ZACARÍAS 12 - Quichua Chimborazo Bible

Jerusalenpi causajcunata q'uipa punllacuna llaquimanta llujshichishami nishcamanta

1Israelcuna imalla tucuna cashcataca, Mandaj Diosllatajmi huillarca. Jahua pachatapish, cai pachatapish ruraj, runacunamanpish espirituta cuj Mandaj Diosca cashnami nirca:

2Riqui, ñucami Judá llajtapi causajcunata llaquichicuj pueblocunapi causajcunata manchachichun, Jerusalenpi causajcunataca, copa junda ubyanata shina ruragrini. Muyundijta shayarishpa llaquichijcunataca, Jerusalenpi causajcunami llaquichingacuna.

3Chai punllapica, Jerusalén pueblotaca chai c'uchulla llajtacunapi causajcunapajca, mana cuyuchipaj rumi shinatami rurasha. Maijanpish chai rumita aparishpaca, ñuturingacunami. Cai pachapi tiyaj tucui llajtacunamanta tandanacushpami, paitaca llaquichisha ningacuna.

4Chai punllapica, paicunapaj caballocunatapish tucuicunatami manchachisha. Caballocunapi tiyarishpa callpaj runacunatapish muspachishami. Ashtahuanpish Judá llajtapi causajcunataca, ñucami chaparacusha. Tucui llajtacunapi tiyaj caballocunatapish, ñahui mana ricujtami rurasha.

5Chaita ricushpami, Judá llajta soldadocunata mandajcunaca: Jerusalenpi causajcunaca, tucuita Mandaj paicunapaj Dioshuan cashpami fuerzata charincuna ningacuna.

6Chai punllapica Judá llajta soldadocunata mandajcunataca, montón yanta chaupipi ninata brazusta shinami churasha. Shinallataj nina sindita gavillacunapi japichij shinami churasha. Chaimantami paicunapaj muyundij llajtacunapi causajcunataca, alli ladomanpish lluqui ladomanpish tucuchingacuna. Ashtahuanpish Jerusalenpi causajcunaca, paicuna causashca Jerusalén pueblollapitajmi causangacuna.

7Shinallataj Davidpaj huahua huahuacunapish, Jerusalenpi causajcunapish ama Judapaj huahua huahuacunata yalli jatunyachishca cachunmi, Mandaj Diosca Judá llajtapi causajcunataraj ñaupaman quishpichinga.

8Chai punllapica, Jerusalenpi causajcunamantaca, Mandaj Diosmi shayaringa. Paicunapurapi maijanpish fuerzata mana charishca cashpapish, chai punllapica jatun mandaj David shina c'ari c'aricunami cangacuna. Paicunapaj ñaupajpica, Davidpaj huahua huahuacunaca Dios shinapish, Mandaj Diospaj ángel shinapishmi cangacuna.

9Chai punllapica, Jerusalén pueblota llaquichinaman shamuj llajtacunataca, tucuicunatami chingachisha.

10Chaimantaca Davidpaj huahua huahuacunamanpish, Jerusalenpi causajcunamanpish tucui shunguhuan mañana yuyaitami cusha. Ñucataca, paicuna pasajta tujsichijcunallatajmi ricungacuna. Chaimantaca manchanayajta llaquirishpa, shujlla churi huañushcamanta huacacuj shinami huacangacuna. Paicunaca punta churimanta manchanayajta llaquirij shinami llaquiringacuna.

11Chai punllapica, Meguido pambapi Hadad-rimón diosmanta llaquirishpa huacashca shinami, Jerusalenpipish jatun huacaica tiyanga.

12Cai llajtapi causajcunaca, quiquin aillucuna puramantami huacangacuna. Davidpaj huahua huahuacunaca, paicunapaj huarmicunandijmi quiquin aillupuramanta huacangacuna. Natanpaj huahua huahuacunapish, paicunapaj huarmicunandijmi quiquin aillupuramanta huacangacuna.

13Shinallataj Levipaj huahua huahuacunapish, paicunapaj huarmicunandijmi quiquin aillupuramanta huacangacuna. Simeipaj huahua huahuacunapish, paicunapaj huarmicunandijmi quiquin aillupuramanta huacangacuna.

14Shujtaj aillucunapish, paicunapaj huarmicunandijmi tucuicuna quiquin aillupuramanta huacangacuna.