ISAÍAS 38 - Quichua Chimborazo Bible

Ezequías ungujpi Dios alliyachishcami(2 R 20.1-11; 2 Cr 32.24-26)

1Chai punllacunapimi, Ezequiasca huañuna ungüihuan carca. Amozpaj churi, profeta Isaías paita ricunaman rishpaca:

–Mandaj Diosca cashnami nin: Canca ña mana causanguichu, huañugringuimi, cambaj huasi ucu familia ima shina canata allichi ninmi– nircami.

2Ezequiasca pata ladoman muyurishpami Mandaj Diostaca cashna mañarca:

3“Mandaj Dioslla, cantami rogani. Cambaj ñaupajpica mana nij tucushpalla tucui shunguhuan can munashcata rurashpa, cambaj ñaupajpi purishcata yuyarichunmi rogani” nircami. Ezequiasca yallitaj huacashpami mañarca.

4Mandaj Diosca Isaiastaca:

5“Ezequiaspajman rishpa cashna ni: Cambaj ñaupa yaya Davidpaj Mandaj Diosca cashnami nin: Can mañashcatapish uyanimi, can huacashcatapish ricunimi. Cantaca alliyachigrinimi. Cambaj causaitaca chunga pichca huatahuanmi mirachini.

6Cantapish, cai pueblotapish Asiriata jatun mandajpaj maquimanta quishpichishami. Ñucami cai pueblotaca cuidasha ninmi.

7Mandaj Diosca can ima shina canata pai nishcataca cashnami ricuchinga:

8Chaipica ñucaca horasta ricuna Acaz rurashca chunga gradacunata llandu ña uriyashca cajpipish chunga gradacunatami huashaman tigrachisha nircami”.

Chashna nishca shinallatajmi inti llanduca, chunga gradacunata uriyashca cajpipish chunga gradacunata huashaman tigrachirca.

9Judá llajtata jatun mandaj Ezequiasca, ungushpa chai ungüimanta alliyashpaca, cashnami quillcarca:

10Ñucaca cashnami nirircani:

Chaupi causaillapimari seol punguman rigrini.

Chaupi causaitaca quichushcamari cani yuyarcanimi.

11Cashnapish nircanimi:

Cai pachapi causacujcunapurapica Mandaj Diostaca ña mana ashtahuan ricushachu.

Cai pachapi causajcunatapish pita ña mana ashtahuan ricushachu.

12Ñuca causacun huasitaca shujmanmari churashca.

Ñucataca chaipimari churagrin.

Michijcunapaj carpa huasita shujman churaj shinamari churashca.

Ñuca causaitaca ahuaj pilluj shinamari pillurca.

Ashtahuanpish paillatajmari telarmanta p'itij shina p'itigrin.

¡Punlla cashpa tuta cashpapish tucuchigrinmi! yuyarcanimi.

13Ñucaca pacaringacamami caparicurcani.

Paica shuj león shinamari tucui ñuca tullucunataca cashtun.

Ñahui quinllaillapimi ñucataca tucuchigringui.

14Grulla shina, golondrina shinami aij, nicurcanilla.

Paloma shina aij nishpamari huichilla chaparacurcani.

Mandaj Dioslla, yallitaj llaquihuanmari aij, nicuni.

¡Ñucataca sinchiyachihuayari!

15Ñuca imalla tucunata huillacujllataj ñucata llaquichicushcamantaca ¿imatataj nishari?

Ñuca causaipi llaquihuan cashcamanta tucui ñuca causaipimi llaquilla purisha.

16Jatun Dioslla, runacunaca tucui chaicunallahuantajmi causancuna.

Tucui ñuca causaipimi chashnallataj cani.

Quiquinllatajmi ñucataca ungüimanta alliyachishpa causaita cungui.

17Ñucapaj allipajmi cai llaquicunaca ñucapajman shamurca.

Jutcupi ñuca ismugrinamantaca quiquin ñucata causachunraj munashcamantami quishpichircangui.

Ñuca tucui juchacunataca cambaj huashamanmi shitarcangui.

18Seolca quiquintaca mana jatunyachingachu.

Huañuipish quiquintaca mana alabangachu.

Jutcupi pambashca cajcunapish, quiquin pajtachina cashcata mana shuyancunachu.

19Ñuca cunan quiquinta alabacuj shinaca causacujcunamari quiquintaca alabangacuna.

Causacushpami yayapish huahuacunamanca, quiquin imatapish pajtachij cashcataca yachachin.

20¡Mandaj Diosmi ñucataca quishpichin!

Chaimanta tucui ñucanchij causaipi Mandaj Diostaca paipaj huasipi ñucanchij tocanacunapi tocashpa cantacushunlla nishpami quillcarca.

21Isaiasca: “Higo ñutushcata japishpa carachapi churaichij alliyangallami” nishcami carca.

22Ezequiasca Isaiastaca: “Mandaj Diospaj huasiman huichiyanatapish ¿imata ricushpataj yachasha?” nishcami carca.