1¡Taita Dios quishpichihuai.
Ñucataca yacu millpushpa huañuchigrinca!
2Ucujta caj guzupi huashicushcamari cani.
Maipi mana shayari tucuipajpimari cani.
Yacucuna ucujmanmari cani.
Callpacuj yacumari sirijta aisacun.
3Cayanataca shaicunimari.
Ñuca cungaca gangozuyanmari.
Taita Diosta shuyacushpalla ñuca ñahuicunapish shaicushcamari.
4Ñucata p'iñajcunaca ñuca uma ajchatapish yallimari mirarishcacuna.
Yangamantamari ñucataca p'iñancuna.
Ñucata p'iñajcunaca imatapish rurai tucujcunamari tucushca.
Yangamantamari ñucataca llaquichincuna.
¿Manapish shuhuashca cashpapish pagashachu?
5Taita Dioslla quiquinca ñuca yuyai illaj cashcataca rijsinguimi.
Ñuca juchacunaca quiquinpaj ñaupajpica mana pacallachu.
6Jatun Dios, tucuita Mandaj Dios quiquinpi shunguta churajcunaca, ñuca juchamanta ama pingaichishca cachun.
Israelcunapaj Taita Diosta mashcajcunaca ñuca juchamanta ama muspachishca cachun.
7Quiquinta c'uyashpami llaquicunata aparcani.
Ñahuita maipi mana churai tucujtamari pingarini.
8Ñuca huauquicunapajca shujtaj llajta runami carcani.
Ñuca mamapaj churicunapajca mana rijsishcami carcani.
9Quiquinpaj huasimantaca huañuricunica, tucuricunica.
Quiquinta p'iñashpa c'amishcacunaca ñuca jahuapimi urmarca.
10Huacashpa, ayunashpa llaquilla almahuanmi mañarcani.
Chaica ñucapajca chanzata rurashpa asinapajmi cashca.
11Cañamazu churanacunatapish churarircanimi.
Chaimi ñucaca ch'imbapurashpa parlacunalla tucurcani.
12Pueblo pungupi tandanacushcacunapish ñucata p'iñashpa rimarcacunami.
Machashcacunapish paicunapaj cantocunahuanmi chanzata rurashpa asincuna.
13Ashtahuanpish ñucaca quiquintami mañarcani.
Mandaj Dios ñucata quiquin llaquina punlla chayachun nishpa mañacunillami.
Taita Dios quiquinca yallitaj llaquijmi cangui.
Quiquinca quishpichinguitajmi.
Ñucata uyahuayari.
14Lodomanta llujshichihuai.
Lodopi millpurichunca ama saquichu.
Ñucata p'iñajcunamanta quishpichihuai.
Yacu ucujmanta quishpichihuai.
15Callpacuj yacucuna aparichun ama saquichu.
Ucujta caj jutcu millpuchun ama saquichu.
Jutcu paipaj shimita huichcashpa millpuchun ama saquichu.
16Mandaj Dios quiquinpaj c'uyaica jatunmari.
Chaimanta ñuca mañashcata cutichihuai.
Quiquinca yallitaj llaquijmari cangui.
Chai shinallataj ñucata ricuhuai.
17Quiquinpajta rurajpaj ñaupajmantaca quiquinpaj ñahuita ama pacahuaichu.
Ñucaca achca llaquilla cashcamanta utca uyahuai.
18¡Ñucapajman c'uchuyamui. Quishpichihuai!
¡Ñucata p'iñajcunamanta quishpichihuai!
19Quiquinca ñucata c'amishcata yachanguimi.
Ñucata pingaichishcata yachanguimi.
Ñucata llaquichishcata yachanguimi.
Ñucata p'iñajcunaca tucuicunamari quiquinpaj ñaupajpi.
20C'amishcamari ñuca shungutaca p'aquirca.
Ñucaca yallitaj llaquihuanmari cani.
Ñucata pi llaquingapishchari nishpa shuyarcanimi.
Pi mana tiyarcachu.
Cushichijcunata mashcashpapish pita mana japircanichu.
21Ashtahuanpish micunata caranapaj randica, hieltami curcacuna.
Yacunaihuan ñuca cajpipish vinagretami ubyachircacuna.
22Jatun micuita paicuna rurashcapish paicunallataj laziyarinapaj cashca cachun.
Allipajmi ruracunchij nishcapish ñitcarinapajlla cashca cachun.
23Paicunapaj ñahuicunata amsayachishca cachun.
Imata ama ricuchun amsayachishca cachun.
Paicunapaj huasha tullucunatapish punllanta chujchuchicuilla.
24Quiquinpaj p'iñaritaca paicunapaj jahuapi talliyari.
Nina sindirij shina quiquin p'iñarishcaca paicunata tucuchishca cachun.
25Pai causacunca shitashca saquirishca cachun.
Paipaj carpa huasicunapica pi ama causashca cachun.
26Quiquin chugrichishca runata catirashpa llaquichishcamanta chashna tucuchun.
Quiquin carachayachijpi nanaihuan cajta parlanacushpa ashtahuan nanaita mirachishcamanta chashna tucuchun.
27¡Quiquinpaj cashcata ruracunta ama chasquichun, pai millaita rurashca shinallataj llaquichiyari!
28¡Causajcunapaj libromantaca p'ichashca cachun.
Cashcata rurajcunahuanca ama quillcashca cachun!
29Ashtahuanpish llaquihuan, nanaihuan caj ñucataca quiquinpaj quishpichinahuan quishpichihuayari.
Taita Dios, jahuajman churahuayari.
30Ñucaca Taita Diospaj shutitami alabasha.
Cantocunahuanmi alabasha.
Alabashpami jatunyachisha.
31Chaicunaca huagrata cushpa rupachishcatapish yallimari, Mandaj Diostaca cushichinga.
Mana cashpaca gachucunayuj, pallca sillucunayuj bizita cushcatapish yallimari cushichinga.
32Mana jatun tucushcacuna chaita ricushpaca cushicungacunami.
Taita Diosta mashcaichij, quiquin shungupi causaita charinguichijmi.
33Mandaj Diosca huajchacunata uyanmi.
Paipaj cajcuna prezu cajpipish, mana yanganchinchu.
34¡Jahua pachapish, cai pachapish alabaichij.
Mama cuchapish, chaipi tucui imalla tiyajcunapish alabaichij!
35Taita Diosmari Siontaca quishpichinga.
Judá pueblocunatapish cutinmari shayachinga.
Chaipi causachunmi shayachinga.
Chai pueblotaca paicunami japingacuna.
36Quiquinpajta rurajcunapaj huahua huahuacunami chaitaca japingacuna.
Quiquinpaj shutita c'uyajcunami chaipica causangacuna.
Who We AreWhat We EelieveWhat We Do
2025 by iamachristian.org,Inc All rights reserved.
