EZEQUIEL 7 - Quichua Chimborazo Bible

Tucuri punlla chayamunamanta

1Mandaj Diosca ñucataca cashnami nirca:

2“Huañujlla aichayuj runalla, Mandaj Jatun Diosca Israel llajtataca cashnami nini: Israel llajtaca tucuimari tucurigrin.

3Cunanmari cancunataca tucuchigrini, ñuca jatunta p'iñarishcataca cancunapaj jahuapimi shitasha. Cancuna ima shinalla causashcatapish ñucami ricuchisha. Cai tucui millaita rurashcamantaca llaquichishatajmi.

4Ñuca ñahuimantaca manataj quishpiringuichijchu, cancunataca manataj llaquishachu. Ashtahuanpish cancuna ima shina causashca shinallataj, ima shina millaita rurashca shinallatajmi llaquichisha. Chashna rurajpimi, ñucataca Mandaj Diostaj cashcataca yachanguichij.

5Mandaj Jatun Diostajmi cashna nini: Riqui, jatun llaquimari chayamugrin, jatun llaquimari chayamugrin.

6Tucuchigrinimari, tucuchigrinimari. Cancunata llaquichijca ñamari rijcharishca. Riquichij, ñamari shamucun.

7Israel llajtapi causajcunalla, cancunata llaquichina punllaca, ñamari pacarimun. Chai llaqui punllaca, ñamari quichquiyamushca. Urcucunapi cushicunapaj randica, jatun macanacui punllamari chayamucun.

8Cunanca ñuca p'iñarishcataca utcami ricuchisha. Cancunapimi jatunta p'iñarishcataca pajtachisha. Cancuna imalla rurashcataca, ñucami ricuchisha. Millaita rurashcacunataca, cancunapaj jahuallapitajmi churasha.

9Ñuca ñahuimantaca manataj quishpiringuichijchu, cancunataca manataj llaquishachu. Can imallata rurashca shinallatajmi llaquichisha. Chai tucui millaita rurashcacunataca, cancunapaj jahuallapitajmi shitasha. Chaipimi Mandaj Dios ñucataj llaquichicushcataca yachanguichij.

10Riquichij, cancunata chingachina punllaca ñamari chayamucun. Chai punllaca ñamari achijyamucun. Varapish ñamari sisashca. Jatun tucunapish ashtahuanmari mirashca.

11Millaita ruranaca shujtajcunata llaquichina varami tucushca. Paicunaca achcacuna cashpapish, shujllapish mana saquiringacunachu. Paicunamanta huacajcunapish pi mana tiyangachu.

12Ñamari chai punllaca pajtamushca, ñamari chai punllaca quichquiyamushca. Pi imata randishpapish ama cushicuchun, pi imata c'atushpapish ama huacachun. Ñuca p'iñarishpa cachashca llaquicunaca tucuicunallatatajmi japinga.

13C'atujcuna causaj saquirishpapish, imata c'atushcataca mana cutin japi tucungachu. Tucuicunata llaquichina cashcata muscuipi shina ricuchishcataca, mana shujtajyachingachu. Millaita rurashcamantaca, quiquin causaitaca pi mana quishpichi tucungachu.

14Trompetapi tocashpami, tucuita allichingacuna. Shina cajpipish macanacuiman llujshingapajca, pi mana tiyangachu. Ñuca jatunta p'iñarishpa cachashca llaquica, tucuicunallatatajmi japinga.

15Canllamantaca espadami shamunga, ucupica ungüipish, yaricaipishmi tiyanga. Urcupi cajcunataca espadahuanmi huañuchinga, pueblo ucupi cajcunataca yaricaipish, ungüipishmi tucuchinga.

16Chai tucui llaquicunamanta quishpirishpa saquirijcunaca, pugru pambapi causaj palomacuna shinami urcucunapi miticugringacuna. Paicunaca millaita rurashcamantami, tucuicunallataj huacashpa ringacuna.

17Tucuicunapaj maquimi fuerza illaj tucunga. Tucuicunapaj cunguricunaca fuerza illaj tucushcamantami, yacu shina chujchunga.

18Paicunaca cañamazutami churaringacuna, jatun manchaipishmi japinga. Tucuicunallatajmi pingai tucungacuna. Umatapish tucuicunami lluchullata ruturingacuna.

19Paicunapaj cullquitapish ñancunapimi shitangacuna. Curitapish imapaj mana valijta shinami shitangacuna. Mandaj Dios jatunta p'iñari punllaca paicunapaj cullquipish, curipish mana quishpichi tucungachu, yaricaitapish mana parachi tucungacunachu, huijsapipish mana pajtata micungacunachu. Paicunapaj cullquimi curimi tsagnachishpa millaita rurachirca.

20Tucui laya sumajcunata churarishpami, jatun tucurcacuna. Chaicunallahuantajmi millanana dioscunata rurarcacuna. Chaimantami chaicunataca imapaj mana valijta rurarcani.

21Imalla charishcacunatapish shujtajcunamanmi cushpa cachasha. Chaicunataca ñucata mana manchajcuna causacun llajtapimi, mirga mirga chaupinacungacuna. Chashna rurashpami yangata rurangacuna.

22Paicunamantaca ñuca ñahuitaca anchuchishatajmi. Ñucapajlla huasitaca llaquichingacunami. Llaquichijcunaca ñucapajlla huasiman yaicushpami yangata rurangacuna.

23Cai llajtapi causajcunaca huañuchina yuyaillahuan jundami, cai pueblopi causajcunaca llaquichina yuyaillahuan jundami. Paicunapaj shuj cadenata rurayari.

24Chashna cashcamantaca, shujtaj llajtacunamantami yallitaj millai runacunata pushamusha. Chai runacunami paicunapaj huasicunata quichushpa causangacuna. Jatun tucushca mandajcunatapish chingachishami. Paicuna rurashca dioscunapaj huasicunatapish yangatami rurasha.

25Llaquicuna shamujpica, sumaj causaitami mashcangacuna. Chashna mashcashpapish, mana japingacunachu.

26Jatun llaquicunaca huasha huashami shamunga, huillashcacunapishmi huasha huasha uyaringa. Imatapish cutichichunmi ñuca ima nishcata huillajtaca mashcangacuna, curacunapish mandashcacunata mana yachachi tucungachu, cunaj yuyajcunapish mana cunangachu.

27Jatun mandajpish, pai churashca punta mandajpish llaqui churanatami churaringacuna. Cai llajtapi causajcunapaj maquicunaca chujchungami. Paicuna rurashca shinallami ñucapish rurasha. Paicuna imalla rurashcataca, ñucami ricuchisha. Chaipimi ñucataca, Mandaj Diostaj cashcata yachangacuna” nircami.