1Alli yachai cayacujtaca,
alli yuyai caparicujtaca
¿manachu uyanguichij imatagari?
2Ñan c'uchu jatun patacunapi,
ñancuna tupanacuncunapi shayarishpami caparicun.
3Puebloman yaicuna pungucunapipish,
pungucuna ñaupaj pambacunapipishmi
sinchita caparishpa cashna huillacun:
4Tucui runacuna uyaichij,
cancunatami caparicuni.
Cai shimicunataca tucuicunamanmi huillagrini.
5Yachai illajcuna, alli yuyaita
japichij.
Rumi shungucunapish, alli yuyaita japichij.
6Ñucata uyaichij, tucuita yalli
alli shimicunatami rimagrini.
Ñuca shimihuanca allitamari yachachigrini.
7Ñucaca imatapish cashcatatajmi yachachini.
Ñuca shimihuan llullashpa pandata yachachinataca manataj munanichu.
8Ñuca shimihuan yachachishca
yuyaicunapica ima millai, ima panda mana tiyanchu.
9Entendijcunapajca, tucui cai
shimicunaca allimi.
Alli yachaita japishcacunapajca,
yuyaita japinalla shimicunami.
10Cullquita chasquinapaj randica,
ñuca yachachishcata chasquichij.
Ashtahuan alli curipaj randica,
alli yachanata japichij.
11Alli yachaica achij nicuj, sumaj rumicunata charishcatapish yallimari.
Tucuimanta yalli munashca sumaj charinacunapish mana ch'imbapuraipajmi.
12Ñuca cai alli yachaica, alli yuyaihuanmi tandalla tiyani.
Chaimantami cunanatapish alli
yachaihuan cunani.
13Mandaj Diosta manchanaca tucui mana allita p'iñanamari.
Quiquinlla alli cashcahuan jatun
tucujcunata, millaita rurashpa
purijcunata, millaita rimajcunataca p'iñanimi.
14Ñucami cunangapajpish, alli
yuyaita cuni.
Alli yuyaipish, tucuita rurai tucujpish ñucallatajmi cani.
15Ñucamantami jatun mandajcunapish,
llajtacunata mandacuncuna.
Ñucamantami mandajcunapish imatapish cashcata rurashpa allichincuna.
16Tucui cai pachapi tiyaj mandajcunallatajmi
ñucamanta mandacuncuna.
Jatun mandaj churashca mandajcunapish,
ñucallamantatajmi mandancuna.
17Ñucata c'uyajcunataca, ñucapish c'uyanimi.
Tutamantaman mashcajcunallami ñucataca
japincuna.
18Charijyanapish, alli nishca
canapish ñucahuanmi.
Mana tucurij charinacunapish, cashcata ruranapishmi ñucahuan tiyacun.
19Ñucaca ashtahuan alli, chuya curitapish yalli allimari cani.
Ñucamanta japinaca ima mapa illaj cullquita japishcatapish yalli sumajmari.
20Ñucaca cashcata rurashpa, alli yuyaihuan causana ñancunallatami pushasha.
21Ñucata c'uyajcunataca paicuna japina cashcata japichuntajmi chashna alli pushasha.
Allicunatapish maipi mana huaquichi tucuipajtami cusha.
22Mandaj Diosca imata manaraj rurai callarishpami, ñucataca ña huiñai
huiñaita charirca.
23Cai pacha manaraj tiyajpimi, tucui ima callarijpajpish, ñucami mandanata charircani.
24Mama cuchapish, allpa ucumanta llujshicuj yacucunapish manaraj
tiyajpimari, ñucamanraj causaita
cuhuarca.
25Urcucunatapish, lomacunatapish
manaraj rurashpamari, ñucamanca ña causaita cuhuarca.
26Ima chagra tiyachun allpa
manaraj allichishca cajpi, cai
pachapi manaraj chaquishca allpa tiyajpimi, ña tiyarcani.
27Mandaj Dios jahua pachatapish, mama cucha yacucuna maillata
tiyanatapish churacujpica, ñucaca paihuanmi carcani.
28P'uyuta huairapi churacujpi, mama cucha yacu tiyanatapish sinchita churacujpi,
29mama cucha yacuta pai churashcamanta,
ama maiman llujshichun mandacujpi, cai pachatapish huasita alli shayachij
shina sinchita churacujpica, paihuanmi carcani.
30Tucui chaicunatami Mandaj Dioshuan allichircani.
Maiman mana anchushpami, punllanta paita cushichircani.
Paipaj ñaupajllapimi carcani.
31Pai tucuita rurashpa, cai pachapi causajcunata churashcamantami achcata
cushicuni.
Cai pachapica runacunahuanmi cushicuni.
32Chaimanta cunanca ñucata uyahuaichij, huahuacuna.
Ñuca ñanta catijcunaca cushicushpami
causancuna.
33Ñuca cunashcata alli uyashpa, yachaj caichij.
Caitaca ama yanga cashcata yuyashpa saquichijchu.
34Ñuca yachachishcata yachana munaihuantaj
punllanta ñuca huasi pungu pilar huashapi shuyashpa chasquijca cushicunmi.
35Ñucata japijca causaita japingami.
Mandaj Dios c'uyashcapishmi tucunga.
36Ashtahuanpish ñucata p'iñajca, quiquin causaitami llaquipi churan.
Ñucata p'iñajcunaca huañuitami
munancuna.
Who We AreWhat We EelieveWhat We Do
2025 by iamachristian.org,Inc All rights reserved.
