EZEQUIEL 43 - Quichua Chimborazo Bible

Mandaj Dios achij nicuj, paipaj huasipi jundashcamanta

1Chai q'uipami ñucataca, inti llujshin ladoman caj punguman pusharca.

2Chaipica inti llujshin ladomanta Diospaj achij nicuj shamucujtami ricurcani. Chai achij nicujca, achca yacucuna huajiashpa shamuj shinami shamurca. Mandaj Diospaj achij nicujmi, cai llajtataca achij nicujta rurarca.

3Jerusalenta chingachinaman shamunata muscuipi ricushca shinallatatajmi, chaipipish ricurcani. Quebar jatun yacu c'uchupi cashpa muscuipi ricushcacunata shinallatajmi, chaipipish ricurirca. Chaita ricushpaca, pambaman tupajtami cumurircani.

4Mandaj Diospaj achij nicujca inti llujshin lado pungutami, paipaj huasimanca yaicurca.

5Ñucataca Diospaj Espiritumi, Diospaj huasi canllaman pusharca. Chaipica Mandaj Diospaj achij nicuj p'uyu, paipaj huasi ucupi jundashcatami ricurcani.

Diospaj huasipi cajcunapaj mandashcacunata churashcamanta

6Shinallataj Diospaj huasimantataj shuj runa rimashcatami uyarcani. Ñuca c'uchupi shayacuj runaca ñucataca,

7cashnami nirca: “Huañujlla aichayuj runa, chaipica jatun tiyarinapi ñuca tiyarinami. Caipica ñuca chaquicunata samachinami. Caipimi israelcunahuanca huiñaita causasha. Israelcunaca paicunapish, paicunata jatun mandajcunapish ña mana huainayashpa, ñuca shutita ashtahuan yangata rurangacunachu. Jatun mandajcunapaj huañushca aichacunatapish, ña mana ashtahuan lomacunapi tiyaj altarcunapica churangacunachu.

8Paicunaca paicunapaj huasi pungu umbralcunatapish, ñuca huasi pungu umbral c'uchullapi, pilarcunatapish ñuca huasi pilar c'uchullapimi churarcacuna. Shuj patallatami ñucahuan, paicunahuan chaupipica shayachircacuna. Chashna huasichishpa ñuca c'uchullapi millananata rurashpa ñuca shutita yangata rurashcamantami, achcata p'iñarishpa paicunataca chingachircani.

9Cunanca paicuna huainayanatapish shitangacunami. Jatun mandajcunapaj huañushca aichacunatapish shitangacunami. Chashna rurajpimi, huiñaita paicunapaj chaupipi causasha.

10Huañujlla aichayuj runalla, israelcunaca millaita rurashcata yuyarishpa pingarichuncuna, cai huasita ricuchiyari. Cai huasita medishpa, cai huasitajllata rurachun ricuchiyari.

11Paicuna tucui millaita rurashcamanta pingarijpica, cai huasitajllata ima shina callarishpa ruranata yachachingui. Maillata llujshinata, maillata yaicunata, tucui laya sumajta ruranata, ima shina medinata, tucui laya sumaj ricuchinacunata ruranata, ima shinalla mandashcata tucuita yachachingui. Cai huasita ricushpa ruranata callarichunca, ima shinalla cai huasita sumajta ruranata, imalla ruranacunata rurashpa catichun paicuna ricucun ñaupajpi rurashpa yachachingui.

12Cai huasita ruranata mandashcapica cashnami nin: Jatun urcu punta allpaca, tucui muyundijtami Diospajlla canga ninmi cai mandashcapica.

Altarta rurachun mandashcamanta

13Pichca chunga ishqui chaupi centimetrota charij medidahuan medishpa altarta ruranguichij. Chai altarta ruranata callaringapaj pichca chunga ishqui chaupi centímetro alto patata pircanguichij. Chai jahuapica, pichca chunga ishqui chaupi centímetro anchota saquishpa altarta ruranata callaringuichij. Chai altar muyundijtaca, ishqui chunga ishqui chaupi centímetro alto patata pircanguichij. Chaimi altarta shayachina pamba canga.

