2 TIMOTEO 2 - Quichua Chimborazo Bible

Jesucristopaj alli soldado canami

1Ñuca huahua Timoteo, Cristo Jesushuan shujlla cashcamanta mana c'uyaipajta c'uyaj canahuan sinchiyai.

2Achcacunapaj ñaupajpi ñuca yachachishcata uyashcataca, shujtajcunata yachachi tucuipaj, alli pajtachijcunaman mingai.

3Canca Jesucristopaj alli soldado cashcamanta llaquicunata apailla.

4Maijanpish soldado tucushpaca, paita mandajpaj munashcata rurana yuyaillami. Paipaj munaita ruranataca mana yuyanchu.

5Callpashpa mishanacujcunapish callpana cashca shina mana callpashpaca, coronataca mana japinchu.

6Chagrajca granota japingapajca allpatarajmi allichin.

7Ñuca ima nishcataca yuyaringui. Chaicunataca Mandaj Jesusllatajmi tucuita entendichinga.

8Davidpaj huahua huahuamanta caj Jesucristo huañushcacunapaj chaupimanta causarishcata yuyari. Ñucaca chai alli huillaitami huillani.

9Chaimantami llaquicunata apacuni, millaita ruraj shina prezushcapish cani. Ashtahuanpish Diospaj shimica mana prezuchu.

10Dios agllashcacuna Cristo Jesushuan shujlla tucushpa quishpichishca cachun, sumaj huiñai causaita charichunmi, paicunata c'uyashcamanta tucui llaquita apacuni.

11Cai huillashcacunaca chashnatajmi:

Paihuan huañushca cashpaca, paillahuantajmi causashun.

12Llaquicunatapish apashpaca, paihuanmi mandashun.

Paita mana rijsinchijchu nijpica, paipish ñucanchijtaca mana rijsinichu ningami.

13Ñucanchij mana pajtachij cajpipish, paica pajtachicungallami, pai pajtachij cashcataca maitataj yangapi churangari.

Diospajta rurajca pai alli nishca canami nishpa mandashcami

14Imata nisha nishca shimicunamanta rimanacucujcunataca cai ñuca yachachishcacunata yuyachishpa, Mandaj Jesuspaj ñaupajpi cunangui. Chashna rimanacunaca imapaj mana allichu, ashtahuanpish uyajcunata llaquichinapajllami.

15Diospaj ñaupajpi paipajta rurajtaj cashca ricuringapajca, allita rurana yuyailla rurangui. Chashna cashpami imata mana pingaringui, mana llulla shimitapish alli yachashpa, ima shina cashcatataj alli yachachingui.

16Ashtahuanpish yanga mapa parlocunataca amataj uyangui. Caicunaca millaillamanmi ashtahuan ashtahuan chayachin.

17Chai parloca, cáncer shinami tucuchinga. Himeneohuan, Filetohuanmi chashna tucurca.

18Paicunaca mana llullamanta anchurishpami, ñami causarircanchij nishpa puricuncuna. Chashnami maijancunapaj crishcata muspachircacuna.

19Ashtahuanpish Taita Dios sinchita callarichishpa sellashcacunaca mana cuyuchipaj sinchimari: “Mandaj Jesusca paipaj cajcunataca rijsinmi”. Chashnallataj, “Maijanpish Cristopaj shutita huillajcunaca tucui millaimanta anchurichun” ninmi.

20Shuj jatun huasipica, curimanta, cullquimanta rurashcacunallaca mana tiyanchu. Ashtahuanpish caspimanta, allpamanta rurashcacunapishmi tiyan. Maijan chaicunaca allita ruranapajlla charinami, caishujcunaca yangata ruranapajlla charinami.

21Shinallataj maijanpish chai mana allicunamanta maillarijca, Mandaj Jesuspaj allipaj vaso, paipajta ruranapaj chuyayachishca, imapipish Mandaj Jesuspajta ruranallami canga.

22Q'uipa huiñaicunapaj millai munaita ruranamanta anchuri. Mandaj Jesusta chuya shunguhuan mañajcunahuan tandanacushpa, cashcata ruranata, alli crinata, c'uyaj canata, sumajta causanata catirai.

23Ashtahuanpish ch'ahuancunapaj, yuyai illajcunapaj rurashcacunaca, p'iñanacuillapi churaj cashcata yachashcamanta chaicunamantaca anchuringui.

24Mandaj Jesuspajta rurajca mana p'iñanacujchu cana. Ashtahuanpish tucuicunahuan c'uyanacuj, yachachinapajtaj caj, llaquita apajmi cana.

25Can huillashcata mana allichu nijcunapish, mana llullata rijsingapaj Diosman cutirichun Dios yuyaita cuna cashca yuyaihuan manso shunguhuan yuyachingui.

26Diablo paipaj munaita rurachishpa, paipaj linchipi prezu charicujmanta llujshichun chashna yuyachingui.