1 CRÓNICAS 21 - Quichua Chimborazo Bible

Israelcuna mashna cashcata yachangapaj David yupashcami(2 S 24.1-25)

1Satanasca israelcunata p'iñashpa jatarishpami, Davidmanca israelcuna mashna cashcata yupana yuyaita curca.

2Chaimi Davidca Joabtapish, israelcunata mandajcunatapish:

–Tucui israelcuna mashna cashcata ñuca yachangapaj, Beersebamanta callarishpa, Dan pueblocama rishpa tucui israelcunata yupamugri– nirca.

3Shina nijpi Joabca:

–Jatun mandaj ñuca amo, Mandaj Diosca israelcunataca cunan mashna cashcamanta patsaj cutihuan mirachishca cachun. Cambajta ruraj tucui caicunaca ¿manachu tucuicuna can ñuca amopajllataj? Ñuca amo ¿imapajtaj chaita ruranata yuyarircanguiyari? Israelcunapaj jahuapi jucha cachunchu chashna rurasha ningui– nircami.

4Joab chashna nijpipish jatun mandajca chashna rurachuntaj nishpa mandajpimi, Joabca tucui Israel llajtata rishpa, paicunata yupagrirca. Ña Jerusalenman tigrashpaca, Davidmanca israelcuna mashna cashcata yupashcataca,

5tucui Israelpica, macanacuiman llujshinalla runacunaca shuj millón cien mil tiyashcata, Judá llajtapipish macanacuiman llujshinalla runacunaca 470.000 tiyashcatami yupashcata curca.

6Tucui chaicunaca Levipaj, Benjaminpaj aillucunata mana yupashcami chaica carca. Jatun mandaj chaita rurachun mandashcaca, Joabpica millanana cajpimi, chai aillucunataca mana yuparca.

7David chashna rurashcaca Taita Diospajca manataj munashca cajpimi, israelcunata llaquichirca.

8Chaimi Davidca Taita Diostaca:

–Chashna rurashpaca yallitaj jatun juchatami rurashcani. Mandaj Dioslla cambajta ruraj ñuca juchallishcata anchuchipailla nishpami rogani. Ñucaca upa shinami chashna rurashcani– nircami.

9Chashna mañajpimi, Mandaj Diosca, Dios huillachishcata Davidman huillaj Gad runata cashna Davidman huillachirca:

10“Davidpajman rishpa Mandaj Diosca cashnami nin nigri: Cambajca quimsatami rurasha nini. Chaicunamanta can shujta agllai. Chaita ñuca rurangapaj” nircami.

11Shina nijpi Gad runa Davidpajman shamushpaca:

–Mandaj Diosca cashnami nin:

12¿Cambaj llajtapi quimsa huatacunapaj yaricai shamuchunchu munangui? ¿Mana cashpaca canta p'iñajcuna mishajpi quimsa quillacunata miticushpa purinatachu munangui? ¿Mana cashpaca, quimsa punllacunata Mandaj Diospaj espada ungüihuan llaquichichunchu munangui? Chaitaca Mandaj Diospaj angelmi tucui Israel llajtapi ñutuchinga. Cunanca chaitaca can agllai. Can imata agllashcata ñucata cambajman cachajman huillagringapaj– nircami.

13Shina nijpi Davidca, Gad runataca:

–Jatun llaquipimari cani. Mandaj Diosca yallitaj c'uyaj cashcamanta paipaj maquipi urmanatami munani. Runacunapaj maquipica mana urmasha ninichu– nircami.

14Chashna nijpi Mandaj Dios Israelcunaman chai ungüita cachajpimi, 70.000 runacuna huañurca.

15Mandaj Diosca, Jerusalenpi causajcunata ñutuchingapajca angeltami cacharca. Chai ángel ñutucujta Mandaj Dios ricushpaca, yallitaj llaqui cajpimi, ñutucuj angeltaca: “Ña chailla, saqui” nirca.

