ESDRAS 3 - Quichua Chimborazo Bible

Altarta ña rurashpaca cutin Diospajta rurai callarishcami

1Israelcuna tigrashpaca paicunapaj pueblocunallapitaj ña causacushpami huatapaj canchis quilla chayajpica, tucuicuna shuj shinalla Jerusalenpi tandanacurcacuna.

2Chaipimi Josadacpaj churi Jesuaca, caishuj curacunandij, Salatielpaj churi Zorobabelpish paipaj familiacunandij tucushpa israelcunata Mandaj Diospaj altarta shayachina tucurcacuna. Diospaj runa Moisés mandashpa quillcashcapi nishca shinallataj chai altar jahuapi Mandaj Diosman cushpa tucui rupachingapajmi chashna rurarcacuna.

3Muyundij llajtacunapi causajcunata manchacushpapish ñaupaman tiyashcallapitaj altartaca alli sinchita shayachircacuna. Chai altarpica tutamantapish, chishipish Mandaj Diosman cushpa tucui rupachishpa cuna cashcatami punllanta cujcuna carca.

4Mandashcapi quillcashca shinallatajmi israelcunaca Diosta yuyaringapaj yura ramacunahuan chugllacunata rurashpa fiestata rurarcacuna. Chaipica punllanta ima shina cuchun nishca shinallatajmi Diosman cushpa tucui rupachij carca.

5Chai jahuami punllanta Diosman cushpa tucui rupachinacunatapish, mushuj lunapi cuna cashcatapish, Mandaj Diospajlla ch'icanchishca punllacunapi cuna cashcatapish, maijancuna Diosman cusha nishcamanta cushcacunatapish, Mandaj Diosman cusha nishcamanta cushca ofrendacunatapish curcacuna.

6Huatapaj canchis quilla punta punllamantami Mandaj Diosman cushpa tucui rupachina cashcacunataca cui callarircacuna. Mandaj Diospaj huasita callarinapaj callari rumicunataca manaraj churarcacunachu.

7Albañilcunaman, carpinterocunamanca cullquitami curcacuna. Líbano urcumanta cedro caspicunata mama cuchata Jopeman apamuchunca sidoniocunaman, tiriocunamanmi micunata, ubyanata, aceitetapish curcacuna. Chashna rurachunca Persia llajtata jatun mandaj Ciromi mandashca carca.

Diospaj huasita allichi callaringapaj callari rumicunata churashcami

8Jerusalenpi caj Diospaj huasiman tigramushca ña ishqui huata tucujpi huatapaj ishqui quillapimi, Salatielpaj churi Zorobabel, Josadacpaj churi Jesúa, paicunapaj caishuj familiacunapish, curacunapish, levitacunapish prezu apashca Jerusalenman tucui tigramushcacunami huasita allichi callarircacuna. Mandaj Diospaj huasita ima shinalla rurana cashcapi pushachunca ishqui chunga huata yallita charij levitacunatami churarcacuna.

9Chai pushajcunapurapica, Jesúa paipaj churicunandij, paipaj huauquicunandijpish, Cadmiel runa paipaj churicunandijpishmi carca. Paicunaca Judapaj huahua huahuapurami carca. Shinallataj Henadad runapish paipaj aillucunandij, quiquin huauquicunandijpishmi carca. Paicunaca levitacunami carca. Tucui paicunami Diospaj huasita ima shinalla rurana cashcata mandashpa rurachircacuna.

10Mandaj Diospaj huasita shayachi callaricuj albañilcuna callari rumicunata ña churajpica, curacunaca paicunapaj churanacunata churarishcami, trompetacunahuan shayarircacuna. Asafpaj huahua huahua levitacunaca israelcunata jatun mandaj David yachachishca shinallatajmi Mandaj Diosta alabangapaj cimbalocunahuan shayarircacuna.

11Chaipica Mandaj Diostaca: “Paica allimari. Israelcunata pai llaquishcaca huiñaipajmari” nishpami, cantashpa alabashpa pagui nircacuna. Mandaj Diospaj huasita cutin shayachingapaj callari rumita churashcamantami tucui chaipi cajcunaca jatunta cushicushpa Mandaj Diosta alabarcacuna.

12Ñaupaman caj Diospaj huasita ricuj achca curacuna, levitacuna, ñaupa yayacunamanta mirarishca quiquinpurallata mandajcuna, cunaj yuyajcunapish Mandaj Diospaj huasita cutin shayachingapaj callari rumita churajta ricushpaca, jatunta caparishpami huacarcacuna. Tucui shujtajcunapish jatunta cushicushpami caparircacuna.

13Paicuna yallitaj caparishca bullaca carucamami uyarirca. Shujcunaca caparishpa cushicushcata, shujcunaca llaquijllata huacacujta uyajcunaca imamanta chai bulla cashcataca mana yachai tucurcacuna.