NÚMEROS 14 - Quichua Chimborazo Bible

Mandaj Diosta israelcuna p'iñachishpa c'amishcami(Dt 1.26-33)

1Chaimi israelcunaca chai tutaca tucui tuta jatunta caparishpa huacarcacuna.

2Tucui israelcunami Moisestapish, Aarontapish juchachishpa tucuicuna cashna nircacuna: “¡Egiptopi huañushca cashparajchari alli canchijman carca! ¡Cai shitashca pambapi huañushparajchari alli canchijman!

3¿Ima nishpataj Mandaj Diosca cai llajtapi causajcunapaj espadapi huañuchunca pushamunchu imatagari? Ñucanchij huarmicunapish, ñucanchij huahuacunapish macanacuipi mishashpa japishcacuna cachunllamari pushamun. Chaipaj randica ¿manachu Egiptoman tigrana alli canman?” nishpami

4paicunaca: “Ñucanchijta pushachun shuj pushajta agllashpa Egiptoman tigrashunchij” nishpa, caishuj chaishuj ninacurcacuna.

5Moiseshuan, Aaronhuanca tandanacushca israelcunapaj ñaupajpimi cungurishpa pambaman tupajta cumurircacuna.

6Canaán llajtata rijsishpa tigramujcunapuramantaca, Nunpaj churi Josuehuan, Jefonepaj churi Calebllahuanmi yallitaj llaquirishpa paicunapaj churanacunata lliquirishpa,

7tandanacushca israelcunataca cashna nircacuna:

–Purij shinalla ñucanchij ricushca, rijsimushca llajtaca, yallitaj sumaj llajtamari.

8Mandaj Dios ñucanchijta munashpaca, paimari ñucanchijtaca chai llajtaman pushanga. Lechepish, sacha chuspipaj mishquipish yacu llujshicuj shina llajtataca paimari ñucanchijman cunga.

9Shina cashcamanta Mandaj Diosta c'ariyashpa ama p'iñachichijchu. Chai llajtapi causajcunataca ama manchaichijchu. Paicunataca ñucanchijca tandata micuj shinallami chingachishun. Paicunata ayudajca paicunamanta anchurishcami. Ashtahuanpish Mandaj Diosmari ñucanchijhuanca. Chaimanta ama manchaichijchu– nircacunami.

10Shina nijpipish, chai tucui israelcunami rumicunahuan shitashun nircacuna. Ashtahuanpish Dioshuan tupanacuna carpa huasipica, Mandaj Diosca paipaj sumaj cashcahuanmi tucui israelcunaman ricurirca.

11Chaipimi Mandaj Diosca, Moisestaca cashna nirca:

–Cai israelcunaca ¿maicamataj ñucataca p'iñachicungallari? Paicunapaj chaupipi cai tucui señalcunata rurajpipish ¿maicamataj ñucataca mana cringacunari?

12Paicunataca ñucami huañuchij ungüita cachashpa chingachisha. Shina cashpapish canmantami ashtahuan jatun llajtata, paicunata yalli c'ari c'aricunata rurasha– nijpimi

13Moisesca Mandaj Diostaca cashna nirca:

–Mandaj Dios, cai israelcunataca quiquinpaj tucuita rurai tucuj cashcahuanmi Egiptomanta llujshichimurcangui. Quiquin chashna rurajpica, egipciocunaca chaita yachaj chayashpa,

14cai Canaán llajtapi causajcunaman huillangacunamari. Canaanpi causajcunaca israelcunapaj chaupipica quiquin Mandaj Dios cashcatami uyashcacuna. Mandaj Dios quiquinca israelcunaman ñahui ñahui ricurishcatapish, quiquinpaj p'uyu israelcunapaj jahuapi cashcatapish, israelcunapaj puntapica punllaca shuj suni p'uyupi, tutaca lunyacuj suni ninapi quiquin ñaupashpa pushacushcatapishmi yachashcacuna.

15Cai israelcunata shuj runata huañuchij shinalla quiquin tucuita huañuchijpica, quiquin tucuita rurai tucuj cashcata uyaj llajtacunaca cashnami ningacuna:

16“Mandaj Diosca israelcunataca pai cusha nishca llajtaman mana yaicuchi tucushpamari, shitashca pambapi huañuchishca” ningacunami.

17Chaimanta cunanca Jatun Dios, imalla cusha nishcataca quiquin nishca shinallataj rurashpa quiquinca tucuita rurai tucuj cashcata ricuchihuai. Quiquinllatajmi cashna nircangui:

18Yayacunapaj juchamantaca churicunatami quimsa huahua huahuacunacama, chuscu huahua huahuacunacama llaquichini. Juchayujtaca mana juchayujta shinaca manataj saquinichu. Chashna cashpapish Mandaj Dios ñucaca mana utca p'iñarij, yallitaj jatunta c'uyaj cashcamantaca millaita rurashcatapish, c'ariyashcatapish perdonajmi cani nircanguimi.

19Chashna cashcamanta quiquinpaj yallitaj c'uyaihuan, cai israelcunata Egiptomantapacha perdonashpa pushamucushca shinallataj cunanpish paicuna millaita rurashcataca perdonailla– nircami.

Mandaj Diosca israelcunata llaquichishcami(Dt 1.34-40)

20Mandaj Diosca cashnami nirca:

–Ñucaca israelcunataca can nishca shinallatajmi perdonani.

21Shina cashpapish ñuca ima shinami causaj Dios cani. Chai shinallatajmi ñuca sumaj cashcapish tucui cai pachapi junda.

