EZEQUIEL 42 - Quichua Chimborazo Bible

1Chai q'uipami, ñucataca janaj lado huasi canllaman pushamurca. Chaimantaca Diospaj huasi ch'imbapurapi rurashca huasicuna tiyacun corredormanmi pusharca. Janaj ladoman tiyacuj huasica,

2largomanca pichca chunga ishqui metro, pichca chunga centimetrotami charirca. Anchomanca ishqui chunga sujta metro, ishqui chunga pichca centimetrotami charirca.

3Chai ucucunaca, Diospaj huasi tiyacun ladomanmi punguta charircacuna. Diospaj huasihuan, chai uchilla huasicunahuan chaupipica corredormi tiyarca. Chai corredorca chunga metro, pichca chunga centímetro anchomi carca. Shinallataj huasi canlla muyundijta pircashca c'uchupi rumihuan sumajta churashca ladomanca, punguyuj shujtaj huasicunami tiyarca. Chai huasicunaca, quimsa altomi carca.

4Chai huasicuna tiyacun ucu ladomanca, shuj corredormi tiyarca. Chai corredorca pichca metro, ishqui chunga pichca centímetro anchomi carca. Chai ucuta purinapajca, pichca chunga ishqui centímetro chaupihuan callemi tiyarca. Chai huasicunapaj pungucunaca, janaj ladomanmi carca.

5Chai huasicunaca jahuamanca, ashtahuan ashtahuan quichquimi carca. Ishqui alto jahuapi rurashca huasica ishqui alto huasimantapish, shuj alto huasimantapish yalli uchillami ricurirca.

6Chai huasicunaca quimsa altota rurashca cashpapish, mana huasi canllacunapi tiyaj pilarcunahuan shina rurashcachu carca. Chashna rurashca cashpami, shuj alto huasitapish, ishqui alto huasitapish yalli quichquita rurashca ricurirca.

7Huasi canlla ladomanmi, chai huasicuna c'uchullapitaj shuj pirca tiyarca. Chai pircaca, ishqui chunga sujta metro, ishqui chunga pichca centímetro largomi carca.

8Huasi canlla ladopi caj huasicunaca, ishqui chunga sujta metro, ishqui chunga pichca centímetro largomi carca. Shinallataj Diospajlla huasi ladoman shayacuj huasicunaca, pichca chunga ishqui metro, ishqui chunga pichca centímetro largomi carca.

9Huasi canllapi caj huasicunaman yaicungapajca, inti llujshin ladomanmi yaicuna pungu tiyarca.

10Janaj ladoman caj huasi canllapi tiyaj huasicuna shinallatajmi, ura ladomanpish tiyarca.

11Janaj ladoman caj huasicuna ñaupajpi tiyaj corredor shinallatajmi, ura ladomanpish tiyarca. Chai huasi anchopish, largopish, llujshina pungucunapish, yaicuna pungucunapish tucuimi janaj ladoman caj huasicuna shinallataj carca.

12Ura ladoman caj huasi pungucunapish, janaj lado huasi pungucuna shinallatajmi carca. Chai huasicunaman yaicunallapimi, inti llujshin ladoman pata c'uchupi shuj pungu tiyarca. Chai pungutami, chai huasicunamanca yaicuna carca.

13Ñucataca cashnami nirca: “Diospaj huasi c'uchupi tiyaj corredor ñaupajpi caj janaj ladomanpish, ura ladomanpish rurashca huasicunaca curacunapajllami canga. Chai huasicunapimi, Mandaj Diosman imalla cuna cashcata cushcacunataca curacuna micungacuna. Chai huasi ucupimi, Diosman imalla cuna cashcata cushcacunatapish, juchamanta imallata cushcatapish, Diosman animalta cushpa huañuchishcatapish huaquichinga. Chai ucucunami Diospajlla canga.

14Chai curacunaca Diospajlla ucumanta huasi canllaman llujshingapajca, paicuna chai ucupi churashca churanacunataca llujshichishpa, shujtaj churanacunata churarishpa llujshichuncuna. Chai churanacunaca Diospajlla ucupi imatapish ruranapajllami canga. Curacunaca shujtaj churanata churarishpa, chaipi caj runacunapajman c'uchuyachunlla” nircami.

15Diospaj huasita tucui medishca q'uipaca, huasi canllapi caj inti llujshin lado pungumanmi pusharca. Chaipica huasi canllatami muyundijta medirca.

16Inti llujshin ladota medijpica, 262 metros, pichca chunga centimetrotami charirca.

17Janaj ladota medijpipish, 262 metros, pichca chunga centimetrollatatajmi charirca.

18Ura ladota medijpipish, 262 metros, pichca chunga centimetrollatatajmi charishca.

19Inti huashicun ladoman rishpa chai ladota medijpipish, 262 metros, pichca chunga centimetrollatatajmi charirca.

20Chai huasi canllataca chuscundij ladotami medirca. Chai huasi canllata pircashca patami Diospajlla huasitapish, runacuna maita purinatapish ch'icanyachirca. Chai huasi canllaca largomanpish, anchomanpish 262 metros, pichca chunga centimetrotami charirca.