1-2Macanacuimanta Asa tigracujpi Obedpaj churi Azarías tupashpaca, Diospaj Espíritu japijpimi cashna nirca: “Can Asapish, Judá soldadocunapish, Benjamín soldadocunapish caita uyaichij. Mandaj Diosca cancuna paimanta mana anchurishcamantaca, paipish cancunahuanmi. Cancuna paita mashcashpaca, japinguichijmi. Ashtahuanpish cancuna paimanta anchurijpica, paipish cancunamanta anchuringami.
3Ña unitamari cancunaca causaj Dios illajlla causacurcanguichij. Shinallataj Diospajta ruranata yachachij curacuna illajllapishmi causacurcanguichij.
4Shina cashpapish llaquipi cashpaca, israelcunata Mandaj Diosman cutirishpa paita manchashcacunami. Chashna rurajpica paica uyashcami.
5Chai huatacunapica pipish mana sumajta causai tucurcachu. Ashtahuanpish tucui cai llajtacunapi causajcunami huasipi cashpapish, ñanpi cashpapish manchaihuan purircacuna.
6Taita Diosllatajmi tucui laya llaquicunata cachashpa, yallitaj manchachij carca. Chai manchaihuan musparishpami, shuj llajtapi causajcunaca caishuj llajtapi causajcunata, shuj pueblopi causajcunaca caishuj pueblopi causajcunata huañuchishpa tucuchinacuj carca.
7Shina cajpipish cancunaca ama manchaichijchu, c'ari c'ari caichij. Diospajta rurashcamantaca chasquinguichijmari” nircami.
8Obedpaj churi profeta Azarías, Dios chashna huillachun nishcata huillajpica Asaca, c'ari c'ari cana yuyaita japishpami, chai p'iñanana rurashcalla dioscunataca tucui Judá lajtamanta Benjamín llajtamanta anchuchirca. Shinallataj Efraín llajta urcucunapi pai japishca pueblocunamantapishmi, chai dioscunataca anchuchirca. Chashna rurashpaca, Mandaj Diospaj huasi corredor ñaupajpi tiyaj Diospaj altartami allichirca.
9Chai q'uipaca tucui Judá llajtapi, Benjamín llajtapi causajcunatapish, Efraín llajtamanta, Manasés llajtamanta, Simeón llajtamanta shamushpa, chai Judá llajtapi causacujcunatapishmi tandachirca. Paicunata Mandaj Dios Asahuan cajta ricushpami, Israel llajtamantaca chashna achcacuna Judá llajtapi causanaman shamurcacuna.
10Jatun mandaj Asaca Judá llajtataca, ñami chunga pichca huatata mandacurca. Chai huatapaj quimsa quillapimi, Jerusalenpica tandanacurcacuna.
11Chai tandanacui punllaca macanacuipi quichumushcatami, 700 c'ari huagracunatapish, 7.000 ovejacunatapish, Mandaj Diosman cushpa huañuchircacuna.
12Chashna rurashpaca, shuj yuyailla tucushpami, paicunapaj ñaupa yayacunata Mandaj Diosta tucui shunguhuan, tucui almahuan yuyarishpa mashcanata ari nircacuna.
13Israelcunata Mandaj Diosta mana catisha nijca c'ari cashpa, huarmi cashpa, uchilla cashpa, jatun cashpapish huañunami can nircacunami.
14Sinchita shuj shinalla caparishpami, Mandaj Diosmanca ari nircacuna. Shinallataj trompetacunapi, bocinacunapipishmi tocarcacuna.
15Tucui shunguhuantaj Mandaj Diosta mashcashpa, tucui munaihuantaj catishcamantami, Judapi causajcunaca tucuicuna cushicurca. Tucui paicuna mashcashcamantaca, Mandaj Diosca paicunapi japi tucurcami. Chaimantami Mandaj Diosca, paicunapaj tucui llajtapi sumaj causaita curca.
16Jatun mandaj Asaca paipaj mama Maacataca, paillatajmi jatun mandaj shina cashcamantaca anchuchirca. Asera huarmi diosman rijchajtapishmi chaimanta anchuchirca. Shinallataj Asaca, chai huarmi diostajllatapish p'aquishpami, Cedrón huaicupi rupachirca.
17Ashtahuanpish Israel llajtamantaca, lomacunapi tiyaj altarcunataca mana anchuchircachu. Asaca paipaj tucui causaipimi, Mandaj Diosta tucui shunguhuan cazushpa causarca.
18Asaca Diosman paipaj yaya cushca curitapish, cullquitapish, paillataj cushca curitapish, cullquitapish, shujtaj charinacunatapish Diospaj huasipimi churarca.
19Chaimantami quimsa chunga pichca huatata Asa mandangacamaca, macanacui mana ashtahuan tiyarca.
Who We AreWhat We EelieveWhat We Do
2025 by iamachristian.org,Inc All rights reserved.
