FILIPENSES 2 - Quichua Chimborazo Bible

Runa shinalla tucujpimi Cristotaca jatunyachishca

1Chaimanta, Cristomanta cushicuna, c'uyaihuan animachina, Espiritumanta shuj yuyailla cana, ucu shungumanta c'uyanacuna, llaquij canapish tiyajpica,

2chai shinallataj cashcata yuyashpa, chai c'uyaillahuantaj c'uyanacushpa, shuj munailla, shuj shinalla yuyashpa ñucata ashtahuan cushichipaichij.

3Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun tucushpa caishujcunaca canta yalli cashcata yuyashpa, caishuj chaishuj c'uyanacuichij.

4Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij.

5Cristo Jesuspi tiyashca shinallataj cancunapipish cai yuyai tiyachun:

6Paica, Dios shinallataj cashpapish, imata chariraj shina, Dios shina canataca mana munaj shinami carca.

7Chaipaj randica, paillatajmi tucuita saquishpa servij shina tucurca.

Runacuna shinallatajmi tucurca.

8Runa caj shinallataj tucushpami, paillataj mana jatun tucurca.

Huañungacama Diosta cazushpami, cruzpi huañurca.

9Chaimantami Diospish, tucui ima tiyajcunapaj jahuapi jatunyachirca.

Tucui shuticunapaj jahuapi shuj jatun shutitapishmi curca.

10Jahua pachapi cajcuna, cai pachapi cajcuna, allpa ucupi cajcunapish tucuicuna Jesuspaj shutipi cungurichunmi chai shutitaca curca.

11Dios Yaya sumajyarichunca tucui c'allucunami Jesucristotaca Mandajmi nishpa huillangacuna.

Cai pachapi achijyachijcunami canguichij nishcami

12Chaimanta ñuca c'uyashcacunalla, cazucujlla cashca shinallataj cazucuichijlla. Ama ñuca chaipi cajllapi cazujcuna caichijchu. Ashtahuanpish cunancarin ñuca mana chaipi cajpica, ashtahuan alli cazujcuna caichij. Cancunaca quishpichishca cashcamanta manchaihuan, chujchuihuan causaichij.

13Allita ruranatapish, allita munanatapish Diosmi pai munashcamanta cancunapica rurachicun.

14Ama huashalla parlanacushpa, ama rimanacushpa tucui imatapish alli ruraichij.

15Mana alli shungu, millai runacunapaj chaupipica, Diospaj huahuacuna mapa illaj, pi mana juchachipaj alli shungu caichij. Paicunapaj chaupipica cai pachapi achijyachijcuna shina achijyachichij.

16Ñuca purishca, ñuca trabajashca ama yanga cachun. Cristo shamui punllapi ñuca cushicungapaj, causaipaj shimita chariraichij.

17Cancuna crishcamantaca, ñuca sacrificacushca jahuapi, ñucata huañuchina cajpipish, tucui cancunahuanmi cushicuna shinataj cushicuni.

18Chai shinallataj cancunapish, ñucahuan cushicuna shinataj cushicuichij.

Timoteopish Epafroditopish

19Ñucapish cancuna ima shina cajta yachashpa, ashtahuan animaringapajmi, Mandaj Jesús munajpica, Timoteota cancunapajman utca cachasha nicuni.

20Ñuca yuyashca shina yuyajtaca, pi shujtajta mana charinichu. Pai shina cancunamanta sustarijtajca mana tiyanchu.

21Tucuicunami paicunapaj allipajlla mashcancuna, Cristo Jesuspajca mana yuyancunachu.

22Ashtahuanpish pai alli cashcataca ñami yachanguichij. Yayandij churindij shinami, alli huillaipica servircanchij.

23Chaimantami paita cachanata yuyacuni. Ñuca ima tucuna cashcata yachanga camallami shuyacuni.

24Ñucapish cancunapajman utca rinatami Mandaj Jesuspi shunguta churashpa shuyacuni.

25Chashna yuyacushpapish Epafroditota cancunapajman ña cachanami, ñucapajca allitaj yuyachirca. Paica ñucata ayudaj, alli huillanapi tandalla macanacuj ñuca huauquimi. Paitami cancunaca ñucapaj ima illashcacunata ayudachun cachashca carcanguichij.

26Paica tucui cancunata ricuna munaitami achcata charirca. Pai ungushcata cancuna yachaj chayashca cajpimi, achcata llaquirirca.

27Paica ungushcataj huañunallami carca. Chashna cajpipish, Diosmi paitaca llaquirca. Mana paillatachu llaquirca, ashtahuanpish llaquicunata ama jahuanpi jahuanpi charichunmi, ñucatapish llaquirca.

28Ñucapish ama ashtahuan llaquilla cangapajmi, cancuna cutin ricushpa cushicuchun, utcashpa cachasha nini.

29Paitaca tucui cushicuihuan Mandaj Jesuspi chasquichij. Pai shinacunahuapish c'uyaita charichij.

30Paica Cristopajta ruracushcamantaca huañunallami carca. Cancuna ñucaman mana servi tucujpimi, paipaj aicha ungüi tucushpapish cancunapaj randi servirca.