PROVERBIOS 19 - Quichua Chimborazo Bible

1Millaita rimashpa shujtajcunata

llaquichij upa runapaj randica,

huajcha cashpapish ima juchachina

illaj causanamari alli.

2Yachaita mana charij runaca urmanllami.

Jatarishcahuan imatapish rurai

callarijca, llaqui tucunllami.

3Quiquinllataj ch'ahuanyashca

cashcamanta pandarishpaca, Mandaj

Diostami juchachincuna.

4Charij cajpica, apanacujcunapish

achcami tiyan.

Ashtahuanpish huajcha runataca, paihuan

apanacujpish cungarinllami.

5Pitapish yangamanta juchachishpa

huillagrijtaca, llaquichishcatajmi canga.

Llullacunataca manataj saquincunachu.

6Mana mitsashpa imatapish cuj runahuanca,

tucuicunami apanacusha nincuna.

Paipajmanca pipish c'uchuyanllami.

7Huajcha runataca quiquin

huauquicunapish p'iñanllami.

¡Paihuan apanacujcunacarin

cungaringallatajmari!

Sumajta rogashpapish, mana japingachu.

8Maijanpish yuyaita japijca, quiquin

causaita c'uyanmi.

Alli yuyaita huaquichijca, allita

japingami.

9Pitapish yanga juchachishpa huillaj

runataca llaquichishcatajmi canga.

Llullacunaca huañungatajmi.

10Rumi shungu runapajca, sumaj

charinacunata charinaca mana alli

ricurinchu.

Shinallataj amota servij runalla

mandajcunata mandaj tucushcapish,

mana alli ricurinchu.

11Alli yuyaiyuj runaca,

p'iñarishpapish jarcarinmi.

P'iñachijpipish shungupi chingachishpami,

alli runa cashcata ricuchin.

12Jatun mandaj p'iñarishpaca,

león huacarij shinami manchachin.

Pai alli cajpica, shullashca

q'uihua shinami.

13Rumi shungu churica, yayapaj

shunguta nanachishpallami causan.

Caparirishpa rimaricujlla huarmipish,

zazan huasipi tamyashca shinami.

14Yaya mamaca huasitapish, ima

charinacunatapishmi cun.

Ashtahuanpish Mandaj Diosca, alli

yuyaiyuj huarmitamari cun.

15Q'uillacunaca, huañuita dormicunllami.

Chashna q'uillacunaca yaricaihuanmi

causancuna.

16Mandashcata pajtachijca, quiquin

causaitami huaquichin.

Ashtahuanpish mana cazushpa causajca,

huañungatajmi.

17Maijanpish huajcha runata llaquishpa

imata cushpaca, Mandaj Diosman

mañachishca shinami.

Chai allita rurashcamantaca,

cutichishcami canga.

18Cambaj huahuataca uchilla cajpirajmi,

mana allitaca jarcashpa llaquichina cangui.

Shina cashpapish, ama huañuchina

yuyaihuan macanguichu.

19Yallitaj p'iñarishpa llaquichijca,

llaqui tucunllami.

Millaita rurajpi mana llaquichijpipish,

ashtahuan millaita rurashpa catingallami.

20Cunashcatapish uyangui, alli tucuchun

rimashcatapish chasquingui.

Chashnami ña yuyaj cashpaca, yachaisapa

cangui.

21Runacunaca imatapish yuyanllami.

Ashtahuanpish Mandaj Diospaj munaillami

pajtan.

22Maijanpish llaquij cajpica,

cushicui tiyanmi.

Chashna cajpipish llulla runapaj randica,

huajcha runarajmari alli.

23Mandaj Diosta manchanaca, alli

causaita cujmari.

Pipish paita manchashpaca,

cushicushpami causanga.

Ima llaquipish mana japingachu.

24Q'uilla runaca micuita maquipi

charicushpapish, shimipica mana

churanchu.

25Mana cazushpa asij runata macajta

ricushpaca, yachai illaj runapish

cazunata yachanmi.

Yuyaisapa runacarin alli tucuchun

rimajllapitaj, yachanapica

ashtahuanmi yuyaita japin.

26Yayapajta imata shuhuajpish,

mamata huasimanta llujshichishpa

cachajpish, pingai illaj rumi

shungu churimi.

27Ñuca huahualla, allita yachachij

yuyaicunata jarcaj, panda yuyaicunataca

ña ama ashtahuan uyaichu.

28Llullashpa huillaj millai runaca,

juezcunatami chanzata ruran.

Chashna mana manchajcunaca, millai

shimicunata amullishcami purincuna.

29Mana cazushpa asijcunataca,

jatun llaqui chaparacunmi.

Rumi shungucunapajpish macana anguca,

allichishcami shuyacun.