Mandaj Diospaj angelca, jebuseocunapura caj Ornán runapaj parba c'uchupimi carca.

16David huichilla ricushpaca, huaquichinamanta espadata llujshichishpa Jerusalén puebloman espadata chutashpa, jahua pachahuan cai pachahuan chaupipi Mandaj Diospaj ángel shayacujtami ricurca. Chaimi Davidpish, cunaj yuyajcunapish cañamazuta churarishcacuna pambaman tupajta cumurishpa,

17Davidca, Taita Diostaca:

–Ñucamari israelcunata yupachijca cani. Ñucamari juchallijca cani. Ñucamari millaita rurajca cani. Cai ovejacunaca ima millaita mana rurarcachu. Cunanca Mandaj Dioslla cambaj maquihuan llaquichicushcaca ñuca jahuapi, ñuca yayapaj huasi familia jahuapi urmachun. Cai ungüitaca paicunapaj jahuamanca ama cachapaichu– nishpami mañarca.

Diospaj altarta David rurashcami(2 S 24.18-25)

18Chaimi Mandaj Diospaj angelca Gad runataca: “Chai jebuseocunapura caj Ornán runa trillana patioman huichiyashpa, Mandaj Diospaj shuj altarta rurachun ninmi nishpa Davidman huillagri” nirca.

19Shina nijpimi Davidca Gad runaman Mandaj Dios ima shina huillachishca shinallataj rurangapaj huichi rirca.

20Ornanca trigota trillacushpa tigralla ricushpaca angeltami ricurca. Paihuan chaipi caj chuscu churicunaca pacatucurcacunami.

21Ornán runa trillacunman David ña chayagricujpimi, Davidta Ornán ricushpaca, trillacunmanta llujshishpa paipaj ñaupajpi cumurirca.

22Chaipimi Davidca Ornantaca:

–Israelcuna huañucun pararichun Mandaj Diospajlla cachun chaipi shuj altarta rurangapaj cai trillana patiotaca cuilla. Mashna valijpipish chaita cushallami– nirca.

23Chaimi Ornanca Davidtaca:

–Cambaj cachun japilla. Jatun mandaj ñuca amopi ima shinami alli, chaita rurailla. Mandaj Diosman cushpa tucui rupachingapaj huagracunapish shayacunmi. Yantapajpish trillana caspicuna chaipimi. Diosman cungapaj trigopish chaipimi. Tucuitami cuni– nirca.

24Shina nijpi jatun mandaj Davidca Ornantaca:

–Mana, ashtahuanpish mashna valishcata pagashpami randisha nini. Cambaj cashcataca Mandaj Diosmanca mana cusha ninichu. Shujtaj cushcallatapish Mandaj Diosman cushpa mana rupachisha ninichu– nircami.

25Chashna nishpaca Davidca, Ornanmanca chai pamba allpamantaca, 600 siclo curitami curca.

26Davidca, chaipi Mandaj Diospaj shuj altarta rurashpami, paiman tucui rupachingapaj cunatapish, Mandaj Dioshuan alli cangapaj cunatapish cushpa Mandaj Diosta mañarca. Mandaj Diosca pai mañashcataca tucui rupachingapaj cushca altar jahuaman jahua pachamanta ninata cachashpami cutichirca.

27Mandaj Dios mandajpimi, angelca espadata huaquichinapi huaquichirca.

Diospaj huasita shayachingapaj allpata randishcami

28Davidca, jebuseocunapura caj Ornán runa trillanapi, Mandaj Diosta mañajpi, pai mañashcata Mandaj Dios cutichishcata ricushpami, paiman sacrificiocunata curca.

29Shitashca pambapi Moisés rurashca Mandaj Diospaj carpa huasipish, Diosman cushpa animalcunata tucui rupachina altarpish chai punllacunapica Gabaón lomapimi carca.

30Mandaj Diospaj angelpaj espadata ricushpa yallitaj manchaihuan cashcamantami Davidca, Taita Diosta tapungapajca chaimanca mana ri tucurca.