1 TESALONICENSES 5 - Quichua Chimborazo Bible

1Huauquicuna, ima huata ima punlla Jesús shamunata cancunaman ñuca quillcachunca mana minishtinguichijchu.

2Cancunaca allimi yachanguichij. Mandaj Jesusca shuhua shinami tuta shamunga.

3Tucuicuna: “Allitaj, sumajtami causacunchij” ninacucujpica, chichu huarmita nanai japij shinami paicunapajmanca, jatunta llaquichinaca ñapish shamunga. Chaimantaca manataj miticungacunachu.

4Ashtahuanpish huauquicuna, cancunaca chai punlla shuhua shina ñapish japichunca, mana amsapichu canguichij.

5Cancunaca tucuicunami achijpaj huahuacuna, punllapaj huahuacuna canguichij. Mana tutapaj, amsapajchu canchij.

6Chaimanta shujtajcuna shina dormicujcunaca ama cashunchij. Ashtahuanpish chaparashpa, alli yuyaihuan cashunchij.

7Dormijcunaca tutami dormincuna, machajcunapish tutami machancuna.

8Ashtahuanpish ñucanchijca punllapaj cashcamanta, alli yuyaihuan cashunchij. Crishcata, c'uyanatapish fierro churanata churashca shinami canchij. Quishpichishcata shuyanatapish fierro cascota churashca shinami canchij.

9Taita Diosca ñucanchijtaca, p'iñarishpa llaquichingapajllatajca mana agllarcachu. Ashtahuanpish ñucanchijta Mandaj Jesucristomanta quishpichishca cachunmi agllarca.

10Causajcunapish, ña huañushcacunapish, paihuan tandalla causachunmi, paica ñucanchijmanta huañurca.

11Ima shina cunan ruracushca shinallataj, caishuj chaishujta animachichij caishuj chaishujta sinchiyachichij.

Crijcunata Pablo yuyachishpa rimashcami

12Huauquicuna, yachachishpa, cunashpa cancunapurapi Mandaj Jesusmanta trabajajcunataca alli cazuichij ninchijmi.

13Paicuna allita rurashcamantaca, achcata c'uyashpa alli ninamari canguichij. Caishujhuan chaishujhuanpish sumajta causaichij.

14Huauquicuna, caitapishmi roganchij. Imata mana rurasha nij q'uillacunataca sinchita cunaichij, llaquilla cajcunataca cushichichij, manaraj alli yachajcunataca yachachipaichij. Tucuicunahuan alli caichij.

15Maijanpish ima mana allita rurajpica, ñataj canpish chashnallataj ruranguiman. Chaipaj randica, caishuj chaishujhuan, tucuicunahuanpish allita rurashpa catichij.

16Imapipish cushijllacuna caichij.

17Taita Diosta mañanataca ama shaicunguichij.

18Cristo Jesushuan shujlla cajcunataca, tucui imapipish paita pagui nijcuna cachunmi Taita Diosca munan.

19Taita Diospaj Espíritu ima nishcataca ama mana uyashun nichijchu.

20Taita Dios huillachijpi huillacujcunataca, ama mana uyashun nichijchu.

21Tucui imalla yachachishcataca, alli cashcata mana alli cashcata alli ricuichij. Alli cajllata chariraichij.

22Tucui millaimantaca anchurichij.

23Sumaj causaita cuj Taita Diosllataj cancunapaj espiritutapish, almatapish, cuerpotapish tucui mapa illajlla tucungacama chuyayachishpa ñucanchijta Mandaj Jesucristo shamunapajca, pi mana juchachipajta huaquichishca cachun.

24Cancunata cayajca pai imata rurasha nishcataca pajtachijmi. Chaitaca paica rurangami.

25Huauquicuna, ñucanchijmanta Taita Diosta mañanguichij.

26Tucui huauquicunata, jucha illaj muchahuan alli cashca canguichijman nichij.

27Cai quillcataca, Taita Diospajlla caj tucui huauquicunapaj ñaupajpi rezachunmi, Mandaj Jesuspaj shutipi cancunamanca c'uyaihuan mingani.

28Ñucanchijta Mandaj Jesucristopaj mana c'uyaipajta c'uyaj canaca, cancunahuan cashca cachun. Chashna cachun.