamami. Paica mana esclavachu.

27Cashnami quillcashca tiyacun:

“¡Cushicui, mana chichuj, mana huachaj.

Canca huachana nanaita mana charishcamanta jatunta cushicushpa capari!

Shitashca huarmipajca, cusayuj huarmipajta yalli achca huahuacunami” ninmi.

28Chaimanta huauquicuna, ñucanchijca Isaac shinamari, Dios cusha nishcamanta huahuacuna canchij.

29Ashtahuanpish aicha munaimanta huacharishcaca, Espiritumanta huacharishcatami catirashpa llaquichirca. Cunan punllacunapish chai shinallatajmi.

30Ashtahuanpish ¿Quillcachishcaca ima nintaj?: “Esclavataca, paipaj churindij llujshichishpa cachai. Esclavapaj churica, quiquin huarmipaj churihuanca, herenciata mana japingachu” ninmi.

31Chaimanta huauquicuna, mana esclavapaj huahuacunachu canchij. Ashtahuanpish quiquin huarmipaj huahuacunami canchij.