EZEQUIEL 41 - Quichua Chimborazo Bible

1Chai q'uipaca, Diospajlla ucumanmi yaicuchirca. Chai pungu patacunapish cada ladomanmi quimsa metro, chunga pichca centímetro anchota charirca. Chai patacunaca, Diospaj carpa huasi vali anchomi carca.

2Diospajlla ucuman yaicuna pungu anchoca pichca metro, ishqui chunga pichca centimetrotami charirca. Pungu ladopi caj patacunaca, cada ladomanmi ishqui metro, sujta chunga ishqui chaupi centimetrota charirca. Diospajlla ucuca largomanca, ishqui chunga shuj metrotami charirca, anchomanca chunga metro, pichca chunga centimetrotami charirca.

3Chai q'uipaca, Diospajlla ch'icanchishca ucuman yaicuna pungu patacunatami medirca. Cada lado patacunami shuj metro, pichca centímetro ancho carca. Chai pungu anchoca quimsa metro, chunga pichca centimetromi carca. Pungu ladopi caj patacunaca quimsa metro, sujta chunga canchis chaupi centimetromi carca.

4Diospajlla ch'icanchishca ucutapishmi medirca. Chai ucuca largomanpish, anchomanpish chunga metro, pichca chunga centimetrotami charirca. Chaita medishca q'uipami ñucataca: “Caimi Diospajlla ch'icanchishca ucu” nircami.

5Chai q'uipaca Diospaj huasi patata medijpica, quimsa metro chunga centímetro racumi carca. Diospaj huasi huasha muyundij ucucunaca, ishqui metro chunga centímetro anchomi carca.

6Chai pata huasha muyundijpica, uchilla ucucunata rurashcami carca. Chai ucucunaca quimsa altomi carca. Tucui muyundijta cada altopimi quimsa chunga uchilla ucucuna tiyarca. Diospaj huasita pircashca pata muyundijpimi, asha pata llujshirishcata shina rurashca carca. Chai jahuapimi, chai uchilla ucucunataca rurashca carca. Chai asha pata llujshirishcata shina rurashca jahuapimi, racu caspicunata churarca.

7Chai ucucunaca, cada altomi ashtahuan ashtahuan ancho carca. Shinallataj shuj ucumanta, jahua ucucunaman huichiyangapajca, muyushpa llujshina churutajlla gradacuna rurashcami tiyarca. Chai churutajlla escaleratami ucumantaca, caishuj ishqui altomanca huichiyana carca.

8Diospaj huasitapish, chai quimsa alto ucucunatapish, quimsa metro, chunga pichca centímetro altota pambajllata rurashca jahuapimi shayachishca carca.

9Chai quimsa alto ucucunata rurashca muyundijtaca, shuj jatun pircami tiyarca. Chai jatun pircaca ishqui metro, sujta chunga ishqui chaupi centímetro anchomi carca. Chai pata anchoca, shuj ucu ancho valimi carca.

10Chai ucucuna ñaupajpica, muyundijtami corredor tiyarca. Chai corredor ucuca chunga metro, pichca chunga centímetro anchomi carca.

11Shinallataj chai ucucunaman yaicunapajca, corredor ladomanmi ishqui pungucuna tiyarca. Chai ishqui pungucunaca shujca janaj ladoman, caishujca ura ladomanmi carca. Chaiman yaicuna pungucunapica, shujtaj uchilla corredor shinami tiyarca. Chaica ishqui metro, sujta chunga ishqui chaupi centímetro anchomi carca.

12Diospaj huasi tiyacun inti huashicun ladomanca, carullapimi shujtaj huasi tiyarca. Chai huasica anchomanca, quimsa chunga sujta metro, canchis chunga pichca centimetrotami charirca. Largomanca, chuscu chunga canchis metro, ishqui chunga pichca centimetrotami charirca. Shinallataj chai huasi pataca ishqui metro, sujta chunga ishqui chaupi centímetro anchotami charirca.

