EFESIOS 5 - Quichua Chimborazo Bible

Diospaj huahuacuna shina purichij

1C'uyashca huahuacuna cashcamanta, Diosta ricushpa catijcuna caichij.

2Cristo ñucanchijta c'uyashca shina, c'uyanacushpa purichij. Ñucanchijmantami paillataj curirca. Chaica Diospajca, paiman cushpa rupachishca mishquiman ashnacuj shinami carca.

3Ashtahuanpish cancunapurapica, apanacushpa causajcuna, tucui laya mapacuna, quiquinpajlla ashtahuan charij canata munajcunaca amataj uyarichunllapish. Jucha illajcuna cashcamantaca chai shinataj causaichij.

4Cancunaca pinganayaj shimicunata, manapish rimana shimicunata, mapa shimicunatapish ama rimanguichij. Chaicunaca mana allichu. Chaipaj randica Diosta pagui nichij.

5Maijanpish apanacushpa causaj, mapapi caj, mitsa cajpish, rurashcalla diosta catijllatajmi. Paicunaca Cristopish, Diospish mandanapica, ima japinata mana charishcataca yachanguichijmi.

6Maijanpish cancunataca yanga parlocunahuan ama umachun. Chashna mana allita rurashcamantami, Diosca p'iñarishpa paita mana cazujcunataca jatunta llaquichinga.

7Paicunapaj ruraicunapica amataj tandanacunguichij.

8Ñaupaca amsami carcanguichij. Ashtahuanpish Mandaj Jesuspica, cunanca achijmi canguichij. Chaimanta luzpaj huahuacuna shina purichij.

9(Espiritupaj granoca, tucuipi alli cajmi, cashcata rurajmi, mana llulla canapishmi).

10Chaimanta alli ricushpa, Mandaj Jesús munashcata ruranata agllaichij.

11Amsapaj yanga ruraicunapica, ama tandanacuichijchu. Chaipaj randica mana allita rurajcunataca shinchita rimaichij.

12Paicuna pacalla rurashcata huillanataca pingananpishmi.

13Luz achijyachijpica, tucui imapish ricuringami. Luzca tucuita ricuchij cashcamanta, tucuitami ricuchinga.

14Chaimanta:

“Dormicuj rijchari, huañushcacunapaj chaupimanta jatari.

Cristomi cantaca achijyachinga” ninmi.

15Riquichij, ima shina puricushcata alli yuyarichij. Ama ch'ahuancuna shina, ashtahuanpish yachajcuna shina caichij.

16Mana alli punllacunapi cashcamanta, allita rurana tiyajpica, allita ruraichij.

17Chaimanta ama yuyai illajcuna caichijchu. Ashtahuanpish Mandaj Jesuspaj munai ima cashcata entendijcuna caichij.

18Ama machaichijchu. Chaihuanca llaquimi tucun. Chaipaj randica Espirituhuan junda caichij.

19Cancunapura salmocunahuan, himnocunahuan, cantocunahuan yuyachinacushpa, cancunapaj shungucunapi, Mandaj Jesusta cantashpa alabaichij.

20Ñucanchijta Mandaj Jesucristopaj shutipi, Dios Yayata tucuimanta pagui nicuichijlla.

Caishuj chaishuj cazunacuichij

21Diosta manchashcamanta, caishuj chaishuj cazunacuichij.

22Cazadacunaca, Mandaj Jesusta shinallataj paicunapaj quiquin cusacunata cazuchun.

23Tandanacushca crijcunapajca, Cristoca umami. Chai shinallataj cusapish huarmipajca umami. Crijcunaca Cristopaj cuerpomi, paimi paicunapaj Quishpichij.

24Tandanacushca crijcuna Cristota cazuj shinallataj, cazadacunapish paicunapaj cusacunata tucuipi cazuchun.

25Cristoca tandanacushca crijcunata c'uyashpami, paillataj curirca. Chai shinallataj cusacunapish, quiquin huarmicunata c'uyaichij.

26Huillashca shimihuan yacupi maillashpa jucha illajta rurangapajmi, Cristoca chashna tucurca.

27Tandanacushca crijcunaca sumaj, imapi mana mapayashca, llambuglla, ima chai shinacunatapish mana charij, jucha illajta, mana mapayashcata ricuchingapajmi chashna tucurca.

28Chai shinallataj cusacunapish, quiquin cuerpota shina paicunapaj huarmicunata c'uyachun. Maijanpish paipaj huarmita c'uyajca, paillatajmi c'uyarin.

29Paipaj quiquin cuerpotaca, pi manataj p'iñanchu. Ashtahuanpish allimi micun, allimi cuidan, chashnallatajmi Cristopish tandanacushca crijcunapajca ruran.

30Ñucanchijca paipaj cuerpopaj miembrocunami canchij. Paipaj aichamanta, paipaj tullucunamantami canchij.

31Shinallatajmi c'arica, yaya mamata saquishpa, paipaj huarmihuan tandanacunga. Ishqui cashcamanta shujlla aichami tucunga.

32Cai huillashcaca, pi mana entendipaj jatunmari. Ashtahuanpish ñucaca Cristohuan, tandanacushca crijcunahuan ima shina cashcatami chashna nini.

33Chaimanta quiquin c'uyarij shinallataj, paicunapaj quiquin huarmitapish c'uyachun. Huarmipish, paipaj cusata respetachun ninimi.