EZEQUIEL 5 - Quichua Chimborazo Bible

1“Huañujlla aichayuj runalla, canca barbasta p'ichana navajapaj randica, filosapa cuchillota japishpa, uma ajchatapish barbastapish p'icharingui. Chai q'uipaca balanzata japishpa, chai rutushca ajchata pizashpa chaupingui.

2Macanacuna punllacuna ña tucurijpica, quimsapi chaupishca shuj mirgataca, chai pueblo chaupillapitaj ninahuan rupachingui. Caishuj mirgataca, chai pueblo muyundijpi espadahuan p'itingui. Caishuj mirga ajchataca, tsirapashpa huairapi cachangui. Ñucami paicunataca espadahuan catishpa risha.

3Shinallataj asha ajchata japishpa, cambaj jahua churanapi tsutingui.

4Cutinllataj chaimanta ashata japishpaca, ninapi rupachun chaipi shitangui. Chai ashtahuan nina llujshishpami, israelcunataca tucuicunata rupachinga.

5Mandaj Jatun Diostajmi cashna nini: Ñucamari Jerusalén pueblotaca, shujtaj llajtacunapaj chaupipipish, tucui muyundij llajtacunapaj chaupipipish churarcani.

6Paica ñuca huillachishcacunatapish, ñuca mandashcacunatapish shujtajyachishpami, shujtaj llajtacunatapish yalli, paipaj muyundij llajtacunatapish yalli ñucataca mana mancharca. Chaimantamari ñuca huillachishcacunatapish, ñuca mandashcacunatapish mana cazushpa causarcacuna.

7Chaimantami Mandaj Diostaj cashna nini: Cancunapaj muyundij llajtacunapi causajcunatapish yalli millaita rurashpamari, ñuca mandashcacunatapish mana cazurcanguichij. Ñuca yachachishcacunatapish manamari huaquichircanguichijchu. Cancunapaj muyundij llajtacunapi charishca mandashcacuna shinallapish, manamari causarcanguichijchu.

8Chaimantami Mandaj Jatun Diostaj cashna nini: Riqui, cancunataca llaquichigrinimi. Tucui llajtacunapi causajcuna ricucunpimi cancunataca llaquichisha.

9Cancuna yallitaj millaita rurashcamantaca, ima horaspish mana chashna rurashcatami rurasha. Q'uipatapish cutinca manataj chashna llaquichishachu.

10Chaimantami cancunapaj ñaupajllapitaj yayacunaca huahuacunata micunga. Shinallataj huahuacunapish yayacunatami micunga. Chashnami cancunataca llaquichisha. Ashtahuanpish saquirijcunataca, caita chaita cachashpami chingachisha.

11Mandaj Jatun Diostajmi cashna nini: Ñucaca causacunimi. Ñucapajlla huasita cancuna millai rurashcacunahuan yangata rurashcamantaca, llaquichishatajmi. Ñuca ñahuimantaca manataj quishpiringuichijchu, manataj llaquishachu.

12Cancunapuramanta maijancuna saquirishpaca ungüihuanpish, yaricaihuanpishmi caillapitaj huañungacuna. Caishujcunaca cai muyundijllapitajmi espadapi huañungacuna. Chaishujcunataca caita chaitami cachasha. Paicunataca espadahuanmi catishpa risha.

13Ñuca p'iñarishcataca, paicunapi pajtachishpatajmi samarisha. Ñuca p'iñarishpa paicunata llaquichina pajtajpimi, ñucapajlla cachun chashna nishcataca yachangacuna.

14Ñucami cantaca llaquinayajta llaquichishpa, cambaj muyundij llajtacunapi causajcunapish, caita purijcunapish chanzata rurashpa asina cachun rurasha.

15Ñuca yallitaj p'iñarishpa canta llaquichicujpica, cambaj muyundij llajtacunapi causajcunapajca chanzata rurashca, c'amishca, llaquichishca, jatun mancharinami tucungui. Mandaj Dios ñucatajmi chashna nini.

16Paicunamanca jatun yaricaitami cachasha. Chashnami chai yaricaita cachashpa cancunapaj micunatapish chingachishpa jatunta llaquichisha.

17Shinallataj yaricaitapish, p'iña animalcunatapish cachashpami cancunataca llaquichisha. Paicunami cancunataca chingachinga. Caipica ungüipish, yahuarpish, jatun macanacuicunapishmi tiyanga. Caitaca Mandaj Dios ñucatajmi chashna nini” nircami.