14Altarta ruranapaj pambajllata rurashcapica, muyundijta pichca chunga ishqui centímetro chaupi anchota saquinguichij. Chaimantaca shuj metro, pichca centímetro altota pircanguichij. Chai pircashca muyundijtapish, pichca chunga ishqui chaupi centímetro anchota saquishpa, ishqui metro, chunga centímetro altota pircanguichij.

15Chai pircashca jahuapica, ishqui metro chunga centímetro alto altarta pircanguichij. Chai altar chuscundij esquinacunapi gachucunata churanguichij” nircami.

16Chai altarca largomanpish, anchomanpish sujta metro, quimsa chunga centimetrotami charirca. Chuscundij ladomanmi chai shinallataj medirca.

17Chai altarta aparicuj pircaca, largomanca canchis metro, quimsa chunga pichca centimetrotami charirca. Anchomanpish canchis metro, quimsa chunga pichca centimetrollatajmi carca. Chuscundij ladomanmi chashnallataj medirca. Chai muyundijtaca, ishqui chunga sujta yalli centímetro anchomi grada shina saquirirca. Chai altarta rurangapajca, pambajllata rurashca jahuata muyundijtami, ishqui chunga sujta centímetro ancho patata pircashca carca. Altoman huichiyana gradacunaca, inti llujshin ladomanmi carca.

18Chaimantaca ñucataca cashnami nirca: “Huañujlla aichayuj runalla, Mandaj Jatun Dios ñucatajmi cashna nini: Altarta ruranata tucuchishpaca, cai mandashcacunata ruranguichij: Chai altarca ñucaman cushpa tucuita rupachingapajmi, yahuartapish chai jahuata tsirapangapajmi.

19Sadocpaj huahua huahua levita curacunami ñucata servinamanca c'uchuyangacuna. Paicunamanca, juchamanta malta c'ari huagratami cungui. Mandaj Dios ñucatajmi chashna nini.

20Chai huagra yahuarta japishpaca, altarpi tiyaj chuscundij gachucunapi, altar chaqui chuscundij esquinacunapi, altar jahua muyundijpipishmi tsirapana canguichij. Chashna rurashpami ima mapa illaj, chuyata rurangui.

21Chashna rurashca q'uipaca, juchamanta cushca malta c'ari huagra aichataca, ñuca huasipi tiyacuj mandashcapi nishca shinallataj canllaman rupachingui.

22Cayandij punllataca, ima mana tucushca c'ari chivota juchamanta ñucaman cungui. Malta c'ari huagrapaj yahuarhuan shinallataj, chai c'ari chivo yahuarhuanpish tsirapashpa, altartaca chuyata rurangacuna.

23Chashna juchamanta cushca q'uipaca, vacacunamanta ima mana tucushca malta c'ari huagratapish, canlla ovejacunamanta shuj carnerotapish ñucaman cungui.

24Chaicunataca Mandaj Dios ñucamanmi cuna cangui. Curacunami chai aicha jahuapi cachita churashpa, ñucaman cushpa tucuita rupachingacuna.

25Canchis punllacamami punllanta c'ari chivotapish, vacacunamanta shuj malta c'ari huagratapish, canlla ovejamanta ima mana tucushca carnerotapish, juchamanta ñucaman cushpa huañuchingacuna.

26Canchis punllacamami animalcunata altar jahuapi rupachishpa altartaca, ima mapa illaj, ñucapajllata rurangacuna.

27Chai canchis punllapaj cayandij pusaj punllamanta huichimanca, curacunami cancuna ñucaman cushpa tucui rupachinatapish, ñucahuan alli cangapaj cushcacunatapish rupachingacuna. Chashna rurashcatami cancunamantaca chasquisha” nircami Mandaj Jatun Diosca.