PROVERBIOS 16 - Quichua Chimborazo Bible

Alli causanata yachangapaj yuyaita japina shimicunami

1Ima ruranata ñucanchij yuyarijpipish,

Mandaj Diosmari imata ruranatatajca mandan.

2Tucuicunallatajmi imata rurashpapish,

allitami rurani yuyancuna.

Shina cajpipish Mandaj Diosmari

yuyaicunataca pezashpa ricucun.

3Can imata ruranataca Mandaj Diospaj

maquipi mingai.

Paimi can yuyacushcataca, chashnataj

rurachinga.

4Mandaj Diosca tucuitamari imapaj

cashpapish, shuj yuyaihuan rurashca.

Chaimantami Diosta mana manchaj runatapish,

llaqui punllapaj charicun.

5Mandaj Diosca jatun tucushcacunataca,

manataj ricunachinchu.

Paicunataca manataj saquishpa

llaquichingatajmi.

6Juchata ruracujtaca llaquishpa

allita rurana yuyaihuanmi jarcan.

Maijanpish Mandaj Diosta manchashpami,

millai causaimantaca anchurin.

7Mandaj Diosta cushichishpa, sumajta

causaj runataca paicunata

p'iñajcunapish alli tucushpa mana

llaquichincunachu.

8Ima shinapish mana allita rurashpa,

yallitaj charijyanapaj randica,

ashallata japishpapish, mana pita

llaquichishpa japishcamari alli.

9Runacuna shungupi imata yuyarijpipish,

Mandaj Diosmi pai munashca shina pushan.

10Jatun mandajca, Dios yuyachishcatami

riman.

P'iñanacuita allichinapipish mana

pandata mandanchu.

11Mandaj Diosca pezanacunatapish,

balanzacunatapish cashcata pezajtami

rurashca.

Chaimantami muchilapi tiyaj pezanacunataca,

cashcatataj rurashca cachun munan.

12Cashcata rurashpa mandajpica,

mandanamantaca pi mana cuyuchingachu.

Chaimantami jatun mandajcunaca Diosta

mana manchashpa millaita ruranataca,

manataj munancuna.

13Jatun mandajcunaca cashcata rurajpaj

shimitaca cushicushpami uyan.

Allita rimajtaca c'uyanmi.

14Jatun mandaj p'iñarishpaca,

huañuchinatami huillan.

Ashtahuanpish yachaisapa runaca,

paita p'iñachinataca jarcarinmi.

15Jatun mandaj cushijlla ñahuihuan

cajpica, huañuna manchaipish mana

tiyanchu.

Pai alli cashcaca, q'uipa tamya

shamushca shinami.

16Alli yachaita japinaca cullquita

japishcatapish yallimi.

Alli yuyaita japinaca, curita

japishcatapish yallimi.

17Alli runacunaca, millaimanta

anchurincunami.

Chashna jarcarijcunaca, quiquin

causaitami huaquichincuna.

18Manaraj llaqui tucushpaca,

jatun tucushcami causancuna.

Manaraj urmashpaca, c'ari tucushcami

causancuna.

19Jatun tucushcacunapura tucushpa,

imatapish paicunahuan chaupinacunapaj

randica, mana jatun tucushcacunahuan

apanacuj alli shungu canamari alli.

20Mandaj Diospi shunguta churashpa,

paipaj shimitapish tucui yuyaihuan

yachajca, allicunata japishpa cushicunmi.

21Yachaisapa runataca alli yuyaiyuj

cashcatami rijsincuna.

Paicuna rimashca mishqui shimicunaca,

yuyaita pascaj uyanajlla shimicunami.

22Yuyaita japijpajca alli yuyaita

japishcaca, causaita cuj yacu shinami.

Ashtahuanpish rumi shungucunapajca,

rumi shungu canaca jatun yachaj canami.

23Yachaisapa runapaj shungumantaca,

shimimanpish alli yuyaita cuj

shimicunami llujshin.

Paicuna rimashca shimicunaca, pipajpish

uyanajllami.

24Sumaj shimicunaca, sacha chuspi

huachashca mishqui shinami.

Almatapish cushichinmi, aichatapish jambinmi.

25Cai pachapi causajcunapaj ñanca

quiquin yuyaipi alli ricurishpapish,

huañuiman chayachigrij ñanllami.

26Trabajaj runaca, paipajllatajmi trabajan.

Huijsa mañajpimi, trabajanaman llujshirin.

27Millai runaca mana allita ruranataca,

allashpami mashcan.

Paipaj shimimantapish millai shimicunami

lunyacuj nina shina llujshin.

28Millai runaca p'iñanacuipimi churan.

Alli apanacujcunatapish huashalla

parlarishpa ch'icanyachinllami.

29Chai mana alli runaca, pitapish

umanllami.

Chashna umashpami, mana alli ñanpi churan.

30Ñahuita huichcashpami, millaita

ruranataca yuyarincuna.

Shimita cuyuchishcahuan millaita

ruranllacunami.

31Cashcata rurajcunaca, yuyajcamami

causancuna.

Chashna yuyajcama causanaca, sumaj

coronata churarishca shinami.

32Mana utca p'iñarij runaca,

pitapish jahualla mishajta yalli

allimari.

Quiquinllataj jarcarishpa cazuchirij

runaca shuj pueblota mishaj runatapish

yalli allimari.

33Migllapi suerteta rurajpipish,

Mandaj Diosmi imata ruranataca ricuchin.