SANTIAGO 5 - Quichua Chimborazo Bible

Achcata charijcuna llaquichicujpi rimashcami

1¡Achcata charijcuna, uyaichij! Cancunata llaquicuna japina cashcamanta huacaichij, caparichij.

2Cancunapaj charinacunaca ismushcami. Cancunapaj churanacunatapish polillacuna micushcami.

3Cancunapaj curipish, cullquipish p'ulasyashcami. Chai p'ulasyashcami cancuna ima shina cashcataca ricuchinga. Chaillatajmi cancunapaj cuerpocunatapish, nina shina tucui millpunga. Tucuri punllacunapajmi, chashna montonacunguichij.

4Cancunapaj allpacunamanta granocunata tandashpa trabajajcunamanca, umashpamari mana pagashcanguichij. Chaimantami paicunaca caparicuncuna. Tandajcunapaj caparishcacunaca, tucuita Mandaj Jatun Diospajmanmi uyarishca.

5Cancunaca cai pachapica munashcata cushicushpami, cacharishcacuna tucushpa causashcanguichij. Cancunapaj shungucunapish huañuchina punllapaj animal huirayaj shinami huirayashcanguichij.

6Cancunaca cashcata rurajtami, huañunami cangui nishpa huañuchircanguichij. Paica mana mitsarircachu.

Mana utca p'iñarij canamantapish, Diosta mañanamantapishmi

7Chaimanta huauquicuna, Mandaj Jesús shamungacama ama p'iñarishpalla shuyaichij. Chagraj runa ima shina shuyajta ricuichij. Paica allpamanta sumaj granota japingapajca mana p'iñarishpami, ñaupa tamya, q'uipa tamya p'ucuchijta shuyan.

8Mandaj Jesús shamunaca c'uchullapi cashcamanta, cancunapish sinchi crij tucushpa mana p'iñarishpa chai yuyailla shuyaichijlla.

9Huauquicuna, Dios ama llaquichichunca caishuj chaishuj mana allichu nishpa ama huillanacuichijchu. Riqui, ima shinalla rurashcata ricuchijca ña pungullapimi.

10Ñuca huauquicunalla, Jatun Diospaj shutimanta huillaj profetacuna mana p'iñarishpa llaquita apashca shinallataj, chaita ricushpa llaquita apaichijlla.

11Ñucanchijca llaquita apajcunataca, cushichishcacunami ninchijmi: Job llaquita apashcataca uyashcanguichijmi. Llaquita apashca q'uipa, Jatun Dios imata cushcatapish ricushcanguichijmi. Jatun Diosca yallitaj llaquij, mana p'iñarijmi.

12Ñuca huauquicunalla, cai tucuipaj q'uipaca jahua pacha nishpa, cai pacha nishpa, ima shujtajta nishpapish ama rimarichijchu. Chaipaj randica ama llaquichishca cangapaj, cancuna “ari nishcaca” ari cachun “mana nishcaca” mana cachun.

13Cancunapurapi maijan llaquilla cashpaca, Diosta mañaichij. Maijan cushilla cashpaca, Diosta alabashpa cantaichij.

14Cancunapurapi maijan ungushca cajpica, tandanacushca crijcunata cunaj yuyajcunata cayaichij. Mandaj Jesuspaj shutipi aceitehuan llihuishpa, paimanta Taita Diosta mañachun.

15Tucui shunguhuan crishpa mañajpica, Mandaj Jesusca chai ungushcataca alliyachishpa jatarichingami. Pai juchallishca cajpipish perdonangami.

16Chaimanta cancunapaj juchacunataca caishuj chaishuj huillanacuichij. Tucuicuna alliyachishcacuna cangapajca, caishujmanta chaishujmanta Diosta mañaichij. Cashcata ruraj tucui shunguhuan Diosta mañashcaca, imatapish rurai tucunmi.

17Eliasca, tucuipi ñucanchij shinallatajmi carca. Paica ama tamyachunmi tucui shunguhuan Diosta mañarca. Chaimi quimsa huata, sujta quillacunata cai pachataca mana tamyarca.

18Tamyata cachachun nishpa cutin mañajpica, Diosca tamyachircallami. Chaimi cai allpapica imapish alli p'ucurca.

19Huauquicuna cancunapuramanta maijan, mana llullamanta anchurishca cajpica, maijan paita tigrachijpish,

20caita yachachun. Juchayujta, pai mana alli ruracun ñanmanta maijanpish tigrachijca, shuj almatami huañuimanta quishpichinga, achca juchacunatapish perdonachingami.