22Chaimanta Egiptopipish, shitashca pambapipish, ñuca tucuita rurai tucuj cashcata, tucui laya señalcunata rurashpa ricuchishca jahua ñuca rimashcata mana uyashpa, ashtahuanpish ñuca rurashcacunata mana cazushpa ñucata p'iñachijcunaca,

23paicunapaj ñaupa yayacunaman ñuca cushatajmi nishca llajtataca, pi mana ricungacunachu. Ñucata p'iñachijcunaca shujllapish manataj ricungacunachu.

24Ashtahuanpish ñucapajta ruraj Calebllatami caishujcuna shina mana yuyashpa ñucata catishcamanta pai rijsimushca llajtamanca yaicuchisha. Paipaj huahua huahuacunapish chai llajtata japishpa chaipimi causangacuna.

25Pugru pambacunapica amalecitacuna, cananeocunami causancuna. Chaimanta cayaca shitashca pambaman llujshishpa Puca Cuchaman rina ñanta japishpa tigrashpa richijlla– nircami.

26Mandaj Diosca Moisestapish, Aarontapish mandashpaca cashnami nirca:

27–Yallitaj millaita rurana yuyailla caj cai tucui achcacuna ñucata juchachishpa rimashcataca ¿maicamataj uyacushalla? Cai israelcuna ñucata juchachishpa rimashcataca ñami cai tucuita uyashcani.

28Paicunataca cashna ni: Ñucaca causaj Diosmi cani ninmi Mandaj Diosca. Cancuna ima shinami ñuca uyajta rimarcanguichij, chashnallatajmi ñucapish cancunataca rurasha.

29Cancunapaj cuerpoca cai shitashca pambapimi urmanga. Ishqui chunga huatayujmanta huichiman shuticunata quillcashcacuna, ñucata yanganchishpa rimajcunami chashna tucunga.

30Ñuca maquita alzashpa chai llajtapi cancuna causachun cushatajmi nishca llajtamanca, cancunapuramanta shujllapish mana yaicunguichijchu. Jefonepaj churi Calebhuan, Nunpaj churi Josuellahuanmi chai llajtamanca yaicunga.

31Cancunaca ñucanchij huahuacunataca macanacuipi mishashpami japinga nircanguichijmi. Ashtahuanpish paicunatami ñucaca chai llajtaman yaicuchisha. Mana alli llajtachu nishpa cancuna mana nishca llajtataca paicunami rijsingacuna.

32Ashtahuanpish cancunapaj cuerpocunaca cai shitashca pambapimi urmanga.

33Cancunapaj huahuacunaca cai shitashca pambapimi chuscu chunga huatacunata michishpa puringacuna. Cancuna c'ariyashcamantami paicuna llaquita apangacuna. Cancunapaj cuerpocuna cai shitashca pambapi chingaringacamami chashna puringacuna.

34Canaán llajtataca, chuscu chunga punllacunatami ricushpa rijsimurcanguichij. Chai shinallatajmi chuscu chunga punllamantaca chuscu chunga huatata llaquita apanguichij. Cada punllamanta shuj huatatami llaquita apanguichij. Chaipimi ñucata c'ariyajpica, ima shina llaquichij cashcata yachanguichij.

35Mandaj Dios ñucami chashna rimani. Cai tucuicuna tandanacushpa ñucata c'ariyaj millaicunataca chashnami rurasha. Cai shitashca pambapimi tucuicuna huañushpa chingaringacuna– nircami.

Canaán llajtata purij shinalla ricushpa tigraj chunga runacuna huañushcami

36Canaán llajtata rijsishpa tigrachun Moisés cachashcacuna tigrashpaca, chai llajtaca mana alli llajtami cashca nishpami, tandanacushca israelcunataca Diosta c'amichircacuna.

37Chai llajtaca mana alli llajtachu cashca nishpa huillaj runacunaca, Mandaj Dios llaquita cachajpimi paipaj ñaupajpi huañurcacuna.

38Chai llajtata ricushpa rijsimuchun cachashcapuracunamantaca Nunpaj churi Josuehuan, Jefonepaj churi Calebllahuanmi mana huañurcacuna.

Horma pueblopi macanacushpa israelcunata mishashcami(Dt 1.41-46)

39Israelcunaman tucui caicunata Moisés huillajpica, tucui israelcunami yallitaj llaquilla tucurcacuna.

40Cayandij tutamanta utcata jatarishpa urcu puntaman huichiyashpami cashna nircacuna:

–Juchallishcanchijmari. Mandaj Dios cusha nishca llajtaman huichiyangapaj, cunantajca ñami caipi canchij– nircacunami.

41Shina nijpi, Moisesca:

–Ima nishpataj Mandaj Dios mandashcata p'aquinguichij. Cancuna cunan chashna rurashcapish mana alli llujshingachu.

42Ama huichiyaichijchu. Mandaj Diosca ña mana cancunapaj chaupipichu. Cancunata p'iñajcunapaj maquipi huañungapajllaca ama huichiyaichijchu.

43Amalecitacuna, cananeocunami cancunapaj ñaupajpi. Cancunaca paicunapaj espadapimi urmanguichij. Cancunallataj Mandaj Diosta mana catishun nishcamanta Mandaj Diosca ña mana cancunapaj chaupipichu– nircami.

44Ashtahuanpish paicunaca paicuna nishcata rurashpami, urcu puntaman ashtahuan huichiyarcallacuna. Paicuna rijpipish Mandaj Dioshuan ari ninacushca quillcata huaquichina arcapish, Moisespish carpa huasicuna chaupimantaca mana rircachu.

45Chaipimi chai urcupi causaj amalecitacunapish, cananeocunapish uriyamushpa israelcunahuan macanacushpa chugrichishpa mishashpaca, Horma shuti pueblocama catircacuna.