13Chai q'uipaca, Diospajlla huasitami medirca. Chai huasica, pichca chunga ishqui metro, pichca chunga centímetro largomi carca. Shinallataj Diospajlla huasimantaca corredortapish, caishuj huasitapishmi muyundijta pircashca jatun patacama medirca. Chaipish pichca chunga ishqui metro, pichca chunga centímetro largomi carca.

14Shinallataj Diospajlla huasi ñaupajtami, inti llujshin ladota medirca. Chaica pichca chunga ishqui metro, pichca chunga centímetro largomi carca.

15Chai q'uipaca, Diospaj huasi huashapi tiyaj corredor ñaupajpi caj huasi largotami medirca. Shinallataj Diospaj huasi cada ladoman tiyaj huasicunatapishmi medirca. Shuj ladomanta caishuj ladoman medijpica, pichca chunga ishqui metro, pichca chunga centimetrotami charirca.

Shinallataj Diospaj huasi canllaman yaicuna corredorcunatapishmi medirca. Shuj lado corredormantaca, caishuj lado corredorcama medijpipish, pichca chunga ishqui metro, pichca chunga centimetrollatatajmi charirca.

16Diospaj huasi huasha muyundijpi tiyaj ucucunataca, quimsa altotajmi pambamanta jahua ventanacama tablacunahuan tapachishca carca. Pungu umbralcunatapish, canlla ladomanca quichqui ucu ladomanca, ancho ventanacunatapish tablacunahuan churashcami carca.

17Diospaj huasi pungumantaca, Diospajlla ch'icanchishca ucucamami patacunataca, muyundijta medirca. Chashnami tucuita callarishpa medirca.

18Chai huasi ucupica querubincunatapish, palmeracunatapish rurashcami tiyarca. Ishqui querubincunapaj chaupipica, shuj palmeratami rurashca carca. Cada querubinmi ishqui ladoman ñahuita charirca.

19Shuj lado ñahuica gente ñahui shinami carca. Chai ñahuica, shuj ladoman shayacuj palmeratami ricucurca. Shinallataj caishuj lado ñahuica, leonpaj ñahui shinami carca. Chai ñahuica, caishuj ladoman shayacuj palmeratami ricucurca. Chashnami Diospaj huasipica, muyundijta tiyarca.

20Diospaj huasi patataca tucuitami, pambamantaca pungu jahua ladocama querubincunatapish, palmeracunatapish labrashpa rurashca carca.

21Diospaj huasipi tiyaj pungu patacunaca, cuadradomi carca. Diospajlla ucupi tiyaj pungu patacunapish, Diospajlla ch'icanchishca ucupi tiyaj pungu patacuna shinallatajmi carca.

22Caspi altarca shuj metro, pichca chunga canchis chaupi centímetro altomi carca. Largomanca shuj metro, pichca centimetrotami charirca. Chai altar jahua tablapish, esquinacunapish, muyundijta patata shina rurashcapish caspillatajmi carca. Chaita ricuchishpaca ñucataca: “Caica Mandaj Diospaj ñaupajpi tiyana mezami” nircami.

23Diospaj huasipish, Diospajlla ucupish ishqui jatun hoja pungucunatami charirca.

24Cada pungucunaca ishquipi chaupishca chuscu hojayujmi carca. Chai pungucunata pascashpaca, ishqui hojataca shuj ladoman, caishuj ishqui hojataca chaishuj ladoman tandachinallami carca. Ishquindij pungucunapimi, chai shinallatataj rurashca carca.

25Diospaj huasi pungupipish, chai ucu pata quinricunapi shinallataj querubincunata, palmeracunata rurashcami tiyarca. Diospaj huasi corredor pungupica, caspi pungullatajmi tiyarca.

26Chai corredor ucu patacunapipish, cada ladomanmi canlla ladomanca quichqui, ucu ladomanca ancho ventanacunatapish, palmeracunatapish rurashca carca. Chashnallatajmi Diospaj huasi muyundijpi tiyaj huasicunapish, umbralcunapish rurashca carca.