1Chaimanta ñucahuan samarinaman yaicuna tiyanmi nicujpiraj, mana yaicusha nicunguichijman. Cancunamanta maijancunaca manaraj yaicushcachu yuyachinguichij. Chaimanta alli yuyarishunchij.
2Alli huillaitaca paicunaman shinallatajmi ñucanchijmanpish huillarca. Uyashpapish mana crishcamantami, chai uyashca shimica paicunapajca yangalla tucurca.
3Paicuna chashna cajpipish ñucanchijca crishcamantami samarinapica yaicurcanchij. Chaimantami:
“Mana crijcunahuanca jatunta p'iñarishpa, ñucahuan samarinamanca manataj yaicungacunachu nishpa Dios nishcaca pajtarca” ninmi.
Chashna cajpipish, Diosca tucui imalla tiyajta rurashca pachamantami pai rurana cashcataca ña tucuchishca.
4Quillcachishca maipitajshica canchis punllamantaca cashnami nishca:
“Diosca, paipaj ruranata ña tucuita tucuchishpaca, canchis punllapica samarircami” ninmi.
5Ña nishca shinallataj:
“Ñucahuan samarinamanca, manataj yaicungacunachu” ninmi.
6Chashna cajpipish maijancunaca samarinamanca manaraj yaicuncunachu. Alli huillaita ñaupaman uyajcunapish mana cazushcamantami mana yaicushcacuna.
7Chaimantami Diosca samarinataca shujtaj punllapaj nishpa saquirca. Chai punllaca cunan punllamari. Ñaupaman huillachishcamanta achca huatacuna q'uipami Davidca:
“Dios rimashcata cunan uyashpaca, cancunapaj shungucunataca ama sinchiyachichijchu” nirca.
8Israelcunaman chai samarinata Josué cushca cajpica, cutinca Diosca q'uipa punllapimi samarinata cusha mana ninmanchu carca.
9Chaimantami Diospaj huahuacunapajca, samarinaca tiyanraj.
10Diosca pai imalla ruracushcata tucuchishpa samarishca shinallatajmi, Dioshuan samaringapaj yaicujpish pai imalla ruracushcata saquishpa samaringa.
11Chaimanta ñucanchijpish paipaj samarinaman yaicuna yuyailla cashunchij. Chai mana cazujcuna urmashca shinaca, maijanpish amataj urmashunchijchu.
12Diospaj Shimica causajmi, tucuita rurai tucujmi. Ishqui filoyuj tucui espadacunatapish yalli cashcamanta: Almatapish, espiritutapish, mucucunatapish, tullu ñutcutapish, chaupirijta yaicujmi. Shungu imalla yuyashcata, munashcatapish ricuchijmi.
13Imalla rurashcacunapish Diospaj ñaupajpica ima mana pacallachu. Ashtahuanpish tucui imapish paipaj ñahuipica lluchulla, pascashca ricunallami tiyacun. Ñucanchijca paimanmi tucui imalla rurashcataca ricuchishun.
14Ñucanchijca jahua pachacunata pasashpa rij, curacunata jatun pushaj curatami charinchij. Paica Diospaj Churi Jesusmi. Chaimanta ñucanchij crishpa caticushcataca alli catishunchij.
15Ñucanchijca imata mana rurai tucuj irqui cashpapish, curacunata jatun pushaj llaquij curatami charinchij. Paitapish ñucanchijta shinallatajmi mana alli yuyaicuna pandachisha nirca. Chashna cajpipish paica manataj juchallircachu.
16Ima llaquipi cajpi llaquishpa, mana c'uyaipajta c'uyaihuan ayudashca cangapajca, mana c'uyaipajta c'uyaj Dios tiyacunman mana manchashpa c'uchuyashunchij.
Who We AreWhat We EelieveWhat We Do
2025 by iamachristian.org,Inc All rights reserved.
